اسلام آباد: (دنیا نیوز) وزیراعظم شہباز شریف اور صدر مملکت آصف علی زرداری سے ایران کی سپریم نیشنل سکیورٹی کونسل کے سیکرٹری علی اردشیر لاریجانی نے الگ الگ ملاقاتیں کیں۔
ایران کی سپریم نیشنل سکیورٹی کونسل کے سیکرٹری علی اردشیر لاریجانی اس وقت پاکستان کے سرکاری دورے پر ہیں جنہوں نے وزیر اعظم محمد شہباز شریف سے وزیر اعظم ہاؤس اسلام آباد میں ملاقات کی۔
معزز مہمان کا خیرمقدم کرتے ہوئے وزیراعظم شہباز شریف نے دونوں ممالک کے درمیان تاریخی اور قریبی برادرانہ تعلقات کی اہمیت پر زور دیا اور مختلف شعبوں میں دوطرفہ تعلقات کو مزید مضبوط اور وسیع کرنے پر زور دیا۔
ڈاکٹر لاریجانی نے بھی وسیع اور باہمی طور پر فائدہ مند شعبوں میں پاکستان ایران تعلقات کو بڑھانے کی ضرورت پر زور دیا، ملاقات کے دوران فریقین نے اہم علاقائی اور بین الاقوامی پیش رفت پر بھی تبادلہ خیال کیا جبکہ خطے میں امن و استحکام کو فروغ دینے کیلئے مربوط کوششوں کی اہمیت پر زور دیا۔
شہباز شریف نے علاقائی مسائل پر ایران کے اصولی موقف کو سراہا اور مشکل وقت میں پاکستان کے ساتھ ایران کی یکجہتی پر اپنا اور ملک کا شکریہ ادا کیا، انہوں نے دونوں ممالک کے پرامن اور خوشحال مستقبل کے لیے ایران کے ساتھ مل کر کام کرنے کے لیے پاکستان کے عزم کا اعادہ کیا۔
ڈاکٹر لاریجانی نے حالیہ 12 روزہ جنگ کے دوران ایران کی غیر متزلزل حمایت پر پاکستانی قوم اور قیادت کا شکریہ ادا کیا اور تنازعات کے پرامن حل کے لیے مذاکرات اور سفارت کاری کی وکالت میں پاکستان کے تعمیری کردار کو سراہا۔
وزیراعظم نے ایران کے سپریم لیڈر عزت مآب سید علی خامنہ ای اور صدر عزت مآب مسعود پیزشکیان کے لیے اپنے احترام اور نیک خواہشات کا اظہار کیا اور پاکستان کی حمایت اور پاکستان- ایران تعلقات کو مضبوط بنانے کے عزم پر ان کا شکریہ ادا کیا۔
ملاقات میں یہ طے کیا گیا کہ نائب وزیراعظم اور وزیر خارجہ اسحاق ڈار کی قیادت میں ایک وفد جلد ایران کا دورہ کرے گا تاکہ دونوں ممالک کے درمیان مختلف شعبوں بالخصوص زراعت اور روابط، مواصلات میں تعاون کو مزید فروغ دیا جا سکے۔
.jpg)
پاکستان ایران کے ساتھ دوطرفہ تجارت بڑھانے کا خواہاں ہے: آصف زرداری
ترجمان ایوان صدر کے مطابق ایران کی سپریم نیشنل سکیورٹی کونسل کے سیکرٹری ڈاکٹر علی اردشیر لاریجانی نے ایوان صدر میں صدر آصف علی زرداری سے ملاقات کی، صدر مملکت نے ڈاکٹر لاریجانی کا خیرمقدم کیا۔
صدر آصف علی زرداری نے انہیں سپریم نیشنل سکیورٹی کونسل کا عہدہ سنبھالنے پر مبارکباد دی اور کہا کہ اسلام آباد اور تہران کے درمیان مسلسل تبادلے دونوں ممالک کے مثبت تعلقات کی علامت ہیں، صدر نے حالیہ سیلاب کے بعد ایران کی جانب سے اظہارِ یکجہتی پر شکریہ ادا کیا۔
ترجمان ایوان صدر کے مطابق انہوں نے ایرانی ہلال احمر کی انسانی امداد پر شکریہ ادا کیا اور کہا کہ ہمسایہ ممالک کے درمیان تعاون دونوں عوام کے مفاد میں ہے، پاکستان اور ایران کے تعلقات تاریخ، عقیدے اور ثقافت میں گہرے ہیں۔
یہ بھی پڑھیں: پاکستان اور ایران کا پارلیمانی اور عوامی سطح پر رابطوں کو فروغ دینے پر اتفاق
صدر آصف علی زرداری نے بھارت کے ساتھ جنگ کے دوران ایران کی مسلسل حمایت پر شکریہ ادا کیا، انہوں نے اسرائیلی جارحیت کے تناظر میں ایران کے لیے پاکستان کی سفارتی و سیاسی حمایت کا اعادہ کیا، صدر نے حالیہ جنگ میں ایرانی قوم کی ثابت قدمی اور رہبرِ اعلیٰ کی قیادت کو سراہا۔
ترجمان ایوان صدر کے مطابق انہوں نے ایران کی جانب سے فلسطین اور غیر قانونی بھارتی قبضے والے جموں و کشمیر کے عوام کی اصولی حمایت کی بھی تعریف کی اور کہا کہ پاکستان ایران کے ساتھ دوطرفہ تجارت بڑھانے کا خواہاں ہے۔
انہوں نے پاکستان۔ایران ریلوے لنک کو ترجیحی بنیادوں پر مضبوط کرنے کی ضرورت پر زور دیا تاکہ تجارت، سیاحت اور خاص طور پر زائرین کے سفر میں آسانی پیدا ہو، ایران۔پاکستان گیس پائپ لائن کے حوالے سے صدر مملکت نے پاکستان کی بڑھتی توانائی ضروریات کا ذکر کیا۔
.jpg)
ترجمان ایوان صدر کے مطابق آصف علی زرداری نے ایک باہمی قابلِ عمل حل کی ضرورت پر زور دیا، انہوں نے اسلام آباد میں ہونے والی حالیہ تکنیکی بات چیت کو خوش آئند قرار دیا۔
ڈاکٹر لاریجانی نے رہبرِ اعلیٰ آیت اللہ علی خامنہ ای اور ایرانی صدر مسعود پزشکیان کی نیک خواہشات کا پیغام پہنچایا، انہوں نے 12 روزہ جنگ میں ایران کے لیے پاکستان کی سفارتی و اخلاقی حمایت پر شکریہ ادا کیا۔
ترجمان ایوان صدر کے مطابق ڈاکٹر لاریجانی نے پاکستان کی مسلح افواج کی بہادری اور حالیہ واقعات میں کامیابی کو سراہا اور کہا کہ پاکستان کی کامیابی ہماری (ایران کی) کامیابی ہے۔
ڈاکٹر علی لاریجانی نے کہا کہ ایرانی صدر کے دورہ پاکستان کے بعد پاکستانی مصنوعات کو ایران میں ترجیحی رسائی دینے کے لیے ہدایات جاری کی گئی ہیں، اس سے 10 ارب ڈالر کے دوطرفہ تجارت کے ہدف کی جانب پیش رفت کی راہ ہموار ہوئی ہے۔
یہ بھی پڑھیں: اسحاق ڈار سے ایرانی مشیر علی لاریجانی کی ملاقات، باہمی تعاون کے فروغ کا عزم
صدر زرداری نے ڈاکٹر لاریجانی سے درخواست کی کہ وہ رہبرِ اعلیٰ کو ان کی نیک خواہشات پہنچائیں، ملاقات میں علاقائی و بین الاقوامی صورتحال، سلامتی اور دہشت گردی کے خلاف تعاون پر بھی تبادلہ خیال کیا گیا۔
ملاقات میں دونوں ممالک کے سینئر حکام نے شرکت کی، ایرانی وفد میں سفیر رضا امیری مقدم اور سپریم نیشنل سکیورٹی کونسل کے مختلف عہدیداران شامل تھے، پاکستانی جانب سے وزیرِ دفاع خواجہ محمد آصف، سیکرٹری خارجہ اور سیکرٹری نیشنل سکیورٹی موجود تھے۔
