میرانشاہ: (دنیا نیوز) پاک فوج کے زیراہتمام شمالی وزیرستان کے مشران اور قبائلی عمائدین کا اہم جرگہ ہوا جس میں سیکیورٹی صورتحال پر تفصیلی تبادلہ خیال کیا گیا۔
جنرل آفیسر کمانڈنگ میرانشاہ نے جرگہ میں موجود شرکاء کا خیرمقدم کیا، قیام امن کے حوالے سے قبائلی عمائدین کے کردار کو سراہا۔
مشران و عمائدین کے جرگہ میں شمالی وزیرستان کی سکیورٹی صورتحال، انسداد دہشت گردی اور فلاحی کاموں پر تفصیلی بات چیت کی گئی۔
اس موقع پر جی او سی کا کہنا تھا کہ عوام، سول انتظامیہ اور پاک فوج کے باہمی تعاون سے ہی دہشت گردی کا مکمل خاتمہ ہو سکتا ہے۔
اس موقع پر قبائلی رہنماؤں نے امن و امان کے حوالے سے اپنی تجاویز پیش کیں، قبائلی عمائدین کی ریاستی اداروں کے ساتھ مکمل تعاون کی یقین دہانی کرائی، جرگہ کا اختتام قومی یکجہتی اور سلامتی کی دعاؤں کے ساتھ ہوا۔
