اسلام آباد: (دنیا نیوز) وفاقی جوڈیشل اکیڈمی میں سول ججز اور جوڈیشل مجسٹریٹس کی ایک ہفتے کی تربیت مکمل ہو گئی۔
سپریم کورٹ کے جسٹس جمال خان مندوخیل کی اختتامی تقریب میں بطور مہمانِ خصوصی شرکت کی اور کہا کہ مسلسل سیکھنے سے صلاحیتیں بہتر ہوتی ہیں، نقطۂ نظر وسیع ہوتا ہے۔
جسٹس جمال مندوخیل نے کہا کہ نوجوان عدالتی افسران روزانہ علم میں اضافہ کریں، ہر کیس سے سیکھیں، ججوں کو دلیرانہ فیصلے کرنے چاہئیں، دباؤ، تعصب یا ذاتی مفاد سے بالاتر رہیں۔
انہوں نے کہا کہ جج غلطیوں کا جواز نہ بنائیں، آئین و قانون کی بالادستی کے لیے کھڑے ہوں، عام سائلین عدالتی نظام کے اہم ترین فریق، صرف بروقت اور منصفانہ فیصلوں کے خواہاں ہیں۔
جسٹس جمال مندوخیل کا کہنا تھا کہ عدلیہ میں اخلاقی قوت اور اصولی پختگی ضروری ہے۔
فیڈرل جوڈیشل اکیڈمی کے ڈی جی حیات علی شاہ نے تقریب سے خطاب کرتے ہوئے کہا کہ امن اور ترقی انصاف کے بغیر ممکن نہیں۔
اختتامی تقریب میں 27 عدالتی افسران کو اسناد تقسیم کی گئیں، تقریب کے آخر میں شرکا اور مہمانِ خصوصی کا گروپ فوٹو بھی لیا گیا۔
