شرقپورشریف:(دنیا نیوز) وفاقی وزیر نیشنل فوڈ سکیورٹی اینڈ ریسرچ رانا تنویر حسین نے کہا ہے کہ حکومت تمام فیصلے نواز شریف کے مشورے سے کرتی ہے۔
اپنے آبائی حلقے میں میڈیا سے گفتگوکرتے ہوئے رانا تنویر حسین کا کہنا تھا کہ کے پی کے صوبائی حکومت کا بنیادی کام امن وامان بحال کرنا ہے، مرکز اور افواج پاکستان دیگر ادارے صوبے میں مدد کے لیے جاتے ہیں اور مدد کرتے ہیں۔
اُنہوں نے کہا کہ بانی پی ٹی آئی نے پاکستان کی معیشت کا بیڑا غرق کر دیا تھا، اب پاکستان آگے بڑھ رہا ہے اور ملکی معیشت مضبوط ہورہی ہے، شہباز شریف کی حکومت نے ملک کو ڈیفالٹ ہونے سے بچایا ہے۔
وفاقی وزیر نیشنل فوڈ سکیورٹی اینڈ ریسرچ کا کہنا تھا کہ بانی پی ٹی آئی کو جیل میں بہت سہولیات مل رہی ہیں، مسلم لیگ ن کی قیادت جب جیل میں تھی تو اُنہوں نے مشکلات برداشت کیں، میاں محمد نواز شریف پاکستان کے سب سے بڑے سیاسی لیڈر ہیں۔
رانا تنویر حسین نے مزید کہا کہ حکومت تمام فیصلے قائد میاں محمد نواز شریف کے مشورے اور ہدایت سے کرتی ہے، ستائیسویں آئینی ترامیم سے عام آدمی کو ریلیف ملے گا، حکومت اور فوج کے درمیان بہترین کوارڈینیشن ہے۔
