اسلام آباد: (ویب ڈیسک) پاکستان سپورٹس بورڈ نے ایشین چیمپئن شپ جیتنے پر انڈر 16 والی بال ٹیم کو 82 لاکھ روپے کیش ایوارڈ دینے کا اعلان کردیا۔
ترجمان پاکستان سپورٹس بورڈ کے مطابق انڈر16والی بال ٹیم کے ہر کھلاڑی کو تاریخی فتح پر6 لاکھ روپے کیش انعام دیا جائے گا، پی ایس بی کیش ایوارڈ پالیسی 2024 کے تحت براعظمی ٹیم ایونٹس کے گولڈ میڈلسٹ کھلاڑی کو انفرادی انعام کا 30 فیصد دیا جاتا ہے۔
اس پالیسی کے تحت 12 رکنی سکواڈ کے لیے یہ مجموعی طور پر 72 لاکھ کیش ایوارڈز دیئے جائیں گے، یہ پالیسی کوچنگ سٹاف کے لیے ٹیم ایوارڈ کا 50 فیصد مختص کرتی ہے، اس پالیسی کے تحت کوچ کو 10 لاکھ روپے دیے جائیں گے۔
ایشین چیمپئن شپ جیتنے پر انڈر 16 والی بال ٹیم اور کوچنگ سٹاف کو 82 لاکھ روپے کے کیش ایوارڈ آئندہ چند روز میں دیے جائیں گے۔
یاد رہے کہ پاکستان نے سنسنی خیز فائنل میں ایران کو 2-3 سے شکست دے کر ٹرافی اپنے نام کی تھی، پاکستان پورے ٹورنامنٹ میں ناقابلِ شکست رہا۔
