پرتگال نے آرمینیا کو شکست دیکر فیفا ورلڈکپ 2026ء کیلئے کوالیفائی کرلیا

لزبن: (ویب ڈیسک) پرتگال نے آرمینیا کو شکست دے کر فیفا ورلڈکپ2026ء کیلئے کوالیفائی کرلیا۔

پرتگال نے کرسٹیانو رونالڈو کی غیر موجودگی میں آرمینیا کو 1-9 سے شکست دے کر کوالیفائنگ راؤنڈ کے گروپ میں پہلی پوزیشن حاصل کی اور ورلڈ کپ میں اپنی جگہ بنا لی۔

پرتگال کی جانب سے برونو فرنینڈس اور جواؤ نیویس نے ہیٹ ٹرک سکور کرکے اپنی ٹیم کو گروپ ایف سے برراہِ راست ورلڈ کپ کے لئے کوالیفائی کرنے میں مدد دی۔

پرتگال کو جمعرات کو آئرلینڈ سے 0-2 کی شکست کا سامنا کرنا پڑا تھا اور اس میچ میں کپتان رونالڈو کو ریڈ کارڈ ملنے پر میدان سے باہر بھیج دیا گیا تھا اور اگلے میچ کیلئے معطل کیا گیا جس کے باعث وہ آرمینیا کے خلاف میچ میں شرکت نہ کرسکے۔

تاہم ٹیم کی جیت پر رونالڈو نے سوشل میڈیا پر بیان جاری کرتے ہوئے کہا کہ ہم ورلڈ کپ میں پہنچ گئے۔