کیلیفورنیا: (ویب ڈیسک) دنیا بھر میں ٹیکنالوجی کے شوقین افراد کیلئے ایک بڑی اور دلچسپ خبر سامنے آئی ہے، ایپل جسے سمارٹ فونز کی دنیا کا بادشاہ بھی کہا جاتا ہے، ایک نئے تجربے کی طرف قدم بڑھانے والا ہے۔
بلومبرگ کی تازہ رپورٹ کے مطابق ایپل کمپنی 2026 میں سٹینڈرد آئی فون نہ لانچ کر کے صرف آئی فون پرو اور ایک فولڈ ایبل ماڈل پیش کرنے کی منصوبہ بندی کر رہی ہے۔
تازہ رپورٹ کے مطابق ایپل کی جانب سے 2026 میں سٹینڈرڈ آئی فون 18 پیش نہیں کیا جائے گا بلکہ اسے بعد میں جاری کیا جائے گا تاکہ ملازمین پر دباؤ کم ہ وسکے اور آمدنی میں اضافہ ہو۔
رپورٹ میں بتایا گیا کہ 2026 میں کمپنی کی جانب سے صرف آئی فون 18 پرو ماڈلز متعارف کرائے جائیں گے، پرو ماڈلز کے ساتھ کمپنی کی جانب سے پہلا فولڈ ایبل آئی فون بھی پیش کیا جائے گا، یہ فولڈ ایبل فون حالیہ برسوں میں کمپنی کی جانب سے متعارف کرائی جانے والی اہم ترین ڈیوائس ہوگی۔
آئی فون 18 سیریز کے دیگر ماڈلز مارچ اور مئی 2027 کے درمیان کسی وقت متعارف کرائے جائیں گے، ان میں سٹینڈرڈ آئی فون 18، 18 ایئر اور 18 ای شامل ہوں گے۔
برسوں سے ایپل کی جانب سے نئے آئی فونز کو ستمبر میں ایک ایونٹ کے دوران پیش کیا جاتا ہے، البتہ ایس ای یا ای ورژنز کے آئی فونز کو سال کے شروع میں متعارف کرایا جاتا ہے۔
مختلف افواہوں کے مطابق فولڈ ایبل آئی فون میں کیمرا ڈسپلے کے اندر نصب ہوگا جبکہ وہ بک سٹائل کا ہوگا یعنی آپ ڈسپلے کو کسی کتاب کی طرح کھول یا بند کرسکیں گے، اسی طرح فولڈ ایبل آئی فون کی بیٹری بھی بہترین ہوگی اور یہ سب چیزیں سستی نہیں ہوں گی۔
ابھی قیمت کے بارے میں تو مصدقہ طور پر تو کچھ نہیں کہا جاسکتا ہے مگر کچھ عرصے پہلے کی رپورٹس کے مطابق اس کی قیمت 2100 سے 2500 ڈالرز کے درمیان ہو سکتی ہے۔
کچھ رپورٹس کے مطابق پہلا فولڈ ایبل آئی فون 7.9 سے 8.3 انچ تک بڑا ہوسکتا ہے، یہ فولڈ ایبل آئی فون لچکدار او ایل ای ڈی ڈسپلے سے لیس ہوگا اور ہزاروں بار کھولنے بند کرنے سے بھی اسے نقصان نہیں پہنچے گا، اس کے اندر نیا طاقتور پراسیسر ہوگا جبکہ کیمرا سسٹم بھی بہترین ہوگا۔
