کوالالمپور:(دنیا نیوز) ملائیشیا کی حکومت نے2026 سے 16 سال سے کم عمر بچوں کو سوشل میڈیا اکاؤنٹ بنانے یا استعمال کرنے پر پابندی عائد کردی۔
حکومت کے اس فیصلے کا مقصد کم عمر صارفین کو آن لائن خطرات، جیسے سائبر بُلیئنگ، دھوکا دہی اور نامناسب مواد سے بہتر طور پر محفوظ بنانا ہے۔
ملائیشیا کے مواصلاتی وزیر نے بتایا کہ حکومت ’آن لائن سیفٹی ایکٹ‘ کے تحت ایک ایسا نظام متعارف کرانے جا رہی ہے جس میں عمر کی تصدیق الیکٹرانک طریقہ کار کے ذریعے کی جائے گی، نئی پالیسی کے تحت سوشل میڈیا پلیٹ فارمز کو بھی سخت ضابطوں کا پابند بنایا جائے گا۔
حکام کے مطابق پارلیمنٹ کے متعدد ارکان اور بچوں کے حقوق کے لیے کام کرنے والی تنظیموں نے اس فیصلے کو سراہتے ہوئے کہا ہے کہ یہ اقدام نوجوان صارفین کی ذہنی، نفسیاتی اور سماجی بھلائی کے لیے ضروری ہے۔
خیال رہے ملائیشیا میں حالیہ برسوں کے دوران حکومت نے ڈیجیٹل پلیٹ فارمز پر ریگولیشنز سخت کرنے کی مہم تیز کر دی ہے تاکہ خاندانوں اور بچوں کے لیے آن لائن ماحول کو زیادہ محفوظ بنایا جا سکے۔
