بیجنگ: (ویب ڈیسک) چین میں ایک جم کی انتظامیہ نے اعلان کیا ہے کہ جو شخص 3 ماہ میں 50 کلوگرام وزن کم کرے گا اسے انعام میں ایک استعمال شدہ پورشے پینامیرا سپورٹس کار دی جائے گی۔
غیر ملکی خبر ایجنسی کے مطابق جم انتظامیہ کا کہنا ہے چیلنج میں شامل ہونے کے خواہشمند افراد کو 10 ہزار یوآن (تقریباً 1400 امریکی ڈالر) بطور فیس ادا کرنی ہوگی جس میں 3 ماہ کی تربیت، رہائش اور کھانے کے اخراجات شامل ہیں، فٹنس کوچ کا کہنا ہے کہ چیلنج جاری ہے اور جیسے ہی 30 شرکاء مکمل ہوں گے، رجسٹریشن بند کر دی جائے گی، اب تک 8 افراد رجسٹر ہو چکے ہیں۔
اس دلچسپ انعام نے بہت سے لوگوں کو وزن کم کرنے کی تحریک دی ہے مگر طبی ماہرین نے اس چیلنج کو خطرناک بھی قرار دیا ہے، ایک ماہرِ صحت نے تنبیہ کی کہ روزانہ آدھا کلو وزن کم کرنا انتہائی غیر محفوظ ہے، اگر کوئی شخص بہت زیادہ موٹاپے کا شکار نہیں ہے تو اس رفتار سے وزن کم کرنے سے چربی نہیں بلکہ پٹھے ختم ہوتے ہیں جس کے نتیجے میں ہارمونز میں عدم توازن، بالوں کا جھڑنا اور خواتین میں حیض کی بے قاعدگی جیسی مشکلات پیدا ہوسکتی ہیں۔
ماہرین کے مطابق محفوظ وزن میں کمی کی شرح ہفتہ وار تقریباً 0.5 کلوگرام ہونی چاہیے، انعام کے باوجود یہ چیلنج سوشل میڈیا پر شدید بحث کا باعث بن گیا ہے، کچھ لوگ اسے بہترین موٹیویشن کہہ رہے ہیں تو کچھ صارفین نے اسے خطرناک مقابلہ قرار دیا ہے۔
