سڈنی: (ویب ڈیسک) آسٹریلوی شہری لارنس واٹکنز کا نام دنیا کا طویل ترین نام قرار پایا ہے جسے انہوں نے مکمل پڑھ کر ایک نیا ریکارڈ قائم کر دیا۔
غیر ملکی خبر ایجنسی کے مطابق لارنس واٹکنز کے مکمل نام میں 2 ہزار سے زیادہ درمیانی نام شامل ہیں اور انہیں یہ پورا نام پڑھنے میں ایک گھنٹے سے زیادہ کا وقت لگا، انہوں نے مارچ 1990ء میں قانونی طور پر اپنا نام تبدیل کروایا تھا تاکہ اس میں 2 ہزار 251 درمیانی نام شامل کیے جا سکیں۔
اس اقدام کے ذریعے آسٹریلوی نے 2 ہزار 253 منفرد الفاظ پر مشتمل دنیا کا سب سے طویل نام رکھنے کا گنیز ورلڈ ریکارڈ اپنے نام کر لیا، واٹکنز نے بتایا کہ میری شادی کی تقریب میں نکاح خواں کو میرا پورا نام پڑھنے میں تقریباً 20 منٹ لگے تھے، تاہم گنیز ورلڈ ریکارڈز کی ایک ویڈیو کیلئے میں نے خود یہ کارنامہ انجام دینے کی کوشش کی اور انہیں اس کیلئے ایک گھنٹے سے زیادہ کا وقت درکار ہوا۔
لارنس واٹکنز کا مکمل نام لارنس ایلون ایلوئس ایلوئسیئس ایلفیج ایلون الوریڈ الوِن الیسینڈر ایمبی ایمبروز ایمبروسیئس ایمیاس ایمیوٹ ایمیاس اینڈرس آندرے آندریا آندریاس اینڈری اینیئرن انگوش آنلیف سے شروع ہوتا ہے اور یہ صرف حرف اے سے شروع ہونے والے ناموں کی ایک جھلک ہے۔
انہوں نے گنیز ورلڈ ریکارڈز کو بتایا کہ مجھے ہمیشہ ان عجیب و غریب ریکارڈز میں دلچسپی رہی ہے جو لوگ بناتے ہیں اور میں بھی اس دنیا کا حصہ بننا چاہتا تھا، میں نے گنیز ورلڈ ریکارڈز کی کتاب پوری پڑھی تاکہ دیکھ سکوں کہ میں کون سا ریکارڈ توڑ سکتا ہوں اور یہی واحد موقع تھا کہ میں زیادہ نام رکھ کر کسی سے آگے نکل سکتا تھا اور واحد ریکارڈ جو میں توڑ سکتا تھا وہ موجودہ ریکارڈ ہولڈر سے زیادہ نام شامل کرنے کا تھا۔
واٹکنز نے بتایا کہ اس عمل میں بہت ساری کاغذی کارروائی اور عدالت کے کئی چکر شامل تھے، میرے نام کی کامیابی سے تبدیلی کے بعد نئے قوانین منظور کیے گئے جنہوں نے دوسروں کو ان کا ریکارڈ توڑنے کی کوشش کرنے سے روک دیا۔
