سیلاب زدہ ریستوران میں تیرتی مچھلیوں کے درمیان کھانے کا لطف

بنکاک: (ویب ڈیسک) تھائی لینڈ کے وسطی حصے میں ایک ریستوران نے اچانک آنے والے سیلاب کو ایک منفرد تجربے میں بدل دیا ہے، جہاں لوگ پانی میں کھڑے ہو کر وہیں تیرتی ہوئی مچھلیوں کے ساتھ کھانا کھانے کا لطف اٹھانے پہنچ رہے ہیں۔

بنکاک سے تقریباً 30 کلومیٹر دور نخون پاتھوم صوبے میں واقع پا جِت نامی ریستوران 11 دن سے اس وقت انٹرنیٹ پر وائرل ہے جب اس کے ساتھ بہنے والا دریا کا پانی کنارے توڑ کر ریستوران کے صحن میں بھر گیا۔

شہری اب بڑی تعداد میں اس ریستوران کا رخ کر رہے ہیں، چھوٹے بچے خاص طور پر خوش نظر آتے ہیں جو کھانے کے دوران اپنی ٹانگوں کے گرد تیرتی ہوئی دریا کی مچھلیاں حیرت سے دیکھ رہے ہوتے ہیں۔

30 سال سے دریا کنارے قائم ریستوران کا عملہ پانی میں چلنے والے خصوصی بوٹ پہن کر بھورے سیلابی پانی میں نہایت احتیاط سے چلتے ہوئے مچھلی کے سوپ اور چکن نوڈلز جیسے پکوان گاہکوں تک پہنچاتا ہے جبکہ بہت سے گاہک مچھلیوں کو خوراک پھینک کر ان کی تصاویر بھی بناتے ہیں۔

ریستوران کی مالک پورنکمول پرنگپرینپری کہتی ہیں کہ جب چار سال پہلے یہاں پہلی بار سیلاب آیا تھا تو ان کا دل ڈوب گیا تھا لیکن اب یہی سیلاب ان کے ریسٹورنٹ کو عالمی شہرت دے چکا ہے، میں نے سوچا تھا اب تو کوئی گاہک نہیں آئے گا، لیکن پھر ایک گاہک نے تصاویر پوسٹ کیں جن میں مچھلیاں نظر آ رہی تھیں، پھر تو لوگ یہاں کھانے کے لیے ٹوٹ پڑے۔

پورنکمول کے مطابق سیلاب نے ان کی آمدنی بڑھا دی ہے، پہلے روزانہ تقریباً 10 ہزار بھات (309 ڈالر) کماتی تھیں، لیکن اب یہ آمدنی بڑھ کر 20 ہزار بھات (618 ڈالر) تک پہنچ گئی ہے۔

ریستوران کی ایک گاہک چومپھونت کھانتنیتی اپنے شوہر اور بیٹے کے ساتھ یہاں آئی تھیں، ،۔ کہتی ہیں کہ جب انہوں نے سنا کہ یہاں پانی میں کھانا کھایا جاتا ہے تو وہ خود کو روک نہ پائیں، یہ بہت اچھا ہے کیونکہ ہم بچوں کو یہاں لا سکتے ہیں، جب بچے مچھلیاں دیکھتے ہیں تو وہ ضد چھوڑ دیتے ہیں، میرا نہیں خیال تھائی لینڈ میں اور کوئی ایسی جگہ ہے جہاں مچھلیاں اس طرح سامنے آتی ہوں۔

63 سالہ بیلا وِنڈی کہتی ہیں کہ وہ یہاں اس لیے آئیں کہ وہ اپنے پیروں پر تیرتی مچھلیوں کا احساس محسوس کرنا چاہتی تھیں، عام طور پر جب پانی زیادہ ہو تو مچھلیاں یہاں آ جاتی ہیں، یہاں قدرت کے بہت قریب رہنے کا احساس ملتا ہے اور یہی چیز لوگوں کو اپنی طرف کھینچتی ہے۔

واضح رہے کہ تھائی لینڈ کے کئی دیگر علاقوں میں سیلاب نے تباہی مچائی ہے، جولائی کے آخر سے اب تک 12 افراد ہلاک اور دو لاپتہ ہو چکے ہیں، جبکہ 13 صوبوں میں 4 لاکھ 80 ہزار سے زائد افراد سیلاب سے متاثر ہوئے ہیں۔