دبئی: (ویب ڈیسک) دبئی کی مختلف سڑکوں پر ایسی سمارٹ مشینیں نصب کر دی گئی ہیں جو دن بھر مسلسل کام کرتے ہوئے مزدوروں کو مفت گرم کھانا فراہم کرتی ہیں۔
دبئی میں اوقاف فاؤنڈینش کے زیرانتظام محمد بن راشد گلوبل سینٹر فار وقف اینڈ ہبہ کنسلٹیشن نے بتایا کہ یہ مشینیں سنہ 2022ء میں شروع کیے گئے منصوبے خبز السبیل کا تسلسل ہیں جس کے تحت ضرورت مندوں کو سمارٹ مشینوں کے ذریعے مفت تازہ روٹی فراہم کی جا رہی تھی۔
بیان میں کہا گیا کہ نئی مشینوں کا ڈیزائن جدید ہے جس میں آسان استعمال کے لیے ڈیجیٹل سکرین موجود ہے، کھانے کی تازگی برقرار رکھنے کے لیے کولنگ سسٹم نصب ہے اور مشین کی حالت، بھراؤ کی سطح اور مرمت سے متعلق سمارٹ فیچرز بھی شامل کیے گئے ہیں۔
مزید بتایا گیا کہ صارفین کے لیے سمارٹ شناختی نظام متعارف کیا گیا ہے جس کے تحت ہر شخص روزانہ ایک کھانا حاصل کر سکے گا تا کہ تقسیم میں انصاف برقرار رہے اور زیادہ سے زیادہ ضرورت مند افراد تک سہولت پہنچ سکے۔
اوقاف دبئی کے سیکرٹری جنرل علی المطوع نے بتایا کہ یہ مشینیں دبئی کی کئی مساجد کے نزدیک نصب کی گئی ہیں اور آنے والے مرحلے میں ضرورت کے مطابق مزید علاقوں میں ان کی تعداد بڑھائی جائے گی، ہمارا مقصد یہ ہے کہ وقف کے نظام کو جدید اور پائیدار حلوں کے ذریعے فروغ دیا جائے تا کہ امداد باوقار اور آسان طریقے سے مستحقین تک پہنچے۔
