نئی دہلی: (دنیا نیوز) آپریشن سندور کی ناکامی پر شکست خوردہ مودی کی خاموشی سے پورا بھارت سیخ پا ہے۔
آپریشن سندور میں عبرتناک شکست کے بعد مجرمانہ خاموشی پر مودی سرکار کی بھارت میں رسوائی جاری ہے، بھارتی اپوزیشن پارٹی کانگریس نے مودی کو آڑے ہاتھوں لیا ہوا ہے۔
آپریشن سندور میں امریکی صدر کے پاکستان کے حق میں بیانات پر اپوزیشن جماعتوں کی مودی سرکار پر کڑی تنقید کی ہے۔
کانگریس لیڈر راہول گاندھی نے کہا کہ نریندر مودی ایک بزدل انسان ہے جس کے پاس کوئی وژن نہیں ہے، یہ سچائی ہے کہ نریندر مودی امریکی صدر ٹرمپ کے سامنے کھڑے نہیں ہو سکتے۔
راہول گاندھی نے کہا کہ نریندر مودی میں ہمت ہے تو بتائیں کہ امریکی صدر ٹرمپ کے بیانات جھوٹ پر مبنی ہیں، مودی اس بات کو نہیں جھٹلا سکتا کہ اس نے آپریشن سندور رکوایا۔
دوسری جانب کانگریس لیڈر سوپریا شری نیت کا کہنا تھا کہ ڈونلڈ ٹرمپ کے مطابق 7طیارے مار گرائے گئے، اس پر نریندر مودی کی خاموشی اسے تسلیم کرتی ہے، نریندر مودی امریکی صدر ڈونلڈ ٹرمپ سے شدید خوفزدہ رہتے ہیں۔
کانگریس لیڈر نے کہا کہ مودی کی بزدلی کی وجہ سے پورے بھارت کی عزت داؤ پر لگ چکی ہے۔
یاد رہے کہ آپریشن بنیان المرصوص میں پاکستان کی مسلح افواج نے بھارت کو منہ توڑ جواب دے کر ثابت کر دیا کہ ملکی سرحدیں ناقابلِ تسخیر ہیں۔
