کنشاسا: (ویب ڈیسک) افریقی ملک کانگو کے صوبے لوالابا میں تانبے کی کان دھنسنے کے المناک حادثے میں 43 کان کن ہلاک ہو گئے۔
الجزیرہ کے مطابق یہ واقعہ اس وقت پیش آیا جب کان میں پل گر گیا اور اس کے نتیجے میں متعدد افراد دب کر ہلاک ہوگئے، اب تک 43 لاشیں نکالی جا چکی ہیں اور تلاش کا عمل جاری ہے،
کانگو کے وزیر داخلہ نے بتایا کہ شدید بارش اور لینڈ سلائیڈنگ کے خطرے کی وجہ سے امدادی ٹیموں کو حادثے کے مقام تک پہنچنے میں مشکلات پیش آئیں، امدادی ٹیموں نے ہلاکتوں کی تعداد میں اضافے کا خدشہ ظاہر کیا ہے۔
انہوں نے بتایا کہ شدید بارش اور لینڈ سلائیڈنگ کے خطرے کے باعث اس مقام تک رسائی پر پابندی تھی، لیکن غیر قانونی کان کنوں نے زبردستی کان میں داخل ہونے کی کوشش کی، ڈوبے ہوئے حصے پر عارضی پل بنایا گیا تھا، جو کان کنوں کے زیادہ تعداد میں گزرنے سے گر گیا۔
واضح رہے کہ کانگو میں تقریباً 2 لاکھ افراد غیر قانونی کانوں میں کام کرتے ہیں، جو خطرناک حالات کی وجہ سے بدنام ہیں۔
