پیرس: (دنیا نیوز) فرانس نے لبنان پر ہونے والے حالیہ اسرائیلی حملوں کی شدید الفاظ میں مذمت کی ہے۔
فرانسیسی وزارت خارجہ کا کہنا ہے کہ لبنان کے ساتھ جنگ بندی کا احترام کیا جائے، جنوبی لبنان میں اسرائیلی حملوں میں شدت پر تشویش ہے، ہم اسرائیلی حملوں کے نتیجے میں ہونے والی ہلاکتوں کی سخت مذمت کرتے ہیں، ہمارا مؤقف ہے کہ 27 نومبر 2024ء کو ہونے والے جنگ بندی معاہدے کا احترام کیا جائے۔
ترجمان فرانسیسی وزارت خارجہ نے مزید کہا کہ ہمیں گولان کی پہاڑیوں پر ہونے والی پیشرفت پر بھی سخت تشویش ہے، اسرائیل سے مطالبہ کرتے ہیں کہ وہ گولان کی پہاڑیوں سے اپنی فوجوں کو واپس بلائے اور شام کے اقتدار اعلیٰ اور علاقائی خود مختاری کا احترام کرے۔
خیال رہے اسرائیلی فوج نے بدھ کے روز جنوبی لبنان پر خوفناک حملہ کیا تھا جس کے نتیجے میں کم از کم 25 افراد جان کی بازی ہار گئے تھے، اسرائیلی فوج کا ان حملوں پر مؤقف ہے ہم حزب اللہ کو نئے سرے سے منظم اور مضبوط ہونے کی کوششوں کو روکنے کیلئے ایسے حملے کرتے ہیں۔
