کیپ ٹاؤن: (دنیا نیوز) پاکستان نے دورہ جنوبی افریقہ کا فاتحانہ آغاز کیا ہے، پریکٹس میچ میں جنوبی افریقہ کی انوی ٹیشن الیون کو 6 وکٹوں سے شکست دے دی۔
تین روزہ پریکٹس میچ میں جنوبی افریقا انوی ٹیشن الیون نے اپنی دوسری اننگز 182 رنز بنا کر ڈکلیئر کر دی اور پاکستان کو جیت کے لیے 195 رنز کا ہدف دیا۔ پاکستانی بلے بازوں نے 195 رنز کا ہدف 41 ویں اوور میں چار وکٹوں کے نقصان پر حاصل کر لیا۔
حارث سہیل نے 73 اور امام الحق نے 66 رنز بنا ئے۔ اس سے پہلے جنوبی افریقہ انوی ٹیشن الیون نے اپنی پہلی اننگز 318 رنز 7 کھلاڑی آؤٹ پر ڈکلیئر کر دی تھی۔ جواب میں پاکستان نے بھی اپنی پہلی اننگز 306 رنز 7 کھلاڑی آؤٹ پر ڈکلیئر کر دی۔ پہلی اننگز میں اظہر علی اور بابر اعظم نے سنچریاں بنائیں۔ پاکستان اور جنوبی افریقا کے درمیان تین ٹیسٹ میچوں کی سیریز کا پہلا ٹیسٹ 26 دسمبر سے سنچورین میں شروع ہو گا۔
