ٹیکساس: شیطان سے معاہدے کے تحت 16 سالہ لڑکی قتل

امریکی ریاست ٹیکساس میں شیطان سے معاہدے کے تحت سولہ سالہ لڑکی کو قتل کرنے والے دو نوجوانوں کے خلاف مقدمہ درج کر لیا گیا ہے۔

ٹیکساس: (آن لائن) امریکی ریاست ٹیکساس میں حکام نے دو نوجوانوں کے ’شیطان کے ساتھ معاہدے‘ کے تحت سولہ سالہ لڑکی کو قتل کرنے کے الزام میں مقدمہ درج کر لیا ہے۔ غیر ملکی خبر رساں ادارے کے مطابق سترہ سالہ جوزے ریز اور سولہ لڑکے پر جن کا قانونی وجوہات کی وجہ نام ظاہر نہیں کیا جا سکتا الزام ہے کہ انہوں نے سولہ سالہ مس کورین سروینٹس کو قتل کیا ہے۔ ٹیکساس کے استغاثہ کا خیال ہے کہ ان لڑکوں نے ’شیطان کے ساتھ معاہدے‘ کے تحت لڑکی کا قتل کیا ہے۔ ان پر الزام ہے کہ انہوں نے لڑکی کو رسومات ادا کرکے قتل کرنے کے بعد اس کے جسم کو مسخ کرکے اس کے معدے پر صلیب کا الٹا نشان بنایا۔ استغاثہ کا کہنا ہے کہ ہوسٹن میں یہ لڑکے دھوکے سے لڑکی کو ایک خالی فلیٹ میں لے گئے۔ کائونٹی پراسیکیوٹر جان جورڈن نے کہا ہے کہ چھوٹے لڑکے نے سترہ سالہ جوزے ریز کو یہ کہتے سنا کہ اس نے اپنی روح شیطان کو بیچ رکھی ہے۔ سولہ سالہ لڑکا بھی ایسا ہی کرنا چاہتا تھا۔ پولیس پراسیکوٹر نے بتایا کہ چھوٹے لڑکے نے بڑے لڑکے سے پوچھا کہ اگر اس نے قتل کا ارتکاب کیا تو کیا وہ اس طرح اپنی روح شیطان کو بیچ سکے گا؟۔ جوزے ریز نے جواب دیا کہ ہاں۔ پولیس پراسیکیوٹر نے کہا کہ اس خالی فلیٹ میں جو کچھ ہوا وہ حیوانیت تھی اور جو کچھ عدالت میں ہوگا وہ انصاف ہو گا۔ پولیس نے سنیچر کو خالی فلیٹ سے اس وقت سولہ سالہ کروینٹس کی لاش برآمد کی جب ایک رہائشی نے پولیس کو اطلاع دی کہ ایک فلیٹ کا دروازہ کھلا ہوا ہے۔ جوزے ریز کے وکیل نے کہا کہ وہ اس مقدمے کے بارے ابھی کوئی تبصرہ نہیں کر سکتے کیونکہ انہیں ملزم کا وکیل مقرر ہوئے زیادہ وقت نہیں ہوا ہے اور وہ تفصیلات سے آگاہ نہیں ہیں۔ پراسیکیوٹر نے بتایا کہ جوزے ریز نے جب اپنے خاندان کے سامنے اعتراف جرم کیا تو انہوں نے پولیس کو آگاہ کر دیا تھا۔