لاہور: (دنیا نیوز) پنجاب کا آئندہ مالی سال کا بجٹ پیش ہوگا یا نہیں؟ صورتحال تاحال غیر یقینی صورتحال کا شکار ہے۔ وزیرِ قانون رانا ثناء اللہ کہتے ہیں کہ دوسرے صوبے بجٹ پیش کرتے ہیں تو پنجاب بجٹ پیش کرے گا.
خیبر پختونخوا حکومت نے بجٹ پیش نہ کرنے کا اعلان کر کے پنجاب کو بھی مشکل میں ڈال دیا ہے۔ پنجاب کے وزیرِ قانون رانا ثناء اللہ کہتے ہیں کہ دوسرے صوبوں کے مطابق فیصلہ کریں گے۔ اگر دیگر صوبے بجٹ پیش نہیں کرتے تو پنجاب بھی پیش نہیں کرے گا۔
ادھر پنجاب کی بیوروکریسی نے بھی بجٹ پیش کرنے کی مخالفت کر دی ہے۔ چیف سیکرٹری پنجاب، محکمہ قانون اور محکمہ خزانہ نے بھی بجٹ پیش نہ کرنے کا مشورہ دیدیا ہے۔ محکمہ خزانہ پنجاب اور محکمہ پی اینڈ ڈی کو اس حوالے سے وزیرِاعلیٰ کے حتمی حکم کا انتظار ہے۔
دوسری جانب بجٹ کا پیش ہونا تو ابھی غیر یقینی صورتحال کا ہے شکار، مگر اراکینِ پنجاب اسمبلی کو وزیرِ خزانہ پنجاب سے ملاقات کا بلاوا مل گیا ہے۔ آخری دنوں میں وزیرِ خزانہ نے ارکان اسمبلی سے بجٹ تجاویز مانگ لی ہیں۔
