الیکشن کمیشن کا سکروٹنی سیل 19 جون تک کاغذاتِ نامزدگی کی باریک بینی سے چھان بین کرے گا۔ الیکشن کمیشن کے مطابق سکروٹنی سیل کی جانب سے 12 ہزار امیدواروں کے کوائف نیب ، ایف بی آر اور سٹیٹ بینک کو بھیجے گئے ہیں۔ ساڑھے سات ہزار امیدواروں کے کوائف کی آن لائن سکروٹنی سسٹم کی مدد سے جانچ پڑتال ہو چکی ہے۔

ذرائع کے مطابق سکروٹنی میں سٹیٹ بینک نے حنا ربانی کھر، ہارون بلور اور فیصل واوڈا سمیت ایک سو سے زائد افراد کو نادہندہ قرار دے دیا ہے۔

کاغذاتِ نامزدگی کی جانچ پڑتال کے بعد 22 جون تک اپیلیں دائر کی جا سکیں گی۔ 27 جون تک اپیلوں کو نمٹایا جائے گا جبکہ نظر ثانی شدہ فہرست 28 جون کو جاری ہو گی۔ امیدوار اپنے کاغذات 29 جون تک واپس لے سکیں گے جس کے بعد حتمی فہرست جاری کی جائے گی۔