بیجنگ: (روزنامہ دنیا) چین نے نیا سپر کمپیوٹر پروٹوٹائپ سن وے لانچ کر دیا، جو سائنسی ریسرچ اور میڈیکل کی فیلڈ میں مددگار ثابت ہو گا۔
چینی خبر رساں ایجنسی کے مطابق سن وے ایگزا سکیل کمپیوٹر پروٹو ٹائپ کو نیشنل ریسرچ سنٹر آف پیرالل کمپیوٹر انجینئرنگ اینڈ ٹیکنالوجی (این آر سی پی سی)، نیشنل سپر کمپیوٹنگ سنٹر اور پائلٹ نیشنل لیبارٹری فار میرین سائنس اینڈ ٹیکنالوجی نے مشترکہ طور پر بنایا۔ ایک ایگزا سکیل کمپیوٹر یعنی دس لاکھ کی پانچ گنا طاقت (ایک ہزار کی چھٹی طاقت) فی سیکنڈ کے حساب سے کیلکولیشنز کرسکتا ہے۔
واضح رہے کہ گزشتہ ماہ 22 جولائی کو بھی ایک ایگزا سکیل سپر کمپیوٹر ٹیانہے-3 کا آزمائشی ٹیسٹ کیا گیا تھا، جس کا فائنل ورژن 2020 تک سامنے آنے کی امید ہے۔ یہ دونوں پروٹوٹائپ چین کے نیکسٹ جنریشن سپرکمپیوٹر کی تیاری میں ایک اہم قدم ثابت ہوں گے۔ سپر کمپیوٹرز موسم کی پیشگوئی، سمندری معلومات، فنانشل ڈیٹا اینالسز اور دیگر اہم شعبوں میں اہم خدمات سرانجام دیتے ہیں۔
