اسلام آباد: (روزنامہ دنیا) وزارت پٹرولیم نے پٹرول بحران کی ذمہ دار آئل مارکیٹنگ کمپنیوں کو ایک بار پھر سخت تنبیہ کرتے ہوئے کہا ہے کہ وہ اگلے 24 گھنٹے کے اندر پٹرو ل پمپوں پر مصنوعات کی صورتحال معمول پر لائیں ورنہ وزارت خلاف ورزی کرنے والی کمپنیوں کے لائسنسوں کی منسوخی کیلئے ریفرنس اوگرا کو بھجوانے پر مجبور ہوگی جبکہ وزارت پٹرولیم نے نجی آئل مارکیٹنگ کمپنیوں پر الزام عائد کیا ہے کہ وہ جان بوجھ کر ذخیرہ اندوزی کر رہی ہیں۔
ڈائریکٹر جنرل (آئل) کی طرف سے لکھے گئے ایک اور مراسلہ میں او سی اے سی کو کہا گیا ہے کہ چیف سیکرٹری خیبر پختونخوا کی رپورٹ کے مطابق صوبہ کے کل 1508 پٹرول پمپوں میں سے 1152 پٹرول پمپ مصنوعات سے خالی ہیں جوکہ کل پٹرول پمپوں کا 77 فیصد ہیں۔ آئل مارکیٹنگ کمپنیاں اپنے پٹرول پمپوں کو مکمل بھریں، اگر وہ ا یسا کرنے میں ناکام رہیں تو وزارت اوگرا کو ان کمپنیوں کے مارکیٹنگ لائسنس کی منسوخی کیلئے ریفرنس بھجوانے پر مجبور ہو جائے گی۔
