لاہور: (ویب ڈیسک) پاکستان کرکٹ بورڈ (پی سی بی) نے آسٹریلیا کے ڈیوڈ ریڈ کو ٹی 20 ورلڈکپ کے لیے قومی ٹیم کا مینٹل پرفارمنس کوچ مقرر کردیا۔
پاکستان کرکٹ بورڈ کے مطابق ٹی 20 ورلڈ کپ کے لیے ٹیم منیجمنٹ میں مینٹل پرفارمنس کوچ کی تقرری کی گئی ہے، اس عہدے پر آسٹریلیا کے معروف مینٹل ہیلتھ ماہر ڈیوڈ ریڈ کا تقرر کیا گیا ہے جو اس سے قبل آئی پی ایل کی ٹیم چنئی سپر کنگز، بگ بیش کی ٹیم میلبرن سٹارز اور آسٹریلیا کے اولمپک ایتھلیٹس کے ساتھ کام کر چکے ہیں۔
ڈیوڈ ریڈ ایتھلیٹس کو ہدف کے لیے فوکس رہنے میں رہنمائی دینےکے لیے مشہور ہیں۔
آسٹریلوی مینٹل ہیلتھ ایکسپرٹ ٹی 20 ورلڈکپ اور دورہ انگلینڈ کے لیے ٹیم کو دستیاب ہوں گے، وہ 20 مئی کو پاکستان کرکٹ ٹیم کو جوائن کر لیں گے۔
پاکستان کرکٹ بورڈ کے چیئرمین محسن نقوی کا کہنا ہے کہ کھلاڑیوں کی ذہنی صحت پر توجہ دینا نہ صرف پی سی بی کی ترجیح ہے بلکہ اس کا بنیادی عہد بھی ہے کیوں کہ گراؤنڈ کی پرفارمنس کا براہ راست تعلق کھلاڑیوں کی ذہنی صورتحال سے ہوتا ہے۔
محسن نقوی نے امید ظاہر کی کہ ڈیوڈ ریڈ جیسے تجربہ کار ایکسپرٹ کی موجودگی سے پاکستانی پلیئرز کو فیلڈ کے اندر اور فیلڈ کے باہر فائدہ حاصل ہو گا۔
