اسرائیلی فوج کی زیرِ حراست فلسطینی شہری دل کا دورہ پڑنے سے جاں بحق

مقبوضہ مغربی کنارے میں فلسطینی شہری اسرائیلی فوجی چیک پوسٹ پر دوران حراست دل کا دورہ پڑنے سے جاں بحق ہوگیا۔

فلسطینی ہلالِ احمر کے مطابق 45 سالہ رأفت خیری ابو خلیل کو طولکرم کے مشرق میں واقع عناب چیک پوسٹ پر روکا گیا تھا، جہاں ان کی طبیعت بگڑ گئی، ان کی میت کو طولکرم کے سرکاری ہسپتال منتقل کر دیا گیا۔

فلسطینی خبر رساں ادارے وفا کے مطابق ابو خلیل اریحا میں فلسطینی ملٹری ٹریننگ اتھارٹی میں کپتان کے عہدے پر تعینات تھے، ان کی موت ایسے وقت میں ہوئی جب مقبوضہ مغربی کنارے میں فلسطینیوں کی نقل و حرکت پر بڑھتی پابندیوں پر تشویش میں اضافہ ہو رہا ہے۔

اقوام متحدہ کی خصوصی نمائندہ فرانسسکا البانیزے کے مطابق چیک پوسٹوں، دروازوں اور سڑکوں پر رکاوٹوں کا بڑھتا نظام فلسطینیوں کی ملازمت، علاج، تعلیم اور خاندانی زندگی تک رسائی متاثر کر رہا ہے۔

7 اکتوبر کے حملے ہماری ناکامی ہیں، سبق سیکھنا ہوگا: سربراہ اسرائیلی فوج

 اسرائیلی فوج کے سربراہ لیفٹیننٹ جنرل ایال زامیر نے7 اکتوبر 2023ء کے حملے کو اپنی فوج کی ناکامی قرار دیا اور کہا ہے کہ فوج کو ان ناکامیوں سے سبق سیکھنا ہوگا۔

ایک بیان میں لیفٹیننٹ جنرل ایال زامیر نے کہا کہ 7 اکتوبر 2023ء کے روز فوج کو شدید ناکامی کا سامنا کرنا پڑا، 7 اکتوبر کے حملوں سے متعلق فوجی تحقیقات مکمل کر لی گئی ہیں اور ان سے تباہی کی شدت کا اندازہ ہوا ہے۔

ان کا کہنا تھا کہ ماضی کی ناکامیوں میں الجھنے کے بجائے ان سے سبق حاصل کر کے اصلاحات نافذ کرنا اور آگے بڑھنا ضروری ہے۔

امریکی سینیٹر کرس مرفی کا ایران کیساتھ سفارتی ڈیل پر توجہ دینے پر زور

امریکی ڈیموکریٹ سینیٹر کرس مرفی نے مشرق وسطیٰ کے حالیہ دورے کے بعد سوشل میڈیا پلیٹ فارم ایکس پر بیان جاری کیا ہے جس میں انہوں نے ایران کے ساتھ سفارتی ڈیل پر توجہ مرکوز کرنے کی ضرورت پر زور دیا ہے۔

امریکی ڈیموکریٹ سینیٹر کرس مرفی نے قطر میں امریکی اور ایرانی سفارت کاری کے کوآرڈینیٹر علی الثوادی کے ساتھ طویل ملاقات کا احوال شیئر کرتے ہوئے سینیٹر مرفی نے بتایا اس وقت ایران کے ساتھ نیا سفارتی معاہدہ مکمل طور پر ممکن ہے۔

کرس مرفی نے کہا کہ امریکا کو دوبارہ فوجی حملے شروع کرنے کی بجائے اسی سفارتی ڈیل کو ترجیح دینی چاہئے۔

خطے میں جاری کشیدگی اور ماضی کی ناکام امن کوششوں پر تنقید کرتے ہوئے ان کا کہنا تھا کہ دشمنی کو دوبارہ ہوا دینے کے مقابلے میں بات چیت کے ذریعے امن کا قیام ہی اس وقت سب سے اہم اور قابل عمل راستہ ہے۔ 

ایران کے وزیر تیل محسن پاک نژاد نے عہدے سے استعفیٰ دیدیا

ایران کے وزیر تیل محسن پاک نژاد نے ذاتی وجوہات کی بنا پر عہدے سے استعفیٰ دے دیا ہے۔

ایرانی سرکاری میڈیا کے مطابق صدر مسعود پزشکیان نے ان کا استعفیٰ قبول کر لیا جس کے بعد سرکاری ملکیتی نیشنل ایرانی آئل کمپنی کے چیف ایگزیکٹو حمید بوارد کو قائم مقام وزیر تیل مقرر کر دیا گیا ہے۔

محسن پاک نژاد اگست 2024 سے ایران کے وزیر تیل کے عہدے پر فائز تھے، ان کا استعفیٰ ایسے وقت میں سامنے آیا ہے جب ایران اور امریکا کے درمیان جاری سات ماہ سے جاری جنگ نے ایرانی معیشت پر دباؤ بڑھا دیا ہے۔

صدر کے دفتر کے نائب برائے مواصلات مہدی طباطبائی نے سرکاری ٹی وی کو بتایا کہ پاک نژاد نے ذاتی وجوہات کی بنا پر کافی عرصہ پہلے استعفیٰ پیش کیا تھا جسے صدر نے ان کی درخواست پر منظور کیا۔

پاک نژاد نے استعفے سے قبل سرکاری میڈیا سے گفتگو میں کہا تھا کہ ایران کے فروخت کردہ تیل کی آمدنی اب بھی ملک کو موصول ہو رہی ہے اور یہ سلسلہ جاری رہے گا۔

یمن کے ساحل کے قریب بحری جہاز کے نزدیک متعدد دھماکوں کی اطلاع

یمن کے ساحل کے قریب بحری جہاز کے نزدیک متعدد دھماکوں کی اطلاع سامنے آئی ہے۔

برطانوی میری ٹائم ٹریڈ آپریشنز کا کہنا ہے کہ اسے یمن کی بندرگاہ المخا سے 60 ناٹیکل میل جنوب میں ایک واقعے کی اطلاع موصول ہوئی جہاں ایک آئل ٹینکر کے عملے نے جہاز کے قریب متعدد دھماکے دیکھے۔

برطانوی میری ٹائم ایجنسی کے مطابق جہاز کا عملہ محفوظ ہے اور واقعے کے نتیجے میں ماحولیاتی آلودگی کی کوئی اطلاع نہیں ملی۔

ایرانی ایئر لائنز کی امریکی استثنیٰ ملنے کے بعد نجف کیلئے پروازیں بحال

امریکی استثنیٰ ملنے کے بعد ایرانی ائیر لائنز نے عراق کے شہر نجف کے لئے اپنی پروازیں بحال کر دی ہیں۔

امریکا کی جانب سے عراق کو دی گئی خصوصی چھوٹ کے بعد پابندیوں کا شکار ایرانی فضائی کمپنیوں کو نجف شہر تک پروازیں چلانے کی اجازت مل گئی ہے۔

پابندی ہٹنے کے بعد پہلی پرواز ایران کی 'کیسپین ائیرلائنز' نے آپریٹ کی جو مقامی وقت کے مطابق شام 5 بج کر 15 منٹ پر نجف ائیرپورٹ پر اتری۔

عراقی حکومت نے اعلان کیا تھا کہ اس کا امریکا کے ساتھ معاہدہ طے پا گیا ہے جس کے تحت ’’ماہان ایئر‘‘ کے علاوہ دیگر تمام ایرانی ائیرلائنز کو نجف کے لئے روزانہ 40 پروازیں آپریٹ کرنے کی اجازت ہوگی۔

ایران نے اپنے سفارتکاروں کو امریکا سے نکالے جانے کا دعویٰ مسترد کر دیا

ایران نے اپنے سفارت کاروں کو امریکا سے نکالے جانے کا امریکی دعویٰ مسترد کر دیا۔

ایرانی وزیر خارجہ عباس عراقچی نے کہا جنرل اسمبلی میں شریک تمام ایرانی سفارت کار طے شدہ شیڈول کے مطابق امریکا سے روانہ ہوئے۔

عراقچی نے امریکی دعوے کو جعلی سفارت کارانہ بے دخلی قرار دیتے ہوئے کہا اس پر فخر کرنا کسی بھی ملک کے اعلیٰ سفارتی عہدیدار کے شایان شان نہیں اور یہ دعویٰ مایوسی اور شکست کا اظہار ہے۔

انہوں نے کہا کہ ایسا اقدام اقوام متحدہ کے میزبان ملک کی حیثیت سے امریکا کی ذمہ داریوں سے بھی مطابقت نہیں رکھتا۔

اس سے قبل امریکی میڈیا ادارے ایگزیوس نے امریکی عہدیدار کے حوالے سے دعویٰ کیا تھا کہ ایرانی وفد کے دو ارکان کو جنرل اسمبلی کا اجلاس ختم ہونے کے کئی دن بعد بھی نیویارک میں موجود رہنے پر امریکا سے نکال دیا گیا۔

امریکی عہدیدار نے کہا تھا کہ وزیر خارجہ مارکو روبیو نے انہیں ملک چھوڑنے کا حکم دیا تھا۔

مکہ دفاعی معاہدے کے 3 رکن ممالک کی کمیٹی کا اجلاس آج ریاض میں ہوگا

مکہ دفاعی معاہدے کے رکن ممالک کی کمیٹی کا اہم اجلاس آج ریاض میں ہوگا، جس میں ترکیہ، سعودی عرب اور پاکستان کے نمائندے شریک ہوں گے۔

ریاض اجلاس میں خطے کی مجموعی سکیورٹی صورتحال اور باہمی دفاعی تعاون سمیت اہم امور پر تبادلہ خیال متوقع ہے، اجلاس ایسے وقت میں ہو رہا ہے جب یمنی صدر نے حوثی ملیشیا کے خلاف بڑے فوجی آپریشن کا اعلان کیا ہے۔

یمنی صدر کے مطابق حوثی ملیشیا کے زیر قبضہ علاقوں کو واپس لینے کیلئے بڑے پیمانے پر فوجی کارروائی کی جائے گی، خطے میں پیدا ہونے والی تازہ صورتحال کے تناظر میں ریاض اجلاس کو اہم قرار دیا جا رہا ہے۔

سعودی اتحاد کا یمن کی تسلیم شدہ حکومت کی حمایت جاری رکھنے کا اعلان

ایک بیان میں ترجمان سعودی اتحاد بریگیڈیئر جنرل ترکی المالکی نے کہا کہ حوثی زیر قبضہ علاقوں کی بازیابی تک یمنی حکومت اور عوام کے ساتھ کھڑے رہیں گے، یمن میں ریاستی اداروں کی بحالی تک حمایت جاری رہے گی۔

انہوں نے کہا کہ باب المندب اور یمنی ساحلوں پر حوثی خطرات کے خاتمے کیلئے اقدامات جاری رہیں گے، سعودی عرب کو خودمختاری اور سلامتی کے دفاع کا حق حاصل ہے۔

ترجمان سعودی اتحاد کا کہنا تھا کہ مزید حملوں کی روک تھام کیلئے ضروری اقدامات کیے جائیں گے، مکہ مکرمہ اور مدینہ منورہ کو نشانہ بنانے کی کوششیں خطرناک ہیں۔

آبنائے ہرمز پر امریکی جواب زیر غور، حتمی مؤقف سفارتی چینلز سے دیا جائے گا: کاظم غریب آبادی

ایرانی نائب وزیر خارجہ کاظم غریب آبادی نے کہا ہے کہ ایران نیویارک میں اقوام متحدہ کے اجلاسوں کے دوران ایرانی وزیر خارجہ عباس عراقچی کی جانب سے آبنائے ہرمز کے حوالے سے پیش کی گئی تجویز پر امریکی جواب کا جائزہ لے رہا ہے۔

کاظم غریب آبادی نے کہا کہ ایران اس معاملے پر امریکی مؤقف کا بغور جائزہ لے رہا ہے اور اس حوالے سے حتمی فیصلہ ہونے کے بعد ہی باضابطہ جواب دیا جائے گا۔

انہوں نے واضح کیا کہ اگر اسلامی جمہوریہ ایران کی جانب سے کوئی حتمی جواب تیار کیا گیا تو اسے مناسب اور متعلقہ سفارتی ذرائع کے ذریعے امریکا تک پہنچایا جائے گا۔

یمن میں حوثیوں کے خلاف ملک گیر فوجی آپریشن شروع کرنے کا اعلان

یمن کی بین الاقوامی طور پر تسلیم شدہ صدارتی لیڈرشپ کونسل کے سربراہ رشاد العلیمی نے حوثی باغیوں کے خلاف ملک گیر فوجی آپریشن شروع کرنے کا اعلان کردیا۔

ٹیلی ویژن پر قوم سے خطاب کرتے ہوئے رشاد العلیمی نے کہا کہ فوجی کارروائی کا بنیادی مقصد حوثیوں کے زیر قبضہ یمنی علاقوں کو واپس لینا اور ملک بھر میں ریاست اور اس کے اداروں کی عملداری بحال کرنا ہے۔

انہوں نے کہا کہ آج حوثیوں کے زیر قبضہ علاقوں کو واپس لینے اور ریاستی عملداری کو وسیع کرنے کے لیے فوجی کارروائیوں کے آغاز کا اعلان کر رہے ہیں۔

رشاد العلیمی نے حوثیوں کے زیر کنٹرول علاقوں کے عوام سے اپیل کی کہ وہ یمنی مسلح افواج کے ساتھ مکمل تعاون کریں۔ 

ایران نے امریکی تجاویز کا جواب دے دیا، پابندیاں ختم کرنا ہوں گی: اسماعیل بقائی

ایرانی وزارت خارجہ کے ترجمان اسماعیل بقائی نے کہا ہے کہ ایران امریکی تجاویز کا پہلے ہی جواب دے چکا ہے، جبکہ واشنگٹن کی جانب سے پیش کی گئی نئی تجاویز بھی سابقہ تجاویز سے ملتی جلتی ہیں اور ان کا بنیادی محور جوہری معاملہ ہے۔

پریس بریفنگ کے دوران اسماعیل بقائی نے کہا کہ ایران آبنائے ہرمز سے متعلق معاملات پر توجہ چاہتا ہے اور امریکا کی جانب سے عائد کی گئی نئی پابندیوں کا خاتمہ لازمی ہے۔

ایرانی ترجمان کے مطابق اسلام آباد میں مفاہمتی یادداشت کے بعد پیدا ہونے والی صورتحال کے تناظر میں بعض نکات ایران کے پیش نظر ہیں، جبکہ زیرِ غور کچھ اضافی نکات بھی امریکا تک پہنچائے جائیں گے۔ 

ایران کا میزائلوں کی رینج اور رفتار بڑھانے کا فیصلہ، اپ گریڈیشن شروع

ایرانی فوج نے اپنے تمام میزائلوں کی رینج اور رفتار بڑھانے کا فیصلہ کرلیا ہے جبکہ میزائلوں کی جدید خطوط پر اپ گریڈیشن کا کام بھی شروع کردیا گیا ہے۔

ایرانی فوج کے ترجمان بریگیڈیئر جنرل محمد اکرمی نیا نے اپنے بیان میں کہا ہے کہ دشمن کی ایک ہزار کلومیٹر دور تک موجودگی کے پیش نظر میزائلوں کی مار کرنے کی صلاحیت بڑھانے کا فیصلہ کیا گیا ہے۔

انہوں نے کہا کہ ایران اور امریکا کے درمیان حالیہ جنگ کے دوران استعمال کیے گئے ایرانی میزائلوں نے مؤثر کارکردگی کا مظاہرہ کیا، جس کے بعد میزائلوں کی صلاحیتوں میں مزید اضافے کا فیصلہ کیا گیا ہے۔

ترجمان ایرانی فوج کے مطابق ایرانی بری فوج کے میزائلوں نے کویت میں دشمن کے فوجی اڈوں کو نشانہ بنایا، جبکہ ایرانی بحریہ کے سمندر سے داغے جانے والے کروز میزائلوں نے دشمن کے بحری جہازوں کو نشانہ بنانے میں کامیابی حاصل کی۔

جنرل محمد اکرمی نیا نے مزید کہا کہ مستقبل میں ایرانی میزائلوں کی رفتار، رینج اور ہدف کو نشانہ بنانے کی صلاحیت میں مزید اضافہ کیا جائے گا۔

ان کا کہنا تھا کہ میزائلوں کی اپ گریڈیشن کا عمل شروع ہوچکا ہے، جس کا مقصد ایران کی دفاعی صلاحیتوں کو مزید مضبوط بنانا ہے۔ 

امریکا شرائط مان لے تو آبنائے ہرمز ایک ہفتے میں کھول دیں گے: عباس عراقچی

ایران کے وزیر خارجہ عباس عراقچی نے کہا ہے کہ امریکا ایرانی شرائط تسلیم کرلے اور بحری ناکابندی ختم کردے تو آبنائے ہرمز ایک ہفتے کے اندر کھول دی جائے گی۔

عباس عراقچی نے اپنے بیان میں کہا کہ جنگ کے خاتمے کا واحد راستہ منصفانہ اور باوقار مذاکرات ہیں، جبکہ امریکا جنگ اور سفارت کاری دونوں محاذوں پر ناکام ہوچکا ہے۔

ایرانی وزیر خارجہ نے مزید کہا کہ ایران پر مزید پابندیاں عائد کرنے سے مسائل حل نہیں ہوں گے اور ایسے اقدامات سے کشیدگی میں کمی کے بجائے مزید اضافہ ہوسکتا ہے۔

انہوں نے خبردار کیا کہ اگر امریکا نے دوبارہ فوجی کارروائی کا راستہ اختیار کیا تو ایران پہلے سے کہیں زیادہ تیار ہے اور کسی بھی ممکنہ جارحیت کا مقابلہ کرنے کی صلاحیت رکھتا ہے۔

ایرانی وزارت خارجہ نے نئی امریکی تجاویز موصول ہونے کی تصدیق کردی

ایرانی وزارت خارجہ کے ترجمان اسماعیل بقائی نےنئی امریکی تجاویز موصول ہونے کی تصدیق کردی۔

ایرانی وزارت خارجہ کےترجمان اسماعیل بقائی نے پریس بریفنگ میں کہاکہ امریکا کی نئی تجویز سابقہ تجاویز سے ملتی جلتی ہے اوراس میں بنیادی توجہ جوہری معاملے پر ہے، جبکہ تہران چاہتا ہےکہ بات چیت میں آبنائےہرمز پر توجہ مرکوز کی جائے، تہران امریکی تجویز کا جواب پہلے ہی دے چکا ہے جبکہ امریکا کو ابھی کچھ اضافی نکات سےبھی آگاہ کرنا باقی ہے۔

ترجمان ایرانی وزارت خارجہ نےکہا کہ علاقائی ممالک امریکا اور اسرائیل کا ساتھ دینے سے باز رہیں، آئندہ ایران کےخلاف جہاں سےجارحیت ہوگی اس کا جواب پہلے سے مختلف ہوگا، وزیر خارجہ سمیت چھ رکنی کمیٹی مذاکرات کےمعاملے کی نگرانی کر رہی ہے۔

اسلام آباد مفاہمت کی 7 شرائط پوری ہونے تک آبنائے ہرمز نہیں کھولی جائے گی: قالیباف

ایرانی پارلیمنٹ کے سپیکر محمد باقر قالیباف نے کہا ہے کہ امریکا نے حال ہی میں ثالثوں کے ذریعے ایران کو کچھ تجاویز پیش کی ہیں، جبکہ تہران کا کہنا ہے کہ اسلام آباد مفاہمت کی یادداشت میں طے کردہ سات شرائط پوری ہونے تک آبنائے ہرمز نہیں کھولی جائے گی۔

پارلیمنٹ کے اجلاس سے خطاب کرتے ہوئے چیف مذاکرات کار محمد باقر قالیباف نے امریکی تجاویز کی تفصیلات بتائے بغیر کہا کہ وقت ضائع کرنے اور یک طرفہ مطالبات مسلط کرنے کا دور ختم ہو چکا ہے۔

انہوں نے کہا کہ جب تک اسلام آباد مفاہمت کی یادداشت کی بنیاد پر ہماری سات شرائط پوری نہیں کی جاتیں، آبنائے ہرمز نہیں کھولی جائے گی۔

باقر قالیباف اسلام آباد میں ہونے والے مذاکرات میں ایران کے اعلیٰ مذاکرات کار تھے، انہوں نے کہا کہ ایران نہ پرجوش ہے اور نہ خوف زدہ بلکہ ’ایک طرف لڑ بھی رہا ہے اور دوسری طرف مذاکرات بھی کر رہا ہے۔

انہوں نے کہا کہ ایران اپنی پوری طاقت کے ساتھ فوجی محاذ پر موجود ہے اور نئی حیران کن کارروائیوں کے ذریعے دشمن کا مقابلہ کرے گا، جبکہ سفارت کاری کے ذریعے بھی فوجی میدان میں اپنی برتری قائم کرنے اور ایرانی عوام کے حقوق منوانے کی کوشش جاری رکھے گا۔

امریکی حکام کے متضاد بیانات کا حوالہ دیتے ہوئے قالیباف نے کہا کہ اسلامی جمہوریہ ایران اپنی مجموعی پالیسی اور قومی سلامتی کا فیصلہ امریکی حکام کی سوشل میڈیا پوسٹس یا روزانہ دیے جانے والے انٹرویوز کی بنیاد پر نہیں کرتا۔

انہوں نے کہا کہ ایران اپنے اقدامات کا فیصلہ دشمن کے حقیقی رویے اور عملی اقدامات کو دیکھتے ہوئے کرتا ہے، نہ کہ میڈیا میں ہونے والی بیان بازی کی بنیاد پر کرتا ہے۔

ملک بھر میں 257 کارروائیوں میں 700 حوثی جنگجو مارے گئے: یمنی فوج

یمنی فوج نے کہا ہے کہ اس نے کئی محاذوں پر 257 کارروائیوں میں کم از کم 700 حوثی جنگجوؤں کو ہلاک کیا ہے۔

سوشل میڈیا پر ایک بیان میں فوجی ترجمان کرنل ماجد النزیلی نے کہا کہ حکومتی فورسز نے جنگی طیاروں، ڈرونز، توپ خانے، میزائلوں اور راکٹ لانچروں کا استعمال کرتے ہوئے کارروائیاں کیں۔

انہوں نے مزید کہا کہ آپریشن میں صنعاء، میدی، باقم اور الجوف، ماریب، البیضاء اور لحج کے محاذوں کا احاطہ کیا گیا، جس میں اہم آپریشنل کوششیں تائیز کے محاذوں پر مرکوز تھیں۔

اہداف میں کمانڈ اینڈ کنٹرول سینٹرز، فوجیوں کی تعداد، جنگی سازوسامان اور ذخائر، ہتھیاروں اور گولہ بارود کے ڈپو، اور فوجی سپلائی کے راستے اور نقل و حمل شامل تھے۔

ترجمان نے بتایا کہ میدان جنگ کے ابتدائی تخمینوں کے مطابق، کارروائیوں نے کم از کم 700 حوثی جنگجوؤں کو ہلاک کر دیا اور 170 جنگی گاڑیوں اور اثاثوں کے ساتھ تزویراتی اور اعلیٰ قیمت والے فوجی اہداف کو تباہ کر دیا۔

یمن کی حکومتی افواج کے ملک بھر میں حوثی اہداف پر حملے

یمن کی حکومتی افواج نے کہا ہے کہ انہوں نے ملک بھر میں حوثی باغیوں کے ٹھکانوں کو نشانہ بنایا ہے، جس سے دنیا کے غریب ترین ممالک میں شمار ہونے والے یمن اور وسیع خطے کو اپنی لپیٹ میں لیے ہوئے تنازع مزید شدت اختیار کر گیا ہے۔

فوج کے ترجمان کرنل ماجد النزیلی نے بتایا کہ مسلح افواج نے دارالحکومت صنعا، شمال مغربی گورنری صعدہ اور جنوب مغربی علاقے تعز میں حوثیوں کے خلاف حملے کیے۔

یہ حملے اس وقت کیے گئے جب حوثیوں نے سعودی دارالحکومت کے قریب واقع ایک تیل کی تنصیب پر حملے کا دعویٰ کیا تھا۔ 

حوثیوں نے یہ الزام بھی عائد کیا کہ سعودی عرب نے صنعا پر درجنوں حملے کیے ہیں۔

موجودہ صورتحال ملک کے مشکل ترین حالات میں سے ایک ہے: محسن رضائی

ایران کی سپریم نیشنل سکیورٹی کونسل کے سیکرٹری محسن رضائی نے اعتراف کیا ہے کہ ایران کی موجودہ صورتحال ملک کے مشکل ترین حالات میں سے ایک ہے۔

ایرانی میڈیا کے مطابق محسن رضائی نے حکومت کے اقتصادی رابطہ مرکز کے اجلاس میں یہ بھی کہا کہ امریکا کے ساتھ مذاکرات کا عمل انتہائی سنجیدہ ہے۔

رپورٹس کے مطابق اس اجلاس میں وزیرِ جهادِ کشاورزی نے بنیادی اشیا کی فراہمی اور زرعی شعبے کی صورتحال پر بھی رپورٹ پیش کی اور کہا کہ موجودہ حالات میں ملک کی ضرورت کی اشیا کی کوئی قلت نہیں ہے۔

امریکی پابندیوں میں اضافے کے ساتھ ایرانی معیشت پر دباؤ بڑھتا جا رہا ہے، جس کے باعث ایرانی مارکیٹ میں غیر ملکی کرنسیوں کی قیمتوں میں نمایاں اضافہ ہوا ہے۔

ایران اپنے لیے مشکل یا آسان راستہ اختیار کر سکتا ہے: ٹرمپ

امریکی صدر ڈونلڈ ٹرمپ نے کہا ہے کہ ایران اور امریکا کے درمیان تنازع مشکل راستے یا آسان راستے سے حل ہو سکتا ہے۔

امریکی صدر ڈونلڈ ٹرمپ نے اوہائیو کے شہر وینڈالیا میں ایک ریلی میں شرکت کے لیے وائٹ ہاؤس سے روانہ ہوتے ہوئے صحافیوں سے بات کرتے ہوئے کہا کہ ایران کے بارے میں مجھے ایک فیصلہ کرنا ہے، ہم تیل کی قیمتیں کم کرنے میں کامیاب ہوگئے،عالمی منڈی میں تیل کی قیمتوں میں کمی آرہی ہے۔

انہوں نے یہ بھی کہا کہ امریکی اقدامات اور کارروائیوں کے نتیجے میں ایران شدید کمزور ہو چکا ہے اور اس نے جوہری ہتھیار حاصل کرنے کے تقریباً تمام منصوبے ترک کر دیے ہیں۔

دوسری جانب رائٹرز نے دعوی کیا ہے کہ امریکی حملے دوبارہ شروع ہوئے تو ایران زیادہ سخت جوابی کارروائی کی تیاری کررہا ہے، جس پر ایرانی حکام نے ردعمل دیتے ہوئے کہاکہ امریکا نے بڑے پیمانے پرحملے کیے تو جواب پہلے سےزیادہ شدید ہوگا، امریکی فوجی کارروائیوں کی حمایت کرنے والے ممالک کو ممکنہ ہدف بنانے کی منصوبہ بندی کی جائے گی۔

امریکی وزیر جنگ پیٹ ہیگستھ نے کہا کہ ایران کے پاس جوہری پروگرام رضاکارانہ ترک کرنے کا موقع ہے، جوہری پروگرام ترک نہ کیا تو اسے مجبور کرنا پڑسکتا ہے، ایران کومذاکرات کےذریعےمسئلہ حل کرنے کے تمام مواقع دیے۔

خیال رہے کہ ایران مسلسل جوہری ہتھیار حاصل کرنے کی کسی بھی کوشش کی تردید کرتا رہا ہے۔

سعودی و یمنی افواج نے حوثیوں کیخلاف فوجی کارروائی کا منصوبہ بنا لیا

غیر ملکی خبر ایجنسی کے مطابق منصوبے کے تحت باب المندب کے ارد گرد کے علاقے پر محدود حملے، البیضا، مارب، تعز اور الجوف کے صوبوں میں متعدد محاذوں پر بڑے حملے کیے جائیں گے۔

سعودی عرب کی نگرانی میں ایک لاکھ سے زائد یمنی فوجی زمین پر پیش قدمی کریں گے جبکہ سعودی فضائیہ حملے کرے گی، یہ کارروائی آنے والے چند ہفتوں میں شروع ہو سکتی ہے۔

اس کارروائی کا مقصد باب المندب آبنائے اور بحیرہ احمر کے اہم شپنگ روٹ کو حوثیوں سے واپس لینا ہے، امریکا پہلے ہی یمن میں سعودی کارروائیوں کیلئے انٹیلی جنس فراہم کر رہا ہے۔

اس کے علاوہ خطے کے بعض ممالک اور یورپی ممالک سعودی عرب کو زیادہ تر دفاعی نوعیت کی فوجی امداد دے رہے ہیں، تاہم سعودی اتحادیوں کی اس کارروائی میں براہ راست کردار ادا کرنے کی توقع نہیں ہے۔

مقبوضہ مغربی کنارے کا پورا علاقہ اسرائیل کا ہے، اتمار بن گویر

اسرائیل کے انتہا پسند وزیر اتمار بن گویر نے کہا ہے کہ مقبوضہ مغربی کنارے کا پورا علاقہ اسرائیل کا ہے۔

اسرائیلی میڈیا کے مطابق اتمار بن گویر نے یہ بھی عزم ظاہر کیا ہے کہ اگر وہ وزیر دفاع بنے تو فلسطینی اتھارٹی کو ختم کرنے اور فلسطینیوں کو وہاں سے منتقل کرنے کی کوشش کریں گے۔

رپورٹس کے مطابق انتہا پسند اسرائیلی وزیر کا مزید کہنا تھا کہ پوری زمین ہماری ہے، وزیر دفاع بنا تو اس معاملے پر پوری توجہ دوں گا۔

ایرانی بیلسٹک میزائلوں کا خوف، امریکی افواج آبنائے ہرمز سے 500 کلومیٹر دور چلی گئیں: ایرانی کمانڈر

ایرانی پاسداران انقلاب کے نائب کمانڈر میجر جنرل مصطفیٰ ایزدی نے دعویٰ کیا ہے کہ امریکی افواج ایران کے بیلسٹک میزائلوں کے خوف کے باعث خلیج فارس اور بحیرہ عمان سے 500 کلومیٹر سے زیادہ دور چلی گئی ہیں۔

ایرانی میڈیا کے مطابق میجر جنرل مصطفیٰ ایزدی نے اپنے بیان میں کہا کہ امریکی افواج نے ایران کے پانیوں سے 500 کلومیٹر سے زیادہ فاصلے پر اپنی پوزیشنیں قائم کرلی ہیں، جبکہ موجودہ صورتحال کے پیش نظر واشنگٹن کی افواج مزید پیچھے ہٹ سکتی ہیں۔

ایرانی کمانڈر کا کہنا تھا کہ خطے کے ممالک اب اس نتیجے پر پہنچ رہے ہیں کہ امریکی فوجی موجودگی سکیورٹی فراہم کرنے کے بجائے عدم تحفظ کا باعث بنتی ہے۔

انہوں نے مزید کہا کہ ایرانی مسلح افواج نے حالیہ تنازعات کے دوران اپنی تیاری اور صلاحیتوں میں اضافہ کیا ہے۔

ایران کے پاس ایسا کوئی نہیں ہے جس سے مذاکرات کیے جائیں: ٹرمپ

امریکی صدر ڈونلڈ ٹرمپ نے ایک بار پھر ایران کے ساتھ جنگ بہت جلد ختم ہونے کا دعویٰ کر دیا۔

انہوں نے کہا ہے کہ ایران جنگ بہت جلد، ممکنہ طور پر انتخابات کے فوراً بعد ختم ہو سکتی ہے، تاہم ایران کو جوہری ہتھیار حاصل کرنے کی اجازت نہیں دی جانی چاہیے۔

امریکی ریاست الاباما کے ساحلی شہر موبائل میں انتخابی ریلی سے خطاب کرتے ہوئے ٹرمپ نے سوال اٹھایا کہ واشنگٹن تہران میں آخر کس سے مذاکرات کرے؟ ان کے پاس ایسا کوئی نہیں ہے جس کے ساتھ معاملات طے کیے جائیں۔

صدر ٹرمپ نے یہ دعویٰ بھی کیا کہ ایران کے پاس بحریہ، فضائیہ، ریڈار یا طیارہ شکن دفاعی نظام موجود نہیں، تقریباً 310 فیصد افراطِ زر کے باعث ایرانی معیشت بھی شدید مشکلات کا شکار ہے۔

امریکی صدر نے آبنائے ہرمز کی امریکی بحری ناکہ بندی کو فولادی دیوار قرار دیا اور کہا کہ جنگ ختم ہوتے ہی تیل کی قیمتوں میں نمایاں کمی آئے گی، انہوں نے کہا کہ امریکا جلد ہی اپنے اسٹریٹجک پیٹرولیم ریزرو میں دوبارہ تیل ذخیرہ کرنا شروع کر دے گا۔

واضح رہے کہ صدر ٹرمپ متعدد مرتبہ کہہ چکے ہیں کہ یہ تنازع نومبر کے وسط مدتی انتخابات کے دوران یا ان کے فوراً بعد ختم ہو سکتا ہے۔

یکم اکتوبر کو صحافیوں سے گفتگو میں بھی ٹرمپ نے کہا تھا کہ ایران اچھی حالت میں نہیں ہے اور یہ جنگ زیادہ طویل عرصے نہیں چلے گی۔

ادھر وائٹ ہاؤس کی جانب سے بھی تہران پر دباؤ برقرار رکھنے کے اشارے دیے جاتے رہے ہیں، جبکہ ٹرمپ ایران کی تازہ امن تجویز کو ناکافی قرار دے کر مسترد کر چکے ہیں۔

ایران جنگ اور یمن تنازع، کیمپ ڈیوڈ میں ٹرمپ کے اہم وزراء کا اجلاس

امریکی ویب سائٹ ایگزیوس کی رپورٹ کے مطابق امریکی صدر کے اہم کابینہ ارکان نے کیمپ ڈیوڈ میں کئی گھنٹے تک اہم اجلاس کیا، ایران جنگ،سعودی عرب اور حوثی ملیشیا کے تنازع کی صورتحال پر غور کیا گیا۔

ایگزیوس کے مطابق امریکی نائب صدر جے ڈی وینس نے اجلاس کی صدارت کی، وزیر خارجہ مارکو روبیو،وزیر دفاع پیٹ ہیگستھ اور خصوصی ایلچی اسٹیو وٹکوف شریک تھے۔

سی آئی اے ڈائریکٹر جان ریٹکلف اور چیئرمین جوائنٹ چیفس آف اسٹاف جنرل ڈین کین بھی اجلاس میں موجود تھے، مشرق وسطیٰ کی صورتحال پر اہم فیصلوں اور اقدامات پر تفصیلی غور کیا گیا۔

ایران نے حوثیوں سے لاتعلقی کا اظہار کردیا

ایران نے یمن کے حوثی گروپ سے متعلق واضح کیا ہے کہ وہ حوثیوں کے اقدامات کا براہِ راست فریق نہیں، جبکہ ایرانی وزیر خارجہ عباس عراقچی نے حوثیوں کے خلاف حملوں کے بجائے سیاسی رابطوں کے ذریعے معاملہ حل کرنے کی تجویز دی ہے۔

ایرانی وزیر خارجہ عباس عراقچی کی جانب سے یہ تجویز ایسے وقت میں سامنے آئی ہے جب خطے میں حوثیوں سے متعلق کشیدگی اور ان کے خلاف ممکنہ فوجی کارروائیوں پر بات چیت جاری ہے۔

 عباس عراقچی نے مؤقف اختیار کیا ہے کہ حوثیوں پر حملوں کے بجائے سیاسی رابطوں اور سفارتی ذرائع کو استعمال کیا جانا چاہیے تاکہ کشیدگی کو مزید بڑھنے سے روکا جاسکے۔

ایرانی تجویز پر حتمی فیصلہ سٹریٹجک پولیٹیکل اینڈ ڈیفنس کمیٹی کرے گی] یہ فیصلہ متعلقہ فریقوں کے درمیان موجود دفاعی معاہدے کے تحت کیا جائے گا۔

ایران کی جانب سے حوثیوں سے لاتعلقی کا اظہار اس معاملے میں تہران کے مؤقف کی اہمیت کو مزید بڑھا دیتا ہے، تاہم حتمی پالیسی اور آئندہ کے اقدامات کا فیصلہ متعلقہ کمیٹی کی منظوری کے بعد ہی ہوگا۔

عالمی توانائی ایجنسی کا ذخائر میں سے 10 کروڑ بیرل تیل مارکیٹ میں ریلیز کرنے کا فیصلہ

عالمی توانائی ایجنسی کے ایگزیکٹو ڈائریکٹر فاتح بیرول نے 10 کروڑ بیرل تیل مارکیٹ میں ریلیز کرنے کے فیصلے کی تصدیق کردی۔

فاتح بیرول نے کہا کہ جی سیون ممالک نے ہنگامی ذخائر سے خام تیل اور ڈیزل جاری کرنے پر اتفاق کیا ہے، فیصلہ ایران جنگ کے باعث ایندھن کی بڑھتی قیمتوں کو کم کرنے کی کوششوں کے تحت کیا گیا۔

انہوں نے کہا کہ تیل ذخائر جاری کرنے کا فیصلہ جی سیون ممالک کے رہنماؤں کے ساتھ میٹنگ کے بعد کیا گیا، اجلاس میں امریکی صدر ٹرمپ، فرانسیسی صدر ایمانوئل میکرون اور دیگر رہنما شریک تھے۔

حوثیوں کی جانب سے خمیس مشیط کی طرف داغے گئے 3 بیلسٹک میزائل تباہ

یمن میں آئینی حکومت کی بحالی کے لیے سعودی قیادت میں قائم فوجی اتحاد نے اعلان کیا ہے کہ اس نے حوثیوں کی جانب سے سعودی عرب کے جنوبی شہر خمیس مشیط کی طرف داغے گئے 3 بیلسٹک میزائلوں کو فضا ہی تباہ کر دیا۔

یمنی فوج کی 474 کارروائیاں، 1540 حوثی جنگجو ہلاک و زخمی

 یمنی فوج کا کہنا ہے کہ اس نے گزشتہ 24 گھنٹوں کے دوران متعدد محاذوں پر 474 کارروائیاں کیں، جن کے نتیجے میں 1,540 حوثی جنگجو ہلاک یا زخمی ہوئے۔

یمن کی فوج نے کہا ہے کہ سب سے زیادہ ہلاکتیں تعز میں رپورٹ کی گئی ہیں۔

آبنائے ہرمز سے باہر نکلنے کے راستے پر گامزن آئل ٹینکر پر میزائل حملہ

برطانیہ کی تنظیم میری ٹائم ٹریڈ آپریشنز نے کہا ہے کہ آبنائے ہرمز سے باہر نکلنے کے راستے پر گامزن ایک آئل ٹینکر پر میزائل حملہ کیا گیا۔

ادارے کے مطابق اس حملے کے نتیجے میں جہاز پر معمولی آگ بھڑک اٹھی اور اس کی بجلی بھی منقطع ہو گئی، تاہم بیان میں کہا گیا ہے کہ آگ پر قابو پا لیا گیا ہے۔

میری ٹائم ٹریڈ آپریشنز کے مطابق واقعے میں عملے کے کسی رکن کے زخمی ہونے یا تیل کے لیک ہونے سے ماحولیات کو نقصان پہنچنے کی کوئی اطلاع موصول نہیں ہوئی۔

اب تحمل کی پالیسی مزید برقرار نہیں رکھی جا سکتی، شہزادہ ترکی الفیصل

سابق سربراہ سعودی انٹیلی جنس شہزادہ ترکی الفیصل نے کہا ہے کہ اب تحمل کی پالیسی مزید برقرار نہیں رکھی جا سکتی۔

اپنے بیان میں سابق سربراہ سعودی انٹیلی جنس نے کہا کہ سعودی عرب کا تحمل اس کی تمام پالیسیوں کا بنیادی جزو رہا ہے، تحمل اور ضبط سعودی پالیسی کی نمایاں خصوصیات ہیں، لیکن اب یہ رویہ مزید کارگر نہیں۔

ان کا کہنا تھا کہ حوثیوں نے سعودی عرب پر گولہ باری کی، ایران بھی حملے کر چکا، خلیجی ریاستوں میں امریکی فوج کی موجودگی کی اہمیت پر غور کرنے کی ضرورت ہے۔

یورپی ممالک بھاری مقدار میں ڈیزل جاری کرنے پر تیار ہوگئے: صدر ٹرمپ کا دعویٰ

امریکی صدر ڈونلڈ ٹرمپ نے کہا کہ یورپی ملک اپنے ڈیزل کے ذخائر سے بھاری مقدارجاری کرنے پر تیار ہوگئے ہیں۔

امریکی صدر ڈونلڈ ٹرمپ نے دعویٰ کیا کہ یورپ سے ڈیزل کی فراہمی فوری شروع کر دی جائے گی، ڈونلڈ ٹرمپ نے یورپی ممالک کو دھمکی دی تھی کہ ڈیزل ریلیز نہ کیا تو امریکا ان کو ڈیزل کی سپلائی روک دے گا۔

صدر ٹرمپ کا مزید کہنا تھا جنوبی کوریا کیساتھ معاہدہ مستقبل میں امریکی توانائی کے تحفظ کو مضبوط کرے گا، جنوبی کوریا کیساتھ 8.4 ارب ڈالر کا آئل ریکوری منصوبہ طے پایا ہے۔

واضح رہے کہ فرانسیسی صدر کا بھی کہنا تھا کہ جی7 ممالک اگلے 4 ماہ میں 10 کروڑ بیرل ڈیزل اور خام تیل کی سپلائی پر راضی ہوگئے ہیں۔

ایران کے تنازع کے باعث دنیا بھر میں ایندھن کی قیمتیں انتہا کو چھو رہی ہیں، برطانیہ میں بھی ڈیزل کی قیمت پہلی بار ریکارڈ 2 پاؤنڈ فی لٹر پر پہنچ چکی ہے۔

محسن رضائی نے ٹرمپ کے ایران کیخلاف جنگ میں فتح کے دعوؤں کو مسترد کر دیا

ایرانی سپریم نیشنل سکیورٹی کونسل کے سیکرٹری محسن رضائی نے امریکی صدر ڈونلڈ ٹرمپ کے ایران کے خلاف جنگ میں فتح کے دعوؤں کو مسترد کر دیا۔

ایرانی سپریم نیشنل سکیورٹی کونسل کے سیکرٹری محسن رضائی نے کہا کہ محض دعوے کرنے سے حقیقت تبدیل نہیں ہوتی بلکہ زمینی صورتحال ایران کے عوام، فوج اور میزائلوں سے تشکیل پا رہی ہے۔

سماجی رابطے کی ویب سائٹ ایکس پر جاری اپنے بیان میں کہا ایک ناکامی کے بعد دوسری ناکامی کے باوجود امریکی تاریخ کا بدترین صدر صرف باتیں کیے جا رہا ہے اور اب اس کے الفاظ اس کے اپنے تصورات سے بھی آگے نکل گئے ہیں۔

انہوں نے کہا کہ آپ اپنی خیالی دنیا میں ہر روز فتح حاصل کر سکتے ہیں لیکن حقیقت ایران کے عوام، اس کے فوجیوں اور اس کے میزائلوں سے تشکیل پاتی ہے۔

پاسداران انقلاب کا چابہار بندرگاہ کے قریب مبینہ دہشت گرد سیل تباہ کرنے کا دعویٰ

 پاسداران انقلاب نے چابہار بندرگاہ کے قریب مبینہ دہشت گرد سیل تباہ کرنے کا دعویٰ کر دیا۔

پاسدارانِ انقلاب کے مطابق کامیاب آپریشن میں کم ازکم 2 دہشت گرد مارے گئے، فرار ہونے والے دہشت گردوں کا تعاقب کیا جارہا ہے۔

دہشت گردوں کی پناہ گاہ سے بھاری مقدار میں اسلحہ، گولہ بارود اور ایک ’اسٹار لنک‘ سیٹلائٹ انٹرنیٹ ڈیوائس بھی برآمد کی گئی۔
 

حماس کی مالی معاونت کا الزام: امریکا نے 5 افراد اور اداروں پر پابندیاں عائد کردیں

حماس کی مالی معاونت کے الزام میں امریکا نے5افراد اوراداروں پرپابندیاں عائد کردیں۔

امریکی محکمہ خزانہ کے مطابق 2020ء سے 2026ء تک حماس کو20 لاکھ ڈالرسے زائد منتقل کئے گئے، حماس کی فنڈنگ میں کرپٹوکرنسی اورجعلی ادارے استعمال ہوئے۔

فرانس میں قائم 2 مبینہ جعلی خیراتی اداروں پرامریکی پابندی عائد کی گئی، نامزد افراد اور اداروں کے امریکا میں اثاثے منجمد کر دیئے گئے۔

یہودی کمیونٹی کو نشانہ بنانے کی سازش کا الزام، برطانیہ میں 2 ایرانی شہریوں پر فرد جرم عائد

برطانوی پولیس کے مطابق رحمان صالحی اور سلام احمدیان پر دہشت گردی کی سازش کا الزام ہے، دونوں افراد مبینہ طور پر ایران میں موجود ممکنہ تیسرے فریق سے رابطے میں تھے، گزشتہ ہفتے مانچسٹر میں یہودی برادری کو نشانہ بنانے کی سازش ناکام بنائی گئی تھی۔۔

سینئر کو آرڈینیٹر برطانوی انسداد دہشت گردی پولیس کا کہنا ہے کہ ملزمان پر الزامات انتہائی سنگین ہیں، گرفتار ملزمان شمالی انگلینڈ میں یوم کپور کی شام یہودی کمیونٹی کو نشانہ بنانے کی تیاری کر رہے تھے۔

ایران امریکا جنگ: یورو زون میں مہنگائی 3 سال کی بلند ترین سطح پر پہنچ گئی

اسرائیل اور امریکا کی جانب سے جنگ مسلط کرنے کے جواب میں ایران نے مارچ سے آبنائے ہرمز کو بند کر رکھا ہے جو تیل و گیس کی اہم آبی گزرگاہ ہے، اس کی بندش سے ایندھن کی قلت اور قیمتوں میں ہوشربا اضافہ ہوا ہے۔

عالمی خبر رساں ادارے کے مطابق یورو کرنسی استعمال کرنے والے 21 ممالک میں مہنگائی کی شرح ستمبر میں بڑھ کر 3.8 فیصد ہوگئی جو تین سال کے دوران بلند ترین سطح ہے جس کی وجہ ایندھن کی قیمتوں میں مسلسل اضافہ ہے۔

یورپی یونین کے اعداد و شمار کے ادارے کے مطابق اگست میں یورو زون میں مہنگائی کی شرح 3.2 فیصد تھی جو ایک ماہ کے دوران نمایاں اضافے کو ظاہر کرتی ہے۔ ستمبر کی شرح ماہرین اقتصادیات کی 3.7 فیصد کی پیش گوئی سے بھی زیادہ رہی۔

ایندھن کی قیمتوں میں سالانہ بنیاد پر 18.8 فیصد اضافہ ہوا ہے جبکہ اگست میں یہ اضافہ 14.3 فیصد تھا جس سے خوراک اور مشروبات کی قیمتوں میں اضافے کی شرح بھی 1.1 فیصد سے بڑھ کر 1.4 فیصد ہوگئی۔

ایران سے ممکنہ جنگ کا خدشہ، امریکا نے خلیجی ممالک میں دفاعی نظام بڑھا دیا

 امریکا نے سعودی عرب اور قطر میں مزید دو پیٹریاٹ میزائل دفاعی بیٹریاں تعینات کردیں۔

امریکی خبر رساں ادارے ایکسیوس کے مطابق دو امریکی حکام اور ایک علاقائی ذریعے نے بتایا کہ نئی تعیناتیوں کا مقصد دونوں خلیجی ممالک کی اہم توانائی تنصیبات کو ممکنہ حملوں سے محفوظ بنانا ہے۔

رپورٹ کے مطابق ایک پیٹریاٹ بیٹری گزشتہ ماہ سعودی عرب بھیجی گئی، جہاں اسے ایک اہم تیل تنصیب کے دفاع کے لیے تعینات کیا گیا ہے، جبکہ دوسری بیٹری قطر پہنچائی گئی ہے تاکہ قدرتی گیس کی ایک اہم تنصیب کی حفاظت کی جاسکے۔

ایکسیوس کے مطابق امریکا کا اس اقدام کے ذریعے سعودی عرب اور قطر کو یہ یقین دلانا بھی مقصد ہے کہ اگر ایران کے خلاف بڑے پیمانے پر فوجی کارروائیاں دوبارہ شروع ہوئیں تو واشنگٹن ان کے اہم تیل اور گیس کے بنیادی ڈھانچے کے تحفظ میں مدد فراہم کرے گا۔

رپورٹ میں بتایا گیا ہے کہ سعودی عرب اور قطر کی قیادت اس سے قبل ایران کے خلاف ممکنہ فوجی کارروائیوں پر تشویش ظاہر کرچکی ہے، کیونکہ ایسی کارروائیوں کے نتیجے میں ان کی اپنی توانائی تنصیبات بھی جوابی حملوں کی زد میں آسکتی ہیں۔ 

اماراتی پائلٹ کو متحدہ عرب امارات کے حوالے کردیا گیا

سعودی عرب نے اماراتی ایئر لائن کے شریک پائلٹ کو متحدہ عرب امارات کے حوالے کردیا۔

دبئی سے تل ابیب جانے والی پرواز کے کو پائلٹ پر کپتان کو چاقو مارنے کا الزام ہے، حملے کے بعد طیارے کو سعودی شہر تبوک میں ہنگامی لینڈنگ کروائی گئی تھی۔

معاہدہ کرنا ہے یا نہیں، گیند امریکا کے کورٹ میں ہے، سعید خطیب زادہ

ایرانی نائب وزیر خارجہ سعید خطیب زادہ نے روسی ٹی وی کو انٹرویو میں کہا ہے کہ ایرانی تجاویز سے متعلق امریکی جواب پر ابتدائی ردعمل دے دیا ہے، قطر اور پاکستان سمیت ثالثوں کے ذریعے امریکا کو اپنی تجاویز پیش کیں۔

سعید خطیب زادہ نے کہا کہ معاہدہ کرنا ہے یا نہیں، گیند امریکا کے کورٹ میں ہے، تہران کو واشنگٹن پر اعتماد نہیں ہے، موجودہ امریکی انتظامیہ پر اعتماد نہ کرنے کی بہت سی وجوہات ہیں، ایران تمام محاذوں پر جنگ بندی کے لیے ٹھوس ضمانتوں کا خواہاں ہے۔

انہوں نے کہا کہ ایرانی تجاویز میں منجمد اثاثوں کی رہائی اور بحری و اقتصادی ناکہ بندی کے خاتمے کی ضمانتیں بھی شامل ہیں، امریکا اپنی تمام ذمہ داریاں پوری کرے تو آبنائے ہرمز دوبارہ کھول سکتے ہیں۔

ویٹو کے باوجود ایران پر اقوامِ متحدہ کی پابندیاں برقرار ہیں: برطانیہ

اقوامِ متحدہ میں برطانوی سفیر سارہ میکانٹوش نے کہا ہے کہ ایرانی جوہری پھیلاؤ سے متعلق اقوام متحدہ کی پابندیاں مکمل طور پر نافذ العمل ہیں۔

ان کا کہنا ہے کہ 2 ویٹو کے باعث ان پابندیوں پر عمل درآمد کی نگرانی کرنے والے اقوامِ متحدہ کے پینل کا مینڈیٹ ختم ہو گیا ہے اور تمام رکن ممالک پر ان کی پابندی لازم ہے۔

سارہ میکانٹوش نے کہا ہے کہ سلامتی کونسل کے 2 مستقل ارکان کی جانب سے ویٹو کیے جانے کے نتیجے میں ایران سے متعلق ماہرین کا پینل مزید کام نہیں کرے گا، جس سے پابندیوں پر عمل درآمد اور ان سے بچنے کی کوششوں کی نگرانی مزید مشکل ہو جائے گی۔

انہوں نے کہا کہ ایران نے 60 فیصد تک افزودہ یورینیئم 400 کلو گرام سے زیادہ مقدار میں ذخیرہ کر رکھی ہے، جبکہ بین الاقوامی جوہری توانائی ایجنسی (آئی اے ای اے) تہران کے افزودہ یورینیئم کے ذخیرے کی مقدار، نوعیت یا مقام کی تصدیق کرنے سے قاصر رہی ہے۔

پاکستان کی مدینہ پاور سٹیشن پر حوثی حملے کی مذمت، سعودیہ سے مکمل اظہارِ یکجہتی

پاکستان کی وزارت خارجہ نے کہا ہے کہ پاکستان مدینہ پاور سٹیشن پر حوثی ملیشیا کے حملہ کی شدید مذمت کرتا ہے اور سعودی عرب سے مکمل اظہارِ یکجہتی کرتا ہے۔

وزارت خارجہ کے مطابق حوثی ملیشیا نے 29 ستمبر کو ترسیل سٹیشن پر حملہ کیا، نبی پاک ﷺ کی مسجد کو بجلی فراہمی کے سول نظام پر حملہ ناقابل قبول ہے، حملہ سے کروڑوں مسلمانوں کے جذبات مجروح ہوئے۔

ترجمان دفتر خارجہ نے کہا کہ دو مقدس مقامات اوروہاں موجود عازمین کی حفاظت اور احترام ہر حال میں لازم ہے، پاکستان ایسے حملے فوری اور غیر مشروط روکنے کا مطالبہ کرتا ہے، ایسے حملے خطے کی سلامتی اور امن کے لیے بڑا خطرہ ہیں۔

دفتر خارجہ کی جانب سے جاری بیان میں کہا گیا کہ پاکستان سعودی عرب کی یکجہتی کی غیر متزلزل حمایت کے عزم کا اعادہ کرتا ہے، پاکستان سعودی عرب کی خودمختاری،علاقائی یکجہتی اور تقدس کی مکمل حمایت کرتا ہے۔

ترجمان کے مطابق پاکستان دونوں مقدس مساجد کے تحفظ، عوام کی حفاظت اور عازمین کے تحفظ کے لیے سعودی عرب کی کوششوں کے ساتھ کھڑا ہے، پاکستان خطہ میں امن کے لیے کوشاں رہا ہے اور یہ کوششیں جاری رکھے گا۔

مدینہ پاور سٹیشن پر حوثی حملے کے بعد یمنی فوج کی دارالحکومت صنعا میں کارروائی

یمن کی فوج نے کہا ہے کہ سعودی عرب کے شہر مدینہ میں بجلی کی تنصیب پر حوثی ملیشیا کے ڈرون حملے کے چند گھنٹے بعد دارالحکومت صنعا سمیت مختلف علاقوں میں اہم اہداف کو نشانہ بنایا گیا ہے۔

یمن کے حوثی باغیوں نے مدینہ میں بجلی کے پاؤر سٹیشن کو ڈرون کے ذریعے نشانہ بنایا، جو مسجد نبوی کو بجلی فراہم کرنے والی تنصیبات میں شامل ہے، مملکت پر اس حملے کی متعدد اسلامی اور عرب ممالک کی جانب سے مذمت بھی کی گئی ہے۔

اتحادی افواج کے ترجمان میجر جنرل ترکی المالکی نے بتایا کہ طیبہ پاؤر سٹیشن کو 29 ستمبر کی صبح نشانہ بنایا گیا، تحقیقات سے یہ بات سامنے آئی کہ حوثی ملیشیا نے اس بزدلانہ دہشت گرد کارروائی کی منصوبہ بندی کی اور اسے عملی جامہ پہنایا۔

ترجمان نے مزید کہا کہ حکام نے حملے کے بعد آپریشنل جائزہ لیا اور ڈرون کے ملبے کا بھی معائنہ کیا تاکہ حملے کے ماخذ کی تصدیق کی جا سکے۔

ادھر یمنی فوج نے بتایا ہے کہ اس نے صنعا، صعدہ اور تعز میں حوثیوں کے متعدد مقامات کو نشانہ بنایا، صنعا میں اہم اہداف کے خلاف کارروائی کی گئی جبکہ صعدہ میں 11 اہداف کو نشانہ بنایا گیا۔

انہوں نے مزید بتایا کہ تعز میں حوثیوں کے ایک مربوط فوجی نظام پر 27 فضائی حملے کیے گئے۔

گزشتہ ماہ اتحادی افواج نے کہا تھا کہ حوثیوں کی جانب سے مکہ کی سمت بھیجا گیا ایک ڈرون شہر سے باہر مار گرایا گیا، جسے اتحادی افواج نے ریڈ لائن قرار دیا تھا۔

سنہ 2017 میں بھی سعودی فضائی دفاعی نظام نے یمن کے حوثی جنگجوؤں کی جانب سے مکہ کی طرف داغا گیا بیلسٹک میزائل فضا میں ہی تباہ کر دیا تھا۔

حوثی ملیشیا صنعا اور یمن کے بحیرۂ احمر کے ساحلی علاقوں کے ایک بڑے حصے پر کنٹرول رکھتی ہے، سعودی عرب کی جانب سے سنہ 2015 میں یمن کی خانہ جنگی میں بین الاقوامی سطح پر تسلیم شدہ حکومت کی حمایت میں مداخلت کے بعد سے حوثی بارہا سعودی عرب پر ڈرونز اور میزائلوں سے حملے کر چکے ہیں۔

اماراتی پرواز واقعہ میں ایران ملوث ہوا تو اسے بہت سخت نشانہ بنایا جائے گا: ٹرمپ

 امریکی صدر ڈونلڈ ٹرمپ نے دھمکی ہے کہ اگر ایران رواں ہفتے پیش آنے والے فلائی دبئی واقعہ سے منسلک پایا گیا تو تہران کو بہت سخت نشانہ بنایا جائے گا۔

امریکا کے صدر ڈونلڈ ٹرمپ نے اماراتی پرواز میں کپتان پر چاقو سے حملہ کرنے والے شریک پائلٹ کو ایران سےجوڑنے کی کوشش کی ہے، ٹرمپ نے کہا کہ انہیں صورتحال کے بارے میں بریفنگ دی گئی ہے اور مبینہ طور پر واقعہ میں ملوث پائلٹ کا ایران سے تعلق ہو سکتا ہے۔

اس سوال پر کہ آیا پاسداران انقلاب نے کوپائلٹ کو وہاں بھیجا تھا یا وہ خود ہی انتہاپسندی کا شکار ہوا تھا، صدر ٹرمپ نے کہا کہ یہ ممکن ہے، اگر ایران رواں ہفتے پیش آنے والے فلائی دبئی واقعہ سے منسلک پایا گیا تو فکر نہ کریں، ایران پر بہت سخت حملہ کیا جائے گا۔

اس سے پہلے اسرائیلی وزیراعظم نیتن یاہو نے کہا تھا کہ یہ کہنا قبل از وقت ہوگا کہ کوپائلٹ کا کسی طرح ایران سے تعلق ہے۔

تیل کی بڑھتی ہوئی قیمتوں کے حوالے سے ٹرمپ نے کہا کہ ایران کا معاملہ ختم ہوتے ہی تیل کی قیمتیں نیچے آنا شروع ہو جائیں گی، اور یہ معاملہ تقریباً ابھی ختم ہو چکا ہے، ہم آبنائے ہرمز سے جنگ سے پہلے کے مقابلے میں اب زیادہ تیل نکال رہے ہیں۔

ٹرمپ نے کہا کہ ایران یا تو ایک انتہائی منصفانہ معاہدے پر دستخط کرے گا یا پھر اس کا وجود مزید باقی نہیں رہے گا، ایران کا معاملہ کسی نہ کسی طرح جلد ختم ہو جائے گا۔

حوثی ملیشیا کے 2 میزائل، 4 ڈرونز فضا میں ہی تباہ کر دیئے: ترجمان اتحادی افواج

سعودی عرب نے تازہ حملے میں حوثی ملیشیا کے 2 میزائل اور 4 ڈرونز کو فضا میں ہی تباہ کر دیا ہے۔

اتحادی افواج کے ترجمان میجرجنرل ترکی المالکی کے مطابق سعودی دفاعی نظام نے جنوبی علاقوں خمیس مشیط اور جازان کے اوپر میزائل اور ڈرونز کو تباہ کیا۔

سعودی سول ڈیفنس کے مطابق ملبہ رہائشی علاقوں پر گرنے سے عمارتوں اور گاڑیوں کو نقصان پہنچا، امدادی کارروائیاں جاری ہیں۔

ٹرمپ کے ایرانی فوج کے مکمل تباہ ہونے کے بیان میں کوئی صداقت نہیں: مجید ابن رضا

ایران کے قائم مقام وزیر دفاع بریگیڈیئر جنرل مجید ابن رضا نے امریکی صدر ڈونلڈ ٹرمپ کے اس دعوے کو مسترد کیا ہے کہ ایران کی فوج مکمل طور پر تباہ ہوچکی ہے۔

ابن رضا نے کہا فرضی جنگی ڈرامے امریکی فوج کی تھکن اور جنگ کی بڑھتی لاگت کو چھپا نہیں سکتے، جنگ کے خلاف عوامی دباؤ، امریکی افواج کی تھکن اور بڑھتے اخراجات نے واشنگٹن کی حکمت عملی کو متاثر کیا ہے۔

ایرانی وزیر دفاع نے کہا دفاعی صنعت کی تباہی کے دعوے میدان جنگ میں ایران کی صلاحیت اور اقدام کو تبدیل نہیں کرسکتے۔

ایران میں غیر ملکی کرنسیوں کی قیمتوں میں ایک بار پھر ریکارڈ اضافہ

ایران میں غیر ملکی کرنسیوں کی قیمتوں میں ایک بار پھر اضافہ ریکارڈ کیا گیا اور ڈالر اپنی بڑھتی ہوئی قدر کے ساتھ دو لاکھ 60 ہزار تومان کے قریب پہنچ گیا۔

غیر ملکی کرنسیوں اور سونے کی لمحہ بہ لمحہ قیمتیں جاری کرنے والی ویب سائٹس کے مطابق دیگر غیر ملکی کرنسیوں کی قیمتوں میں بھی اضافہ ہوا ہے۔

یورو کی قدر چار ہزار تومان بڑھ گئی اور یہ دو لاکھ 90 ہزار تومان پر ٹریڈ ہوا، کرنسی کی قیمتوں میں یہ مسلسل اضافہ ایسے وقت میں سامنے آیا ہے جب ایران کے مرکزی بینک نے مارکیٹ میں دو ارب ڈالر مالیت کے نوٹ فراہم کرنے کے منصوبے کا اعلان کیا تھا۔

مرکزی بینک کے مطابق پہلے مرحلے میں ایک ارب ڈالر ملک بھر میں بینکوں کی منتخب شاخوں اور ایکسچینج کمپنیوں کے ذریعے مارکیٹ میں لائے جائیں گے، ایران کی قومی کرنسی کی قدر میں حالیہ ہفتوں کے دوران مزید کمی دیکھی گئی ہے۔

یہ صورتحال امریکا کے اقتصادی دباؤ کے منصوبے کے آغاز اور ایران کے خلاف جاری بحری محاصرے کے تناظر میں سامنے آئی ہے۔

پوری دنیا ایرانی قوم کی ہمت، بہادری اور استقامت پر حیران ہے: صدر پیوٹن

روسی صدر پیوٹن نے کہا کہ پوری دنیا ایرانی قوم کی ہمت، بہادری اور استقامت پر حیران ہے۔

روسی صدر پیوٹن نے ماسکو میں روس کے بین الاقوامی ماہرین کی تقریب سے خطاب کرتے ہوئے کہا کہ اگر کیلیننگز کو خطرہ ہوا تو روس اپنے ذخیرے میں موجود تمام اقسام کے ہتھیاروں کو استعمال کرنے پر غور کرے گا۔

صدر پیوٹن کا مزید کہنا ہے کہ بڑے پیمانے پر تباہی پھیلانے والے ہتھیاروں کے استعمال کو رد نہیں کیا جاسکتا۔

امریکا کا مشرق وسطیٰ میں 10 ہزار اضافی فوجی بھیجنے کا فیصلہ

امریکا نے ایران کے خلاف ممکنہ نئی کارروائیوں کے پیش نظر مشرق وسطی میں 10 ہزار اضافی فوجی بھیجنے کا فیصلہ کیا ہے۔

امریکی حکام کے مطابق بحری جہازوں کے گروپ میں 7 ہزار سے زائد سیلرز اور 2 ہزار سے زائد میرینز شامل ہیں جن میں یو ایس ایس تھیوڈور روزویلٹ کیریئر اسٹرائیک گروپ اور یو ایس ایس میکن آئی لینڈ ایمفی بیئس ریڈی نیس گروپ شامل ہیں۔

اس تعیناتی کے بعد اکتوبر کے آخر تک خطے میں تین امریکی طیارہ بردار بحری بیڑے موجود ہو سکتے ہیں، پہلے سے موجود امریکی اہلکاروں کو ملا کر خطے میں امریکی بحری موجودگی 20 ہزار سے زائد سیلرز اور میرینز اور سیکڑوں طیاروں تک پہنچ سکتی ہے۔

امریکی صدر ڈونلڈ ٹرمپ نے ایران پر نئی کارروائی کے امکان کو بھی رد نہیں کیا اور کہا ہے کہ 3 نومبر کے امریکی انتخابات کے بعد ایران میں بمباری بڑھانا ممکن ہے۔

ٹرمپ نے یہ بھی دعویٰ کیا تھا کہ اسرائیل جانے والی فلائی دبئی پرواز کے پائلٹ پر حملے کی کوشش کرنے والے معاون پائلٹ کے ایران سے تعلق کے ابتدائی شواہد موجود ہیں اور اگر تہران سے تعلق ثابت ہوا تو امریکا سخت جوابی کارروائی کرے گا۔

ٹرمپ نے ایران کی تازہ جنگ بندی تجویز بھی مسترد کرنے کا بتایا اور کہا کہ آبنائے ہرمز کھولنے کی پیشکش مجموعی طور پر کافی نہیں تھی۔

سعودی وزیر دفاع کے امریکی و فرانسیسی وزرائے دفاع سے رابطے، امن کیلئے اقدامات پر زور

سعودی وزیر دفاع شہزادہ خالد بن سلمان نے امریکا اور فرانسی کے وزرائے دفاع سے ٹیلی فونک رابطے کیے ہیں۔

خبر ایجنسی کے مطابق شہزادہ خالد بن سلمان نے امریکی وزیر دفاع پیٹ ہیگستھ سے سعودی امریکا دفاعی شراکت داری پر گفتگو کی، سعودی اور امریکی وزرائے دفاع کے درمیان علاقائی سلامتی اور استحکام پر بھی تبادلہ خیال ہوا۔

سعودی وزیر دفاع نے فرانسیسی وزیر مسلح افواج کیتھرین ووٹرین سے دفاعی تعاون پر گفتگو کی، خالد بن سلمان اور کیتھرین ووٹرین نے علاقائی سلامتی کو درپیش چیلنجز پر تبادلہ خیال کیا۔

رپورٹ میں بتایا گیا ہے کہ دوران گفتگو سعودی وزیر دفاع نے امریکی و فرانسیسی وزرائے دفاع پر عالمی امن و سلامتی کے تحفظ کے اقدامات پر زور دینے کا مطالبہ کیا۔

خلیجی ممالک کی مدینہ منورہ میں حوثی ڈرون حملے کی شدید مذمت

خلیجی ممالک نے مدینہ منورہ میں حوثی ڈرون حملے کی شدید مذمت کرتے ہوئے سعودی عرب سے مکمل یکجہتی کا اظہار کیا ہے۔

خلیج تعاون کونسل کے سیکرٹری جنرل جاسم محمد البدیوی نے کہا ہے کہ مسجد نبوی ﷺ کو بجلی فراہم کرنے والی شہری تنصیب کو نشانہ بنانا سنگین اشتعال انگیزی ہے۔

رپورٹس کے مطابق متحدہ عرب امارات، بحرین اور کویت نے مدینہ منورہ میں حوثی حملے کو سعودی عرب کی خودمختاری کی خلاف ورزی قرار دیا ہے۔

بحرین نے حوثیوں کے خلاف سلامتی کونسل سے سخت مؤقف اپنانے کا مطالبہ کیا ہے، جبکہ اردن نے سعودی عرب کی سلامتی اور علاقائی سالمیت کیلئے مکمل حمایت کا اعلان کیا ہے۔

مشرقِ وسطیٰ کشیدگی، عالمی منڈی میں تیل کی قیمتوں میں 4 فیصد سے زائد اضافہ

امریکا کی جانب سے مشرق وسطیٰ میں مزید فوجی بھیجنے کی اطلاعات کے بعد عالمی منڈی میں تیل کی قیمتوں میں 4 فیصد سے زائد اضافہ ہوگیا۔

خبر ایجنسی کے مطابق برطانوی خام تیل 102.31 ڈالر فی بیرل تک پہنچ گیا، جبکہ امریکی ڈبلیو ٹی آئی 92.87 ڈالر فی بیرل پر بند ہوا ہے۔

وال اسٹریٹ جرنل کے مطابق امریکا مشرق وسطیٰ میں مزید 10 ہزار فوجی تعینات کرنے کی تیاری میں ہے، جو یہ ظاہر کرتے ہیں کہ ایران کے خلاف دوبارہ امریکی کارروائی کے امکانات بڑھ گئے ہیں۔

سعودی اتحادی افواج کا حوثیوں پر مدینہ منورہ کے طیبہ گرڈ سٹیشن پر ڈرون حملے کا الزام

سعودی اتحادی افواج کے ترجمان نے حوثیوں پر مدینہ منورہ کے طیبہ گرڈ سٹیشن پر ڈرون حملے کا الزام عائد کر دیا۔

ترجمان کے مطابق طیبہ گرڈ سٹیشن پر حملہ 29 ستمبر صبح 5 بج کر 11 منٹ پر کیا گیا، تحقیقات اور ڈرون ملبے کے تجزیے سے حوثیوں کے ملوث ہونے کی تصدیق ہوئی ہے۔

انہوں نے بتایا کہ مسجد نبوی ﷺ کو بجلی فراہم کرنے والے شہری انفراسٹرکچر کو نشانہ بنایا گیا، حوثیوں کی کارروائی مقدس مقامات کو نشانہ بنانے کی کوششوں کا تسلسل ہے۔

ترجمان سعودی اتحادی افواج کا مزید کہنا تھا کہ اتحادی افواج حرمین شریفین کے تحفظ اور زائرین کی سلامتی یقینی بنانے کیلئے پُرعزم ہے۔

ایران کا آبنائے ہرمز میں ایک اور امریکی زیرآب ڈرون قبضے میں لینے کا دعویٰ

ایران نے دعویٰ کیا ہے کہ پاسدارانِ انقلاب کی بحری افواج نے آبنائے ہرمز میں ایک اور جدید امریکی بغیر پائلٹ زیرِ آب ڈرون قبضے میں لے لیا ہے، جسے نگرانی اور جاسوسی کی سرگرمیوں کے لیے استعمال کیا جا رہا تھا۔

ایرانی حکام کے مطابق قبضے میں لیا گیا ڈرون ایک خودکار زیرِ آب گاڑی ہے، جسے ایک مربوط اور پیچیدہ کارروائی کے دوران قابو کیا گیا۔ کارروائی میں انٹیلی جنس معلومات اور الیکٹرانک وارفیئر کی صلاحیتیں استعمال کی گئیں۔

پاسدارانِ انقلاب کے سرکاری میڈیا ادارے سپاہ نیوز کے مطابق زیرِ آب ڈرون کو مزید جانچ پڑتال کے لیے ماہرین کے حوالے کردیا گیا ہے، تاکہ اس میں موجود معلومات اور ڈیٹا حاصل کیا جاسکے۔

ایرانی حکام کا کہنا ہے کہ حالیہ دنوں میں آبنائے ہرمز میں اس نوعیت کا یہ دوسرا امریکی زیرِ آب ڈرون ہے جسے قبضے میں لیا گیا ہے، اس سے قبل ستمبر کے آغاز میں بھی ایرانی پاسدارانِ انقلاب نے ڈائیو ایل ڈی نامی امریکی خودکار زیرِ آب گاڑی پکڑنے کا دعویٰ کیا تھا۔

تاہم امریکا نے ایرانی دعوے کی تصدیق نہیں کی، امریکی سینٹرل کمانڈ نے دعوے کو مسترد کرتے ہوئے کہا کہ امریکا اپنے تمام فعال ڈرون اثاثوں کا کنٹرول برقرار رکھے ہوئے ہے، جبکہ امریکی حکام نے ایرانی مؤقف کو بے بنیاد قرار دیا ہے۔ 

نابلس میں سیکڑوں اسرائیلی قبضہ گیروں کا حضرت یوسفؑ کے مزار پر حملہ

مقبوضہ مغربی کنارے کے شہر نابلس میں سیکڑوں اسرائیلی قبضہ گیروں نے حضرت یوسفؑ کے مزار پر حملہ کر دیا۔

اسرائیلی فوج احضرت یوسفؐ کے مزار پر حملہ کرنے والے آبادکاروں کو تحفظ فراہم کرتی رہی، اسرائیلی فوج علاقے میں موجود فلسطینی رہائشیوں کو انخلا پر مجبور کیا۔

میڈیا رپورٹ کے متعدد گھروں کو فوجی بیرکوں میں تبدیل کیا گیا، چھتوں پر اسرائیلی اسنائپرز تعینات کیے گئے۔

اسرائیلی آباد کاروں نے گزشتہ روز مسجد اقصیٰ کی بھی بے حرمتی کی تھی۔

روبیو کی جانب سے ایرانی وفد کو فوری ملک چھوڑنے کے مطالبے کی تردید

اقوام متحدہ میں ایران کے مستقل مشن کا کہنا ہے کہ ایرانی وفد طے شدہ شیڈول کے مطابق سوموار کے روز نیویارک سے روانہ ہوا تھا۔

ایرانی مشن کا یہ بیان امریکی ویب سائٹ ایگزیوس کی اس خبر کے بعد سامنے آیا ہے کہ ایران اور امریکا کے درمیان مذاکرات میں تعطل کے بعد امریکی وزیر خارجہ مارکو روبیو نے ایرانی وفد بشمول وزیرِ خارجہ عراقچی کو فوری طور پر امریکی سرزمین چھوڑنے کا مطالبہ کیا تھا۔

ایگزیوس نے ایک امریکی عہدے دار اور اس معاملے سے واقف ایک دوسرے ذریعے کے حوالے سے یہ خبر شائع کی تھی۔

اقوام متحدہ میں ایران کے مشن نے سوشل میڈیا پلیٹ فارم ایکس پر جاری اپنے ایک بیان میں ان رپورٹس کی تردید کرتے ہوئے کہا ہے کہ امریکی محکمہ خارجہ کوئی بآے نتیجہ حاصل کرنے میں ناکامی کے بعد اب بے بنیاد اور بے وقعت خبریں پھیلا رہا ہے۔

فیئر فورڈ واقعہ پر برطانوی دعوے درست نہیں: عراقچی

ایرانی وزیر خارجہ عباس عراقچی نے برطانوی وزیراعظم اینڈی برنہم کے بیان پر ردعمل میں کہا ہے کہ آر اے ایف فیئر فورڈ واقعے میں ایران کے کردار سے متعلق برطانوی دعوے درست نہیں ہیں۔

عباس عراقچی نے کہا کہ غیر ملکی ریاستوں کے لیے کام کرنے والے دہشت گردوں کو رہا کرنا بہت کچھ واضح کرتا ہے، برطانوی حکومت غلط سمت میں جا رہی ہے۔

برطانوی وزیراعظم نے ایران کے آر اے ایف فیئر فورڈ واقعے میں ملوث ہونے کا دعوی کیا ہے۔

فضائی اڈے پر حملے میں ایران کے ملوث ہونے کے شواہد ملے ہیں: برطانوی وزیراعظم

برطانوی وزیرِاعظم اینڈی برنہم نے کہا ہے کہ ایسے مضبوط شواہد موجود ہیں کہ ایران کا برطانیہ کے ایک فضائی اڈے پر مشتبہ سرگرمی میں کردار تھا، جس کے باعث ایک بڑا سکیورٹی واقعہ پیش آیا۔

اینڈی برنہم نے انٹرویو دیتے ہوئے کہا کہ اس بات کے مضبوط شواہد موجود ہیں کہ ایران نے جنوب مغربی انگلینڈ میں واقع آر اے ایف فیئرفورڈ کے قریب ہفتے کے اختتام پر پیش آنے والے واقعہ میں کردار ادا کیا۔

آر اے ایف فیئر فورڈ ایک ایسا فضائی اڈہ ہے جسے امریکی فوج ایران کے خلاف اپنی کارروائیوں میں استعمال کرتی ہے۔

ایران میں مہنگائی کی شرح 83 سال کی بلند ترین سطح پر پہنچ گئی

ایران میں مہنگائی کی شرح 83 سال کی بلند ترین سطح پر پہنچ گئی ہے۔

مہنگائی کے اعداد و شمار جاری کرنے والے ایران کے سرکاری ادارے کے مطابق ستمبر میں مہنگائی کی شرح 73.6 فیصد تک پہنچ گئی ہے، جو 1943 کے بعد کی بلند ترین سطح ہے۔

رپورٹ کے مطابق رواں سال ستمبر میں عوام کے زیرِ استعمال اشیا اور خدمات کی قیمتیں گزشتہ سال ستمبر کے مقابلے میں اوسطاً 89.8 فیصد زیادہ تھیں۔

اعداد و شمار سے ظاہر ہوتا ہے کہ ستمبر کے دوران مواصلات، گاڑیوں، جوتوں اور ملبوسات کی قیمتوں میں سب سے زیادہ اضافہ دیکھنے میں آیا۔

امریکی صدرڈونلڈ ٹرمپ کا چند دنوں میں ایران سے متعلق پیشرفت کا دعویٰ

امریکی صدر ڈونلڈ ٹرمپ نے ایران کے حوالے سے کہا ہے کہ آپ جلد بہت اہم واقعات ہوتے دیکھیں گے، تاہم انہوں نے اس بارے میں مزید کوئی تفصیل نہیں بتائی۔

میڈیا سے گفتگو کرتے ہوئے امریکی صدر نے ایران کے بارے میں کہا ہے کہ ہم ایک ایسے ملک سے نمٹ رہے ہیں جو تقریباَ تباہ ہو چکا ہے، ان کی معیشت اچھی حالت میں نہیں ہے، ان کی بحریہ ختم ہو چکی ہے، ان کی فضائیہ ختم ہو چکی ہے اور ان کا طیارہ شکن نظام بھی ختم ہو چکا ہے۔

ٹرمپ نے ایک بار پھر دعویٰ کیا کہ ’آبنائے ہرمز کا مکمل کنٹرول ہمارے پاس ہے، گزشتہ 3 روز کے دوران آبنائے ہرمز سے گزرنے والی تیل کی کھیپوں کی مقدار امریکی تاریخ میں کسی بھی وقت سے زیادہ رہی ہے۔

امریکی صدر کا اپنے بیان میں مزید کہنا تھا کہ میں صرف جنگ کے عرصے کی بات نہیں کر رہا، بلکہ پوری تاریخ کی بات کر رہا ہوں۔

ٹرمپ کے یہ بیانات ایسے وقت میں سامنے آئے ہیں جب ایران نے کہا ہے کہ آبنائے ہرمز پر اس کا کنٹرول ہے اور حالیہ جنگ شروع ہونے سے پہلے جیسے حالات تھے، وہ ابھی بحال نہیں ہوئے۔

محسن رضائی کی متحدہ عرب امارات کو نیتن یاہو کی میزبانی پر تنبیہ

ایران کی قومی سلامتی کونسل کے سربراہ محسن رضائی نے متحدہ عرب امارات کو اسرائیلی وزیراعظم نیتن یاہو کی میزبانی پر تنبیہ کر دی۔

اپنے بیان میں محسن رضائی نے کہا کہ نیتن یاہو کی میزبانی کے اچھے نتائج نہیں ہوں گے، امریکی فوجی اڈوں کی میزبانی نے امارات کو سکیورٹی فراہم نہیں کی، غزہ کے قصاب کی میزبانی بھی امارات کیلئے فائدہ مند نہیں ہوگی۔

انہوں نے مزید کہا کہ امارات گزشتہ جنگ سے سبق سیکھے اور جنگیں بھڑکانے سے گریز کرے، امارات ایرانی جزائر سے متعلق بے بنیاد دعوے جاری کرنا بند کرے۔

سعودی ولی عہد کا کشیدگی کم کرنے، سفارتی حل کی کوششیں جاری رکھنے کا اعلان

سعودی ولی عہد محمد بن سلمان نے علاقائی کشیدگی کم کرنے اور سفارتی حل کی کوششیں جاری رکھنے کا اعلان کر دیا۔

اپنے بیان میں شہزادہ محمد بن سلمان نے کہا کہ سعودی سلامتی کو درپیش کسی بھی خطرے یا حملے کا فیصلہ کن جواب دیا جائے گا، خلیج کی سلامتی اور استحکام ناقابل تقسیم ہے۔

انہوں نے خلیجی شراکت داروں کے ساتھ علاقائی سلامتی و سٹریٹجک تعاون جاری رکھنے کا اعلان کرتے ہوئے کہا کہ سعودی عرب، ترکیہ اور پاکستان کا مکہ دفاعی معاہدہ خطے کے استحکام کی مشترکہ کوشش ہے۔

سعودی ولی عہد نے عالمی توانائی بحران اور سمندری سلامتی کیلئے کثیر ملکی بحری دفاعی اتحاد کے قیام کا بھی ذکر کیا۔

محمد بن سلمان نے غزہ میں فلسطینیوں پر حملوں اور مسجد اقصیٰ کی خلاف ورزیوں کی مذمت کی اور آزاد فلسطینی ریاست کے قیام کے عزم کا اعادہ کیا۔

انہوں نے حوثی ملیشیا کے خلاف یمنی حکومت اور سوڈان کے اتحاد و استحکام کی حمایت جاری رکھنے کا بھی اعلان کیا۔

آبنائے ہرمز میں 4 تجارتی جہازوں پر حملے، عالمی توانائی بحران کا خدشہ

آبنائے ہرمز میں جہازرانی معمول پر آنے کے بجائے مزید متاثر ہونے لگی، جس سے تیل و گیس کی قلت اور قیمتوں میں اضافے کے خدشات بڑھ گئے ہیں۔

برطانوی میری ٹائم ادارے یوکے ایم ٹی او کے مطابق 29 ستمبر کو آبنائے ہرمز میں 3 تجارتی بحری جہاز نامعلوم سمت سے آنے والے گولہ نما حملوں کی زد میں آئے، جن میں ایک خام تیل بردار، ایک مائع قدرتی گیس (ایل این جی) بردار اور ایک دیگر بحری جہاز شامل تھا۔

یوکے ایم ٹی او کے مطابق 28 ستمبر کو ایل این جی سے بھرے ایک اور ٹینکر کو بھی پروجیکٹائل سے نشانہ بنایا گیا، جس کی اطلاع 30 ستمبر کو سامنے آئی۔

برطانوی ادارے نے بتایا کہ خام تیل بردار جہاز کے بائیں جانب نامعلوم گولہ لگا، تاہم واقعے میں جانی نقصان یا نقصان کی مکمل تفصیلات تاحال سامنے نہیں آئی ہیں اور تحقیقات جاری ہیں۔

میزائلوں کی کمی نہیں، دشمن پر کئی سال تک حملے جاری رکھ سکتے ہیں: ایرانی مشیر

ایرانی پاسدارانِ انقلاب کی فضائیہ کے کمانڈر کے مشیر علی بلالی نے کہا ہے کہ ایران کے پاس اتنے میزائل موجود ہیں کہ وہ کئی سال تک موجودہ رفتار سے میزائل حملے جاری رکھ سکتا ہے۔

ایرانی خبر رساں ادارے فارس کے مطابق علی بلالی نے کہا کہ ایران دشمن کو سبق سکھانے کیلئے جتنے میزائل ضروری ہوں گے، اتنے داغے گا۔

ان کا مزید کہنا ہے کہ حملوں کا جواب نہ دینے کا دور ختم ہو چکا ہے۔

ایرانی وزیر خارجہ عباس عراقچی کو 7 روزہ تجویز پر امریکا کا جواب موصول

ایران کے وزیر خارجہ عباس عراقچی کو امریکا کی جانب سے پیش کئے گئے 7 روزہ اعتماد سازی منصوبے پر واشنگٹن کا جواب موصول ہوگیا ہے، قطری ثالثوں سے دوحہ میں ملاقات کے بعد عراقچی اس معاملے پر تہران میں ایرانی قیادت سے مشاورت کریں گے۔

برطانوی خبر ایجنسی رائٹرز کے مطابق مذاکرات سے باخبر ایک ایرانی عہدیدار نے بتایا کہ عباس عراقچی نے گزشتہ رات دوحہ میں قطری ثالثوں سے ملاقات کی جہاں انہیں ایران کی جانب سے پیش کئے گئے سات روزہ منصوبے پر امریکی مؤقف سے آگاہ کیا گیا، عراقچی آج تہران پہنچ کر اس جواب پر بات کریں گے۔

ذرائع کے مطابق امریکا اور ایران کے درمیان بنیادی اختلاف منصوبے پر عملدرآمد کی ترتیب سے متعلق ہے، سات روزہ منصوبے کا مقصد دونوں ممالک کے درمیان اعتماد بحال کرنا اور جون میں طے پانے والی امریکا ایران مفاہمتی یادداشت کو مزید بہتر شکل میں دوبارہ نافذ کرنے کی راہ ہموار کرنا ہے۔

ایران نے اس سے قبل قطر کے ذریعے امریکا کو ایک منصوبہ پیش کیا تھا، جس کے تحت تہران نے شرائط پوری ہونے کی صورت میں آبنائے ہرمز کو 7 دن کے اندر معمول کی بحری آمدورفت کیلئے کھولنے اور اس کے بعد وسیع تر مذاکرات شروع کرنے کی تجویز دی تھی۔

ایرانی وزیر خارجہ کا مؤقف رہا ہے کہ تہران واشنگٹن کے حتمی جواب کا انتظار کر رہا ہے اور مذاکرات میں پیشرفت ایران کی شرائط پوری ہونے سے مشروط ہوگی۔

دوسری جانب امریکی صدر ڈونلڈ ٹرمپ نے پہلے ایرانی تجویز کو مسترد قرار دیا تھا تاہم قطر کے ذریعے دونوں فریقوں کے درمیان بالواسطہ رابطے جاری ہیں، تازہ رابطوں میں قطر اہم ثالث کا کردار ادا کر رہا ہے، قطری حکام کے مطابق دوحہ امریکا اور ایران کے درمیان پیغامات کی ترسیل اور مذاکراتی عمل کو آگے بڑھانے کی کوششیں جاری رکھے ہوئے ہے، اس پورے عمل میں آبنائے ہرمز، اقتصادی پابندیوں اور مستقبل کے جوہری مذاکرات سمیت کئی معاملات زیر بحث ہیں۔

اب عباس عراقچی کی تہران میں ہونے والی مشاورت کو آئندہ ایرانی مؤقف طے کرنے کیلئے اہم سمجھا جا رہا ہے، تاہم تازہ اطلاعات کے مطابق ابھی تک کسی حتمی معاہدے یا جنگ کے خاتمے کا اعلان نہیں کیا گیا۔

عالمی منڈی میں خام تیل مہنگا، قیمت 103 ڈالر سے تجاوز کر گئی

عالمی منڈی میں خام تیل کی قیمتوں میں اضافہ ہوگیا، برینٹ خام تیل کی قیمت 103 ڈالر فی بیرل سے تجاوز کر گئی۔

خبر ایجنسی کے مطابق برینٹ خام تیل کی قیمت ایک ڈالر 14 سینٹ اضافے کے بعد 103 ڈالر 73 سینٹ فی بیرل ہوگئی، جبکہ امریکی خام تیل ڈبلیو ٹی آئی کی قیمت 34 سینٹ اضافے سے 89 ڈالر 72 سینٹ فی بیرل پر پہنچ گئی۔

خام تیل کی قیمتوں میں اضافے کی بڑی وجہ امریکی صدر ڈونلڈ ٹرمپ کی جانب سے ایران پر عائد پابندیوں میں نرمی کی آمادگی کی تردید کو قرار دیا جا رہا ہے۔

برینٹ خام تیل کی قیمت رواں ماہ تقریباً 14 فیصد اضافے کی جانب گامزن ہے، جو جولائی کے بعد سب سے بڑا ماہانہ اضافہ ہوگا، دوسری جانب ڈبلیو ٹی آئی کی قیمت میں رواں ماہ تقریباً 4 فیصد اضافے کا امکان ہے۔

امریکا نے ایران اور روسی اداروں پر نئی پابندیاں عائد کر دیں

امریکا نے ایران کو ہتھیاروں اور فوجی سازوسامان کی ترسیل روکنے کی کوششوں کے تحت ایران کے ایک اور روس کے دو اداروں پر نئی پابندیاں عائد کر دی ہیں۔

امریکی محکمۂ خزانہ کے مطابق پابندیوں کا نشانہ ایران کی ساہا ایئرلائنز، روسی طیارہ ساز کمپنی یاکوولیو اور روسی شپنگ کمپنی ایم جی فلوٹ بنی ہیں۔

امریکی حکام کے مطابق یاکوولیو نے ایران کو یاک-130 جنگی تربیتی طیارے اور متعلقہ سامان فراہم کیا، جبکہ ایم جی فلوٹ کے زیرِ انتظام بحری جہاز ایران سے روس کو بیلسٹک میزائلوں کی منتقلی میں ملوث رہے۔

محکمۂ خزانہ کا کہنا ہے کہ ساہا ایئرلائنز ایران کیلئے ہتھیاروں اور متعلقہ فوجی سازوسامان کی منتقلی میں ملوث رہی ہے۔

امریکا کے مطابق یہ اقدامات ایران پر اقوام متحدہ کی بحال شدہ پابندیوں کی حمایت میں کئے گئے ہیں اور ’’آپریشن اکنامک آؤٹ کاسٹ‘‘ کا حصہ ہیں۔

امریکی محکمۂ خزانہ کے مطابق نئی پابندیوں کا بنیادی مقصد ایران کے ہتھیاروں کی ترسیل کے نیٹ ورک کو محدود کرنا اور اس سے منسلک اداروں پر مالی و تجارتی دباؤ بڑھانا ہے۔

امریکی سینیٹر برنی سینڈرز کا اسرائیل کو فوجی امداد بند کرنے کا مطالبہ

امریکی سینیٹر برنی سینڈرز نے ٹرمپ انتظامیہ سے اسرائیل کو فوجی امداد بند کرنے کا مطالبہ کر دیا۔

سماجی رابطے کی ویب سائٹ ایکس پر برنی سینڈرز نے لکھا کہ امریکی عوام اور قانون ساز اسرائیل کو دی جانے والی فوجی امداد ختم کرنے کا مطالبہ کر رہے ہیں، اور ان کے بقول سینیٹ میں حالیہ ووٹنگ اس رجحان کا واضح ثبوت ہے۔

انہوں نے کہا کہ جنوری 2024 میں، میں نے غزہ میں انسانی حقوق کی خلاف ورزیوں کی تحقیقات کیلئے ووٹنگ کرائی تھی، 2024 میں میری حمایت صرف 11 سینیٹرز نے کی تھی، آج اسرائیل کے اقدامات کی تحقیقات سے متعلق قرارداد کے حق میں 47 سینیٹرز نے ووٹ دیا۔

امریکی سینیٹر کا مزید کہنا تھا کہ امریکی عوام کی آواز سنیں، اسرائیل کو مزید فوجی امداد نہیں دی جانی چاہیے۔

امریکا اور اسرائیل اب ایران میں اندورنی تقسیم پیدا کرنا چاہتے ہیں: مسعود پزشکیاں

ایرانی صدر مسعود پزشکیان نے کہا ہے کہ امریکہ اور اسرائیل فوجی ذرائع سے ایران کو جھکانے میں ناکامی کے بعد اب ملک کے اندرونی اختلافات کو ہوا دینے اور تقسیم پیدا کرنے کی حکمتِ عملی پر عمل پیرا ہیں۔

اپنے بیان میں ایرانی صدر مسعود پزشکیان کا کہنا تھا کہ امریکا اور اسرائیل جنگ سے ایران کو جھکانے میں ناکام رہے، تہران اپنے ہمسایہ اور دوست ممالک کے ساتھ تعلقات برقرار رکھے ہوئے ہے، عراق، پاکستان، آذربائیجان اور دیگر دوست ممالک ایران کے ساتھ تعاون کر رہے ہیں

انہوں نے کہا کہ امریکی صدر دنیا کے دوسرے سرے سے دھمکیاں اور احکامات دیتے ہیں، بعض ممالک امریکی احکامات پر عمل بھی کرتے ہیں، ایران موجودہ مشکلات کے باوجود دوست اور ہمسایہ ممالک کے ساتھ روابط جاری رکھے گا۔

مسعود پزشکیان کا کہنا تھا کہ قومی یکجہتی اور اتحاد کے ذریعے دشمن کو شکست دی جا سکتی ہے، ملک کو کمزور کرنے کے بجائے تعاون کو فروغ دیا جانا چاہیے۔

سعودیہ کے سینئر عہدیدار کی سعودی اور اسرائیلی حکام کے درمیان ملاقات کی اطلاعات کی تردید

سعودی عرب کے سینئر عہدیدار نے سعودی اور اسرائیلی حکام کے درمیان ملاقات کی اطلاعات کی تردید کر دی۔

اسرائیلی میڈیا نے دعویٰ کیا تھا کہ وزیراعظم نیتن یاہو نے حالیہ دورہ یو اے ای کے دوران سعودی عہدیدار سمیت مشرق وسطیٰ کےحکام سے ملاقات کی تھی۔

نیتن یاہو نے اتوار کو متحدہ عرب امارات میں صدر یو اے ای شیخ محمد بن زاید آل نہیان سے ملاقات کی تھی۔

امریکا اور ایران کے درمیان مذاکرات ایک بار پھر ناکام

امریکا اور ایران کے درمیان مذاکرات ایک بار پھر ناکام ہوگئے۔

قطرکی ثالثی میں ہونے والے مذاکرات میں کوئی پیشرفت نہیں ہوسکی، امریکی نیوزویب سائٹ ایگزیوس نے دعویٰ کیا کہ مذاکرات سے واقف 3 ذرائع کے مطابق دونوں فریق اپنے مؤقف سے پیچھے ہٹنے کو تیار نہیں، دونوں ممالک میں دوبارہ جنگ کےخدشات بڑھ گئے۔

امریکی صدرٹرمپ مڈٹرم الیکشن کے بعد ایران کیخلاف بڑی فوجی کارروائی کا حکم دے سکتے ہیں، اخبارکے مطابق قطری ثالث نے نیویارک میں ایرانی وزیرخارجہ اوران کی ٹیم سے کئی گھنٹے مذاکرات کئے۔

قطر کی جانب سے پیش کردہ دو صفحات پر مشتمل سمجھوتے کی تجویز پر بھی غور کیا گیا، قطری تجویز میں ایران کی ناکہ بندی اور جوہری پروگرام میں ٹھوس رعایتوں کے مطالبات شامل تھے۔

ایگزیوس کے مطابق وائٹ ہاؤس مذاکرات میں پیشرفت کے حوالے سے پرامید تھا، واشنگٹن سمجھتا ہے موجودہ صورتحال میں اسے سمجھوتے کی ضرورت نہیں۔

ایران کی صورتحال انتہائی خراب، نہیں معلوم ہتھیار ڈالنے والے ہیں یا نہیں: صدر ٹرمپ

امریکی صدر ڈونلڈ ٹرمپ نے کہا ہے کہ ایران کی صورتحال بہت خراب ہے، نہیں معلوم کہ وہ ابھی ہتھیار ڈالنے والے ہیں یا نہیں۔

امریکی صدر ڈونلڈ ٹرمپ نے وائٹ ہاؤس میں اے آئی رہنماؤں سے ملاقات کے بعد گفتگو میں کہا کہ ہمیں مصنوعی ذہانت کے میدان میں نمایاں برتری حاصل ہے اور ہم اسے برقرار رکھنا چاہتے ہیں۔

میڈیا سے گفتگو میں امریکی صدر ٹرمپ نے کہا کہ ایران کی صورتحال بہت خراب ہے، نہیں معلوم کہ وہ ابھی ہتھیار ڈالنے والے ہیں یا نہیں، جب تک میں موجود ہوں، شمالی کوریا کے کم جونگ اُن ٹھیک رہیں گے۔

امریکی صدر نے ٹیکنالوجی عہدیداروں کے ساتھ مصنوعی ذہانت سے متعلق ایک دستاویز پر دستخط کئے، ٹرمپ نے دستاویز کو تحفظ کی ایک شکل قرار دیتے ہوئے کہا کہ ہم نگرانی کے لیے ایک کمیٹی تشکیل دینے پر غور کر رہے ہیں، ہم خود احتسابی کا زبردست عمل دیکھ رہے ہیں، اے آئی رہنما اس بات کو سمجھتے ہیں۔

امریکی صدر نے کہا کہ ڈیٹا سینٹرز کے قیام کے مقامات پر تبادلہ خیال کیا گیا، جن علاقوں میں ڈیٹا سینٹرز تعمیر کئے جائیں گے، وہاں کے لوگوں کو مالی طور پر بہت زیادہ فائدہ ہوگا۔

سعودیہ کا آبنائے ہرمز، باب المندب، بحیرہ احمر، خلیج عدن میں آمدورفت یقینی بنانے پر زور

سعودی عرب کی کابینہ نے آبنائے ہرمز،باب المندب، بحیرہ احمر اور خلیج عدن میں آزادانہ بحری آمدورفت یقینی بنانے کی اہمیت پر زور دیا ہے۔

ولی عہد شہزادہ محمد بن سلمان کی زیر صدارت کابینہ کے اجلاس میں مکہ دفاعی معاہدے کے سیکرٹریٹ کے قیام میں پیشرفت کا جائزہ لیا گیا، اجلاس میں کہا گیا کہ آبنائے ہرمز میں 28 فروری سے پہلے کی صورتحال بحال کی جائے اور بحری آمدورفت پر کسی قسم کی فیس یا پابندی عائد نہ ہو۔

کابینہ نے اہم آبی گزرگاہوں کو ریاستوں پر دباؤ ڈالنے، دھمکیاں دینے یا ان کے مفادات کو نقصان پہنچانے کے لیے استعمال کرنے کو مسترد کرتے ہوئے اس معاملے میں بین الاقوامی قانون اور اقوام متحدہ کی متعلقہ قراردادوں کی پاسداری پر زور دیا۔

سعودی کابینہ نے حوثی ملیشیا کی جانب سے سعودی عرب پر حملوں کی اقوام متحدہ کی سلامتی کونسل کی مذمت کا بھی خیرمقدم کیا، اجلاس میں اسرائیلی حکام اور انتہا پسند آبادکاروں کی جانب سے مسجد اقصیٰ کی حرمت اور اس کی مذہبی و تاریخی حیثیت کی خلاف ورزی کی بھی شدید مذمت کی گئی۔

سعودی وزیر اطلاعات سلمان الدوسری کے مطابق کابینہ نے مؤقف دہرایا کہ خطے میں منصفانہ اور پائیدار امن دو ریاستی حل کے نفاذ اور 1967 کی سرحدوں کے مطابق مشرقی بیت المقدس کو دارالحکومت بنا کر ایک آزاد فلسطینی ریاست کے قیام سے ہی ممکن ہے۔

کابینہ نے اقوام متحدہ کی جنرل اسمبلی میں سعودی عرب کی شرکت کے نتائج کا بھی جائزہ لیا اور عالمی امن و سلامتی، سفارت کاری، بین الاقوامی بحرانوں کے حل اور انسانی ضروریات سے نمٹنے کے لیے سعودی عرب کے کردار کو سراہا۔

آبنائے ہرمز میں ایک اور بحری جہاز پر نامعلوم پروجیکٹائل سے حملہ

آبنائے ہرمز میں ایک اور بحری جہاز پر نامعلوم پروجیکٹائل سے حملہ کیا گیا۔

برطانوی میری ٹائم ٹریڈ آپریشنز کے مطابق حملے کے بعد بحری جہاز میں لگنے والی آگ پر قابو پا لیا گیا، آگ بجھنے کے بعد جہاز نے سفر جاری رکھا، عملے کے تمام ارکان محفوظ رہے۔

واقعے میں کسی ماحولیاتی نقصان کی اطلاع نہیں ملی، جہاز کو پہنچنے والے نقصان کا جائزہ جاری ہے، آبنائے ہرمز سے گزرنے والے بحری جہازوں کو مزید احتیاط برتنے کی ہدایت کی گئی ہے۔

سعودی ولی عہد اور امیر قطر کا رابطہ، خطے کی تازہ صورتحال پر تبادلہ خیال

سعودی ولی عہد محمد بن سلمان اور امیر قطر شیخ تمیم بن حمد آل ثانی کے درمیان ٹیلیفونک رابطہ ہوا۔

عرب میڈیا کے مطابق سعودی ولی عہد اور امیر قطر نے دوطرفہ تعلقات اور باہمی امور پر تبادلہ خیال کیا، دونوں رہنماؤں نے خطے کی تازہ صورتحال اور حالیہ پیش رفت کا جائزہ لیا۔

محمد بن سلمان اور شیخ تمیم نے خطے میں امن، سلامتی اور استحکام کے لئے جاری کوششوں پر بھی گفتگو کی۔

ایران کے ساتھ معاہدے کی گنجائش موجود ہے: جے ڈی وینس

امریکی نائب صدر جے ڈی وینس کا کہنا ہے ایران کے ساتھ معاہدے کی گنجائش موجود ہے۔

امریکی نائب صدر جے ڈی وینس نے کہا کہ معاہدے کے لئے تہران کو اپنے وعدوں کی پاسداری کرنا ہوگی، امریکا باتوں کے بجائے عملی اقدامات کی بنیاد پر مذاکرات کررہا ہے۔

جے ڈی وینس نے کہا کہ اگلے دو ماہ میں ایران سے متعلق فیصلہ بھی عملی اقدامات کی بنیاد پر ہوگا، ہمیں لگتا ہے کہ سپریم لیڈر مجتبی خامنہ ای زندہ ہیں تاہم ایرانی سپریم لیڈر روز مرہ معاملات میں حصہ نہیں لے رہے۔

امریکا کو آخر کار خطے سے نکلنا ہے، وہ دن اس کیلئے پشیمانی کا ہوگا: ایران

ایرانی پارلیمنٹ کی قومی سلامتی کمیٹی کے سربراہ ابراہیم عزیزی نے کہا کہ امریکا کو آخر کار خطے سے نکلنا ہی ہوگا۔ امریکا کے خطے سے انخلا کا دن پشیمانی کا دن ہو گا۔

ایرانی پارلیمنٹ کی قومی سلامتی کمیٹی کے سربراہ ابراہیم عزیزی نے ایکس پر بیان میں لکھا کہ خطے سے امریکا کے انخلا کے بعد آخر کار ہم اور ہمارے ہمسائے ہی خطے میں رہیں گے۔

ابراہیم عزیزی نے مزید لکھا کہ اسرائیلی حکومت کے خاتمے کے دن بھی قریب آتے جا رہے ہیں۔

امریکی صدر ایسی دلدل میں پھنس گئے جہاں مذاکرات کر سکتے ہیں نہ جنگ: محسن رضائی

ایران کی سپریم نیشنل سکیورٹی کونسل کے سیکرٹری محسن رضائی نے آذربائیجان کے نائب وزیراعظم سے ملاقات کی۔

ایران کی سپریم نیشنل سکیورٹی کونسل کے سیکرٹری محسن رضائی نے کہا کہ ایران نے امریکا کو اپنی شرائط سے آگاہ کر دیا، محسن رضائی کا کہنا ہے کہ ٹرمپ فیصلہ کرنے سے قاصر ہیں۔

محسن رضائی نے کہا کہ امریکی صدر ایسی دلدل میں پھنس گئے ہیں جہاں نہ مذاکرات کر سکتے ہیں نہ جنگ، امریکا نے فوجی جنگ میں بے بسی کے باعث فضائی ناکہ بندی کا سہارا لیا۔

ایران میں امریکی ڈالر کی قیمت 2 لاکھ 50 ہزار تومان کی ریکارڈ سطح پر پہنچ گئی

ایران میں امریکی ڈالر کی قیمت 2 لاکھ 50 ہزار تومان کی ریکارڈ سطح پر پہنچ گئی۔

ایک یورو کی قیمت 2 لاکھ 84 ہزار تومان سے تجاوز کر گئی، برطانوی پاؤنڈ 3 لاکھ 31 ہزار تومان سے زائد میں فروخت ہونے لگا، ایران امریکا مذاکرات کے مستقبل پر غیر یقینی صورتحال برقرار ہے۔

ڈالر کی مسلسل بڑھتی قیمت سے ایرانی کاروباری طبقہ مشکلات کا شکار ہے۔

امریکا سے مذاکرات پہلے سے زیادہ سنجیدہ اور مختصر ہوسکتے ہیں: عراقچی

ایرانی وزیر خارجہ عباس عراقچی نے امید ظاہر کی ہے کہ امریکا کے ساتھ حالیہ مذاکرات ماضی کے مقابلے میں زیادہ سنجیدہ اور مختصر ہوسکتے ہیں۔

ایرانی میڈیا کے مطابق تہران میں پریس کانفرنس کرتے ہوئے عباس عراقچی نے کہا کہ پاکستان اور قطر کی ثالثی میں جاری سفارتی کوششوں کے دوران ایران نے اپنا تازہ ترین امن منصوبہ پیش کردیا ہے۔

انہوں نے کہا کہ ایران اب امریکی ردعمل کا منتظر ہے اور توقع ہے کہ حالیہ مذاکرات کسی ممکنہ معاہدے کی راہ ہموار کرسکتے ہیں۔

عباس عراقچی کا کہنا تھا کہ ماضی میں امریکا کے ساتھ مذاکرات میں کافی وقت لگا، تاہم اس مرتبہ حالات مختلف دکھائی دے رہے ہیں، اس لیے بات چیت زیادہ سنجیدہ انداز میں آگے بڑھنے کی امید ہے۔

پاسدارانِ انقلاب کا امریکی عوام کے نام کھلا خط، ٹرمپ پالیسیوں کی مخالفت کا مطالبہ

 ایرانی پاسدارانِ انقلاب نے امریکی عوام کے نام 25 صفحات پر مشتمل کھلا خط جاری کرتے ہوئے امریکی صدر ڈونلڈ ٹرمپ کی پالیسیوں کی مخالفت اور اسرائیل کی حمایت ختم کرنے کا مطالبہ کیا ہے۔

پاسدارانِ انقلاب کے ترجمان حسین محبی نے تہران میں پریس کانفرنس کے دوران کہا کہ امریکا اور ایران کے درمیان پُرامن بقائے باہمی ممکن ہے، تاہم اس کے لیے امریکا کو اپنی خارجہ پالیسی تبدیل کرنا ہوگی۔

انہوں نے امریکی عوام پر زور دیا کہ وہ بیرونِ ملک جنگوں اور اسرائیل کی حمایت سے متعلق حکومتی پالیسیوں کی مخالفت کریں اور ٹرمپ کی جنگی کارروائیوں سے خود کو الگ کرتے ہوئے ان کی مذمت کریں۔

حسین محبی نے صدر ٹرمپ کو ناقابلِ اعتماد قرار دیتے ہوئے دعویٰ کیا کہ امریکی عوام کو خطے کی صورتِ حال سے متعلق مکمل معلومات فراہم نہیں کی جارہیں۔ ان کا کہنا تھا کہ حقائق سامنے آنے کے بعد امریکی عوام اپنی رائے اور فیصلوں پر نظرثانی کرسکتے ہیں۔

پاسدارانِ انقلاب نے ٹرمپ حکومت پر جنگی کارروائیوں اور معاشی پابندیوں کے ذریعے ایران پر دباؤ ڈالنے کا الزام عائد کرتے ہوئے مطالبہ کیا کہ امریکا اپنی فوجی مداخلت اور مبینہ جنگی کارروائیاں بند کرے۔ 

امریکا اور ایران میں پیغامات کا تبادلہ، اتفاق رائے کی کوشش جاری ہے: قطر

 قطری وزارت خارجہ کے ترجمان نے کہا ہے کہ امریکا اور ایران کے درمیان پیغامات کا تبادلہ اب بھی جاری ہے اور اتفاق رائے پیدا کرنے کی کوشش کی جارہی ہے۔

قطری وزارت خارجہ کے مطابق فریقین کے پاس مسئلے کے پرامن حل کے سوا کوئی راستہ نہیں، جبکہ کسی بھی فریق کی جانب سے علاقائی انفرااسٹرکچر کو نشانہ بنانے کی مخالفت کرتے ہیں۔

ترجمان نے کہا کہ خطے میں انفرااسٹرکچر کو نشانہ بنانے کی دھمکی عالمی قوانین کی خلاف ورزی ہے، جبکہ خلیجی ممالک نے جنگ کا حصہ بننے کا انتخاب نہیں کیا۔

قطری وزارت خارجہ نے کہا کہ ایران کو علاقائی ممالک کے خلاف جارحانہ رویہ ترک کرنا ہوگا، تاہم قطر کو نشانہ بنائے جانے کے باوجود امن کی کوششوں سے دستبردار نہیں ہوگا۔ 

ٹرمپ بڑا جھوٹا، ایران کبھی جوہری ہتھیار حاصل نہیں کرنا چاہتا: پاسدارانِ انقلاب

ایران کے پاسدارانِ انقلاب کے ترجمان نے امریکی صدر ڈونلڈ ٹرمپ کو بڑا جھوٹا قرار دیتے ہوئے کہا ہے کہ ٹرمپ کے جوہری ہتھیاروں اور دیگر معاملات سے متعلق بیانات حقیقت پر مبنی نہیں ہیں۔

حسین محبی نے کہا کہ امریکی عوام کو سچ بتایا جانا چاہئے، ایران کے خلاف امریکی فوجی مہم ناکام ہو چکی ہے اور امریکا کو خطے سے نکل جانا چاہئے۔

انہوں نے کہا کہ ایران کبھی جوہری ہتھیار حاصل نہیں کرنا چاہتا۔

ہماری سکیورٹی یقینی نہ بنائی گئی تو کوئی انفراسٹرکچر محفوظ نہیں رہے گا: باقر قالیباف

ایرانی پارلیمنٹ کے سپیکر اور چیف مذاکرات کار باقر قالیباف نے متنبہ کیا ہے کہ اگر ایران اپنا تیل فروخت نہیں کر سکتا تو خطے میں کوئی بھی تیل فروخت نہیں کر سکے گا اور اگر ہماری سکیورٹی یقینی نہ بنائی گئی تو کوئی انفراسٹرکچر محفوظ نہیں رہے گا۔

انہوں نے پارلیمان کے آن لائن منعقد ہونے والے اجلاس کی کارروائی شروع ہونے سے قبل خطاب کرتے ہوئے کہا کہ ایرانی عوام کو محاصرے اور دھمکیوں سے کبھی خوف زدہ نہیں ہونا چاہئے، اگر امریکا اس بنیادی حقیقت کو نہ سمجھے تو وہ ایرانی قوم کی جانب سے بار بار سخت جواب ملنے کے چکر میں پھنسا رہے گا۔

اس سے قبل پارلیمان کی قومی سلامتی اور خارجہ پالیسی کمیٹی کے سربراہ ابراہیم عزیزی نے کہا تھا کہ ایران 40 روزہ جنگ سے بھی زیادہ سخت جنگ کا جواب دینے کے لیے تیار ہے۔

ایران امریکا مذاکرات پر قیاس آرائیاں بے بنیاد ہیں: اسماعیل بقائی

ایرانی وزارت خارجہ کے ترجمان اسماعیل بقائی نے کہا کہ امریکا ایران مذاکرات سے متعلق میڈیا رپورٹس کی کوئی حقیقی بنیاد نہیں ہے، نیویارک میں قطری وفد کے ساتھ ملاقات میں ثالث کی تجاویز پر تبادلہ خیال کیا گیا۔

اسماعیل بقائی نے کہا کہ ایرانی وفد نے قطری ثالث کو اپنے تحفظات اور مؤقف سے آگاہ کیا، ایران نے سفارتی عمل میں ہمیشہ نیک نیتی سے حصہ لیا ہے، ایران اپنے قومی مفادات کے دفاع میں کسی بھی دباؤ کے سامنے نہیں جھکے گا۔

سعودی طیاروں کے 24 گھنٹوں میں 38 فضائی حملے، حوثیوں کا متعدد شہریوں کی ہلاکت اور زخمی ہونے کا دعویٰ

یمن حوثیوں کے فوجی ترجمان یحییٰ سریع نے دعویٰ کیا ہے کہ سعودی طیاروں نے 24 گھنٹوں کے دوران یمن کے تین صوبوں میں 38 فضائی اور میزائل حملے کیے، جن کے نتیجے میں خواتین اور بچوں سمیت متعدد شہری ہلاک اور زخمی ہوئے ہیں۔

یحییٰ سریع نے ایک مختصر بیان میں کہا کہ سعودی حملے تعز، صعدہ اور حجہ صوبوں میں کیے گئے، ان حملوں میں خمیس مشیط اور طائف کے اڈوں سے اڑنے والے ایف-15 اور ٹائفون طیاروں نے حصہ لیا، جبکہ نجران اور جیزان سے میزائل حملے کیے گئے۔

انہوں نے بتایا کہ کشیدگی میں اضافے کے آغاز سے اب تک سعودی حملوں اور میزائل حملوں کی مجموعی تعداد 1123 ہو گئی ہے۔

قطر نے ہمارے مؤقف سے امریکہ کو آگاہ کر دیا، اب امریکی جواب کا انتظار ہے: عراقچی

ایرانی وزیر خارجہ عباس عراقچی نے نیویارک سے تہران روانگی سے قبل کہا ہے کہ قطر کے ذریعے ایران کا سات نکاتی منصوبہ امریکہ تک پہنچا دیا گیا ہے اور اب ایران امریکی جواب کا انتظار کر رہا ہے۔

ایرانی وزیر خارجہ عباس عراقچی نے کہا کہ قطری ثالث کے ذریعے ہونے والی بات چیت میں ایران کا مؤقف امریکا تک پہنچایا گیا، توقع ہے کہ وائٹ ہاؤس کا جواب منگل کو ثالثوں کے ذریعے ایران تک پہنچ جائے گا۔

انہوں نے کہا کہ ہمارا مشن امریکی فریق کو ان شرائط سے آگاہ کرنا اور دیگر تمام ممالک اور عالمی برادری کو یہ بتانا تھا کہ ایران کے پاس اس معاملے میں ایک منصوبہ موجود ہے، اس کی شرائط مکمل طور پر منصفانہ اور منطقی ہیں اور اگر امریکی یہ دعویٰ کرتے ہیں کہ وہ کسی معاہدے یا پُرامن حل کے خواہاں ہیں تو ہم نے یہ حل پیش کر دیا ہے۔

ایرانی وزیر خارجہ نے گزشتہ چند گھنٹوں کے دوران سامنے آنے والی ان قیاس آرائیوں کی بھی تردید کی جن میں کہا جا رہا تھا کہ ایران اپنے جوہری پروگرام میں لچک دکھانے پر آمادہ ہو گیا ہے۔

انہوں نے کہا کہ چند گھنٹوں سے مختلف ذرائع ابلاغ میں پروپیگنڈا جاری ہے اور ایران سے متعلق دعوے کیے جا رہے ہیں اور باتیں منسوب کی جا رہی ہیں، میں واضح طور پر کہتا ہوں کہ ایران کے مؤقف میں کوئی تبدیلی نہیں آئی۔ آبنائے ہرمز کھولنے کے لیے ہماری شرائط واضح ہیں۔

عباس عراقچی ایرانی صدر مسعود پزشکیان اور دیگر اعلیٰ سفارت کاروں کے ہمراہ اقوامِ متحدہ کی جنرل اسمبلی کے اجلاس میں شرکت کے لیے نیویارک گئے تھے۔

انہوں نے کہا کہ اس دورے کے نتائج سے ظاہر ہوا ہے کہ اسلامی جمہوریہ ایران، امریکہ اور صہیونی حکومت کی جانب سے پیش کرنے کی کوشش کے برعکس، بالکل بھی تنہا نہیں بلکہ اسے بہت زیادہ احترام حاصل ہے۔

انہوں نے کہا کہ متعدد ملاقاتوں میں یہ بات سامنے آئی کہ ان ممالک کے عوام اور حکام ایران کے اقدامات اور دنیا کی سب سے بڑی ورچوئل فوج کے خلاف اس کی مزاحمت کو قدر کی نگاہ سے دیکھتے ہیں، جس پر بہت سے مختلف ممالک اور لوگ فخر محسوس کرتے ہیں۔

ایران نے دنیا بھر میں امریکی مفادات کو نشانہ بنانے کی دھمکی دی ہے: مارکو روبیو

امریکی وزیر خارجہ مارکو روبیو نے فاکس نیوز کو انٹرویو میں کہا کہ ایران نے دنیا بھر میں امریکی مفادات کو نشانہ بنانے کی دھمکی دی ہے، کسی بھی حملے یا حملے کی کوشش کے سنگین نتائج ہوں گے۔

مارکو روبیو نے کہا کہ صدر ٹرمپ نے ایران کو اس کے خطرناک مقاصد سے روکنے کے لیے حملے کیے، ایران میزائل، ڈرونز اور دیگر ہتھیاروں کی صلاحیت بڑھا رہا تھا، ایران کی حکمت عملی روایتی ہتھیار مضبوط کرکے بیرونی مداخلت روکنا تھی۔

انہوں نے کہاکہ ایران دفاع مضبوط کر کے جوہری صلاحیت کی جانب بڑھنا چاہتا تھا، برطانیہ میں امریکی مفادات سے متعلق مبینہ دہشت گردی کی سازش بھی انتہائی سنگین خطرہ ہے۔

ٹرمپ کی ایران کو پابندیوں میں ریلیف اور منجمد اثاثوں کی پیشکش کی تردید

امریکی صدر ڈونلڈ ٹرمپ نے ان خبروں کی تردید کی ہے کہ امریکا نے ایران کے جوہری پروگرام سے متعلق اقدامات کے بدلے تہران کو پابندیوں میں ریلیف دینے یا منجمد ایرانی اثاثے بحال کرنے کی پیشکش کی ہے۔

سوشل میڈیا پلیٹ فارم ٹروتھ سوشل پر جاری بیان میں صدر ٹرمپ نے کہا کہ انہوں نے ایران کو کچھ بھی پیشکش نہیں کی اور امریکی نیوز ویب سائٹ ایگزیوس کی رپورٹ کو غلط قرار دیتے ہوئے اسے ہٹانے کا مطالبہ کیا۔

دوسری جانب ایگزیوس نے امریکی حکام کے حوالے سے رپورٹ کیا تھا کہ ایران کی جانب سے جوہری پروگرام کو محدود کرنے کیلئے ٹھوس اقدامات کی صورت میں ٹرمپ انتظامیہ پابندیوں میں نرمی اور منجمد ایرانی فنڈز تک رسائی دینے پر غور کر رہی ہے۔

یہ معاملہ ایسے وقت سامنے آیا ہے جب امریکا اور ایران کے درمیان قطر سمیت علاقائی ثالثوں کے ذریعے بالواسطہ سفارتی رابطے جاری ہیں۔

ایگزیوس کے مطابق ایرانی وزیر خارجہ عباس عراقچی نے امریکی نمائندوں کے ساتھ مذاکرات میں آبنائے ہرمز دوبارہ کھولنے اور جوہری مذاکرات کی بحالی سے متعلق ایرانی شرائط پیش کی تھیں۔

رپورٹس کے مطابق ایران نے مذاکرات کی پیشرفت کیلئے امریکی بحری ناکہ بندی ختم کرنے، ایرانی تیل کی فروخت پر پابندیاں ہٹانے اور منجمد اثاثوں کی بحالی جیسے مطالبات پیش کیے ہیں، جبکہ امریکی حکام جوہری پروگرام سے متعلق ایرانی یقین دہانیوں اور اقدامات پر زور دے رہے ہیں۔

دریں اثنا ایرانی وزیر خارجہ عباس عراقچی نے کہا تھا کہ تہران سفارتی حل کیلئے تیار ہے اور ثالثوں کے ذریعے واشنگٹن کے جواب کا انتظار کر رہا ہے۔

المخا میں یمنی افواج کے ساتھ جھڑپوں میں 5 حوثی ہلاک، 13 زخمی

یمن کی سرکاری فوج نے دعویٰ کیا ہے کہ حوثی ملیشیا پر حملوں میں 5 حوثی باغی ہلاک اور 13 زخمی ہوئے ہیں۔

عرب میڈیا کے مطابق یمنی فوج نے حوثی ملیشیا کے ٹھکانوں پر زمینی اور فضائی حملے جاری ہیں، سرکاری فوج نے تعز، مارب اور الحدیدہ پر ڈرون طیاروں سے بمباری کی۔

یمنی فوج کی جانب سے جاری بیان میں کہا گیا کہ ڈرونز سے الجوف کے علاقے میں حوثیوں کی گاڑیوں اور اجتماعات کو نشانہ بنایا۔

گزشتہ 72 گھنٹوں کے دوران حوثی ملیشیا کے خلاف 756 حملے کیے گئے، حملوں کے نتیجے میں 2 ہزار 316 حوثی جنگجوؤں کو ہلاک یا زخمی کیا۔

غزہ میں نیتن یاہو کی پیدا کردہ تکالیف کو جائز قرار نہیں دے سکتے: برطانوی وزیر خارجہ

برطانوی وزیر خارجہ ایڈ ملی بینڈ نے کہا ہے کہ غزہ میں نیتن یاہو حکومت کی پیدا کردہ تکالیف کو جائز قرار نہیں دے سکتے۔

لیبر پارٹی کانفرنس سے خطاب میں ایڈ ملی بینڈ نے کہا کہ غزہ اور مغربی کنارے کی صورت حال دنیا کے اجتماعی ضمیر پر بدنما داغ ہے۔

انہوں نے کہا کہ برطانیہ مغربی کنارے میں دہشت گردوں کی طرف سے قتل عام، غزہ میں جنگی جرائم کے شواہد کی نشاندہی اور غزہ پر غیر قانونی اسرائیلی قبضے کی مذمت کرتا ہے۔

وزیر خارجہ ایڈ ملی بینڈ کا مزید کہنا تھا کہ ہم ان لوگوں کی آواز سن رہے ہیں جو فلسطینیوں کی حالات پر غم و غصے میں ہیں، وہ لوگ درست ہیں۔