اسلام آباد: (دنیا نیوز) سپریم کورٹ آف پاکستان نے فوجی عدالتوں میں سویلینز کا ٹرائل کرنے کیخلاف دائر درخواستیں سماعت کیلئے مقرر کر دیں۔
چیف جسٹس آف پاکستان عمر عطا بندیال کی سربراہی میں 9 رکنی لارجر بینچ آج صبح 11:45 بجے درخواستوں پر سماعت کرے گا، فوجی عدالتوں میں سویلینز کا ٹرائل کرنے کیخلاف درخواستیں سابق چیف جسٹس جواد ایس خواجہ، اعتزاز احسن اور دیگر نے دائر کی تھیں۔
لارجر بینچ میں نامزد چیف جسٹس قاضی فائز عیسیٰ، جسٹس سردار طارق مسعود، جسٹس اعجازالاحسن، جسٹس منصور علی شاہ، جسٹس منیب اختر، جسٹس یحیٰی آفریدی، جسٹس مظاہر نقوی اور جسٹس عائشہ ملک شامل ہیں۔
فوجی عدالتوں میں عام شہریوں کے ٹرائل کیخلاف 4 درخواستیں سماعت کیلئے مقرر کی گئی ہیں، سپریم کورٹ کے رجسٹرار آفس کی جانب سے درخواستوں پر کوئی اعتراض بھی عائد نہیں کیا گیا، چیف جسٹس عمر عطاء بندیال نے درخواستوں کو نمبر لگانے کی منظوری دی۔
