انڈین میڈیا کی رپورٹس کے مطابق بھارت کی ریاست مدھیہ پردیش کی ضلعی عدالت نے طلاق لئے بغیر پانچ شادیاں کرنے والی خاتون کو 2 سال قید بامشقت اور 2000 روپے جرمانے کی سزا سنائی ہے۔

متاثرہ شوہر کی شکایت پر تھانہ شاہ جہاں آباد میں درج ایف آئی آر پر ضلعی اور سیشن جج میگھا اگروال نے حکم جاری کیا۔

درخواست گزار نے بیان دیا کہ حسینہ نامی خاتون نے اس کے ساتھ دھوکے سے پانچویں شادی کی جبکہ وہ پہلے ہی چار شادیاں کر چکی تھی اور اس نے یہ بات مجھ سے چھپائے رکھی۔

عدالتی کارروائی کے دوران یہ بھی انکشاف ہوا کہ خاتون غریب اور تنہا مردوں کو اپنا نشانہ بناتی تھی، شادی کے بعد وہ اپنے شوہر کو ذہنی اور جسمانی طور پر تشدد کا نشانہ بنا کر ان کی جائیداد پر قبضہ کرنے کی کوشش کرتی تھی۔

عدالت نے اسے منصوبہ بندی کے تحت کیا گیا جرم قرار دیا اور کہا کہ پیش کئے گئے شواہد سے ثابت ہوتا ہے کہ دھوکہ دہی میں لٹیری دلہن اکیلی نہیں بلکہ اس کی بیٹیاں اور داماد بھی اس نیٹ ورک کا حصہ تھے۔

عدالت نے مختلف دفعات کے تحت خاتون کو مجرم قرار دیتے ہوئے کہا کہ طلاق کے بغیر بار بار شادی کرنا غیر قانونی ہے اور اس سے معاشرے میں اعتماد کا رشتہ ٹوٹتا ہے۔