لاہور: (دنیا نیوز) برطانوی شاہی جوڑا اپنا دورہ لاہور مکمل کرنے کے بعد واپس روانہ ہوا تاہم تھوڑی دیر بعد ہی مہمان جوڑے کے طیارے کا رخ واپس موڑتے ہوئے علامہ انٹرنیشنل ایئرپورٹ پر لینڈ کرا دیا گیا۔
دنیا نیوز ذرائع کے مطابق موسم ٹھیک ہونے پر رائل ایئر فورس کا طیارہ دوبارہ اسلام آباد جائے گا۔ طیارہ لینڈ کرنے پر ایئرپورٹ کی سکیورٹی مزید سخت کر دی گئی ہے جبکہ لاہور ایئر پورٹ پر وی آئی پی لاؤنج کھول دیا گیا ہے۔
تفصیل کے مطابق رائل ائیر فورس کے طیارے نے شام کے وقت لاہور سے اسلام آباد کیلئے اڑان بھری تھی، اسلام آباد میں گرج چمک کے ساتھ ہونے والی بارش کے باعث طیارے کو ائیرپورٹ پر لینڈنگ کی اجازت نہ مل سکی۔ پونے دو گھنٹے بعد برطانوی شاہی طیارہ واپس لاہور پہنچ گیا۔
The @royalairforce plane carrying Prince William & Kate just had to abort its landing in Islamabad in a fierce storm
— Chris Ship (@chrisshipitv) October 17, 2019
After much shaking around in the air, the RAF Voyager used for #royalvisitPakistan turned around and has just landed back in Lahore (where we started)
رائل طیارے میں شاہی جوڑے کے ساتھ سفر کرنے والے برطانوی صحافی کرس شپ نے ٹویٹ کیا کہ رائل ائیر فورس کا جہاز اسلام آباد کی فضا میں ہچکولے کھانے کے بعد واپس لاہور کے لئے مڑا اور جہاں سے سفر کا آغاز کیا واپس وہیں لینڈ کیا۔
برطانوی صحافی کا مزید کہنا تھا کہ شہزادہ ولیم جو خود ایک پائلٹ ہیں، وہ جہاز کے باقی افراد کی نسبت کم پریشان دکھائی دیئے۔
