لاہور: (ویب ڈیسک) پاکستانی کرکٹ ٹیم کے فاسٹ باؤلر شاہین شاہ آفریدی نے سابق کپتان اور لیجنڈ فاسٹ باؤلر وسیم اکرم کا ٹیسٹ کرکٹ میں 50 وکٹیں لینے کا ریکارڈ برابر کر دیا۔
تفصیلات کے مطابق پاکستان اور زمبابوے کے درمیان کھیلے جا رہے سیریز کے پہلے ٹیسٹ میچ کی پہلے روز کے دوران شاہین شاہ آفریدی نے سنگ میل حاصل کیا، انہوں نے 15.2 اوورز میں 43 رنز دیکر چار شکار کیے۔
یاد رہے کہ ماضی کے لیجنڈ اور سابق کپتان وسیم اکرم نے بھی 16 میچز میں 50 وکٹیں حاصل کی تھیں۔ دونوں نے 21 سال کی عمر میں یہ سنگ میل حاصل کیا تھا۔
خیال رہے کہ پاکستان کے خلاف سیریز کے پہلے ٹیسٹ میچ میں زمبابوے کی ٹیم پہلی اننگز میں 176 رنز بنا کر آؤٹ ہو گئی جس کے بعد اوپنرز نے سنچری شراکت قائم کرتے ہوئے قومی ٹیم کی پوزیشن مستحکم کردی۔
سیریز کے افتتاحی مقابلے میں میزبان زمبابوے نے ٹاس جیت کر پاکستان کے خلاف بیٹنگ کا فیصلہ کیا، دونوں اوپنرز نے ذمہ داری دکھاتے ہوئے دفاعی انداز اپنایا لیکن قومی بولرز نے برتری اور تجربہ کاری کی دھاک بٹھانا شروع کر دی، زمبابوین ٹیم کو صفر پر پہلی وکٹ کا نقصان اٹھانا پڑا، کاسوزا بغیر کوئی رن بنائے حسن علی کی گیند پر آؤٹ ہو گئے۔
اس کے بعد زمبابوے کی وکٹیں یکے بعد دیگرے گرتی رہیں۔ پرنس میسوارے 11، تریسائی مساکنڈا 14، برینڈن ٹیلر 5 رنز پر پویلین لوٹ گئے۔
دیگر بیٹسمینوں میں شمبا 27، کایا 48، چاکبوا 19، چیسورو 9، مزرابانی 14، نگراوا 1 رنز بنا کر آؤٹ ہوئے، شاہین آفریدی اور حسن علی نے چار چار وکٹیں حاصل کیں، نعمان نے ایک شکار کیا۔
پاکستان کی طرف سے اننگز کا آغاز عابد علی اور عمران بٹ نے کیا، دونوں نے ابتداء میں محتاط انداز اپناتے ہوئے بیٹنگ کی اور سکور کو آگے بڑھایا۔
دونوں اوپنرز نے میزبان ٹیم کے باؤلرز کی ایک نہ چلنے دی اور وکٹ کے چاروں طرف شارٹس کھیلے، عابد علی نے 83 گیندوں پر ٹیسٹ میچز کی دوسری نصف سنچری بنائی۔
کھیل کے اختتام پر قومی ٹیم نے بغیر کسی نقصان کے 103 رنز بنا لیے ہیں، عابد علی 56 اور عمران بٹ 43 سکور کیساتھ کریز پر موجود ہیں۔
