تازہ ترین
  • بریکنگ :- راولپنڈی تھانہ ویسٹریج کی نفری بنی گالہ ہاؤس پہنچ گئی
  • بریکنگ :- بنی گالہ ہاؤس کےمین گیٹ کی سیکیورٹی راولپنڈی پولیس نےسنبھال لی

خیبرپختونخوا بلدیاتی انتخابات کے دوسرے مرحلے کو موخر کرنے کا فیصلہ معطل

Published On 09 February,2022 10:58 am

اسلام آباد: (دنیا نیوز) سپریم کورٹ نے خیبرپختونخوا میں بلدیاتی انتخابات کے دوسرے مرحلے کو موخر کرنے کا پشاور ہائی کورٹ ایبٹ آباد بنچ کا فیصلہ معطل کر دیا۔ عدالت نے فریقین کو نوٹسز جاری کرتے ہوئے سماعت 14 فروری تک ملتوی کر دی۔

سپریم کورٹ کے جسٹس اعجازالاحسن اور جسٹس عائشہ ملک پر مشتمل دو رکنی بنچ نے کیس کی سماعت کی۔ الیکشن کمیشن کے وکیل نے عدالت کو بتایا کہ یکم فروری کی سماعت کا نوٹس دو فروری کو موصول ہوا، پانچ اضلاع کے شیڈول موخر کرنے کی درخواست پر 18 اضلاع کا الیکشن موخر کر دیا گیا۔

جسٹس عائیشہ ملک نے ریمارکس دیئے کہ ہائیکورٹ کو فیصلے سے پہلے الیکشن کمیشن کا موقف سننا چاہیے تھا، اس بات کی تصدیق نہیں ہوئی کہ کے پی میں موسمی حالات الیکشن میں رکاوٹ ڈال سکتے ہیں۔ جسٹس اعجازالاحسن کا کہنا تھا کہ ہائیکورٹ کو فیصلہ دینے کی اتنی جلدی کیا تھی؟ محکمہ موسمیات کی رپورٹ کو الیکشن کمیشن نے دیکھنا تھا عدالت نے نہیں۔