تازہ ترین
  • بریکنگ :- ٹنڈوالہ یار اورگردونواح میں تیزہواؤں کےساتھ موسلادھاربارش
  • بریکنگ :- ٹنڈوالہ یار:بارش کےباعث نشیبی علاقےزیرآب،ضلع بھرمیں بجلی بند
  • بریکنگ :- حیدرآباد اور گردونواح میں بارش
  • بریکنگ :- حیدرآباد:تھرپارکراوربدین میں آسمانی بجلی گرنےسے 3 افرادجاں بحق
  • بریکنگ :- آسمانی بجلی گرنےسےبدین کےعلاقےٹنڈوغلام علی میں 2خواتین جاں بحق
  • بریکنگ :- آسمانی بجلی گرنےسےتھرپارکرکےعلاقےاسلام کوٹ میں ایک شخص جاں بحق

فٹبال ورلڈ کپ: اسرائیلی شہریوں کو قطر آنے کی خصوصی اجازت

Published On 10 June,2022 09:25 pm

دوحہ: (ویب ڈیسک) اسرائیل اور خلیجی عرب ریاست قطر کے مابین سفارتی تعلقات ابھی تک قائم نہیں ہوئے لیکن صہیونی شہریوں کو فٹ بال ورلڈ کپ 2022ء دیکھنے کے لیے قطر آنے کی خصوصی اجازت ہو گی۔

اسرائیل کی وزارت دفاع، وزارت خارجہ اور کھیلوں کی وزارت نے ایک مشترکہ بیان جاری کیا، جس میں کہا ہے کہ فٹ بال کی عالمی گورننگ باڈی فیفا نے تصدیق کی ہے کہ اسرائیلی شہری بھی دنیا بھر کے دیگر شائقین کی طرح ورلڈ کپ کے دوران قطر میں میچز دیکھ سکیں گے۔

بیان میں مزید کہا گیا ہے کہ اسرائیلی شہریوں کو دیگر غیر ملکیوں کی طرح ٹکٹ کی خریداری کے ثبوت کے ساتھ آن لائن ویزا حاصل کرنے کی اجازت ہو گی۔

اسرائیل کے وزیر خارجہ یائر لاپیڈ نے ٹویٹر پر لکھا ہے کہ یہ ایک سفارتی کارنامہ ہے، جس نے مداحوں کے دلوں کو خوشی سے بھر دیا ہے۔ فٹ بال اور کھیل کی محبت لوگوں اور ملکوں کو جوڑتی ہے اور اس ورلڈ کپ نے گرمجوشی کے نئے رشتوں کے دروازے کھول دیے ہیں۔

یاد رہے کہ اسرائیل ستمبر 2020ء کے بعد سے 3 عرب ممالک متحدہ عرب امارات، بحرین اور مراکش کے ساتھ سفارتی تعلقات قائم کر چکا ہے جبکہ سوڈان بھی اس راستے پر گامزن ہے۔

خلیجی ممالک میں ہونے والی اس پیش رفت کے باوجود قطر کا رویہ اس حوالے سے انتہائی محتاط رہا ہے اور اس نے ابھی تک اسرائیل کے ساتھ سفارتی تعلقات قائم کرنے کے حوالے سے کسی واضح پالیسی کا اعلان نہیں کیا۔ قطر غزہ میں حماس کا بڑا حمایتی ہے اور دوحہ حکومت نے غزہ جنگ کے ردعمل میں 2009ء میں اسرائیل کے ساتھ کمرشل روابط بھی منقطع کر دیے تھے۔

ان دونوں ممالک کے درمیان تجارتی تعلقات 1996ء میں اس وقت قائم ہوئے تھے، جب اس وقت کے اسرائیلی وزیراعظم شمعون پیریز نے قطر کے دارالحکومت دوحہ کا دورہ کیا تھا۔

اسرائیلی سفارتی ذریعے نے اے ایف پی کو بتایا کہ اسرائیلی شہریوں کو ورلڈ کپ کے لیے قطر کا سفر کرنے کی اجازت دینے والا معاہدہ دونوں ممالک کے درمیان براہ راست پروازوں کی توسیع نہیں کرتا۔ اسرائیل کی قومی فٹ بال ٹیم ٹورنامنٹ میں حصہ نہیں لے سکے گی۔ اس نے آخری بار 1970ء میں ورلڈ کپ فائنل مراحل کے لیے کوالیفائی کیا تھا۔