اسرائیل کی مرکزی انتخابی کمیٹی کے سربراہ نے کہا کہ اسرائیلی خفیہ ایجنسی شن بیت نے گزشتہ ہفتے تحقیقات شروع کی تھیں کہ آیا عرب اسرائیلی جماعت ’راعم ‘ کو قطر سے مالی معاونت حاصل ہوئی تھی یا نہیں، قطر اور جماعت کے سربراہ منصور عباس دونوں ان الزامات کی تردید کر چکے ہیں۔

انہوں نے کہا کہ اس معاملے پر وزیراعظم نیتن یاہو اور ان کی جماعت لیکود نے عرب جماعتوں پر انتخابات میں دھاندلی اور ووٹ چوری کرنے کے الزامات عائد کئے ہیں۔

حالیہ انتخابات میں عرب جماعتوں نے غیر معمولی کامیابی حاصل کی، جس کے باعث حکومت سازی میں ان کا کردار اہم ہو گیا ہے۔

مرکزی انتخابی کمیٹی کے سربراہ اور سپریم کورٹ کے جج نوم سولبرگ نے ایک ویڈیو بیان میں کہا کہ انتخابات درست طریقے سے منعقد ہوئے اور کسی بھی بے ضابطگی کی تحقیقات کی جا رہی ہیں۔

تاہم ان کے بقول الزامات درست ثابت ہونے کی صورت میں بھی مجموعی انتخابی عمل اور نتائج کی قانونی حیثیت متاثر نہیں ہوگی۔