تازہ ترین
  • National :- آرمی چیف جنرل قمرجاویدباجوہ سےبرطانوی ہائی کمشنرکی ملاقات
  • National :- باہمی دلچسپی کےامور،خطےکی سیکیورٹی صورتحال پرتبادلہ خیال
  • National :- ملاقات میں افغان امن عمل پربھی تبادلہ خیال،آئی ایس پی آر
  • National :- کوروناسےنمٹنےکیلئےتعاون کےحوالےسےبات چیت،آئی ایس پی آر

بابر اعظم نے ویرات کوہلی کا ایک او ریکارڈ توڑنے پر نظریں جما لیں

Published On 06 May,2021 07:26 pm

لاہور: (ویب ڈیسک) قومی کپتان بابر اعظم نے ویرات کوہلی کے متعدد ریکارڈ توڑ رکھے ہیں، اب ان کی نظریں بھارتی کپتان کے مزید ریکارڈ پر ہیں۔ کوہلی ون ڈے کرکٹ میں اب تک 59.07 رنز کی بیٹنگ اوسط کے ساتھ سب سے زیادہ ایوریج رکھنے والے کھلاڑیوں میں دوسرے نمبر پر ہیں۔ بابر کم عرصے میں اس فہرست میں 56.83 کی اوسط کے ساتھ تیسرے درجے پر براجمان ہیں، گرین شرٹس کے کپتان آئندہ ون ڈے میچز کا موقع ملتے ہی یہ فرق ختم کر کے کوہلی کا ایک اور اعزاز اپنے نام کر سکتے ہیں۔

تفصیلات کے مطابق قومی ٹیم کے کپتان بابراعظم کا گراؤنڈ میں بال پکڑنے سے شروع کیا گیا سفر اب ہرروز نت نئے ریکارڈز اپنے نام کرنے تک آ پہنچا ہے۔ بابر کے کیریئر کا ایک دلچسپ پہلو ہے کہ وہ بھارتی کپتان ویرات کوہلی سے مختلف ریکارڈز چھین کر اپنے نام کر چکے ہیں۔

گزشتہ چند ہفتوں کے دوران بابر اعظم نے پہلے کوہلی سے ون ڈے کرکٹ کے نمبر ون بیٹسمین کی پوزیشن چھینی، اور چند روز کے وقفے سے ٹی ٹوئنٹی کرکٹ میں تیزترین 2 ہزار رنز بنانے کا اعزاز بھی کوہلی سے چھین لیا۔

مئی 2015ء میں ون ڈے اور ستمبر اور اکتوبر 2016ء میں ٹی ٹوئنٹی اور ٹیسٹ میچز سے اپنا بین الاقوامی کیریئر شروع کرنے والے بابر اعظم محدود سے وقت میں درجن بھر دلچسپ ریکارڈز بنائے ہیں۔

ون ڈے کرکٹ کے نمبر ون بیٹسمین اور ٹی ٹوئنٹی میں تیز ترین 2 ہزار رنز ہی ایسے ٹارگٹس نہیں جو بابر اعظم نے ویرات کوہلی کی جگہ اپنے نام کیے ہیں۔ کرکٹ کے اعدادوشمار بتاتے ہیں کہ بھارتی کپتان کے کئی اور اعزازات بھی پاکستانی بلے باز کے نشانے پر ہیں۔

ویرات کوہلی ون ڈے کرکٹ میں اب تک 59.07 رنز کی بیٹنگ اوسط کے ساتھ سب سے زیادہ ایوریج رکھنے والے کھلاڑیوں میں دوسرے نمبر پر ہیں۔

یہ بھی پڑھیں: ٹی ٹونٹی: بابر اعظم نے کوہلی کو پیچھے چھوڑ دیا، متعدد ریکارڈ اپنے نام کر لیے

بابراعظم کم عرصے میں اس فہرست میں 56.83 کی اوسط کے ساتھ تیسرے درجے پر براجمان ہیں، گرین شرٹس کے کپتان آئندہ ون ڈے میچز کا موقع ملتے ہی یہ فرق ختم کر کے کوہلی کا ایک اور اعزاز اپنے نام کر سکتے ہیں۔

سب سے زیادہ مرتبہ پلیئر آف دی ٹورنامنٹ رہنا بھی ایسا ہی اعزاز ہے جو اس وقت تک سات مرتبہ کے ساتھ بھارتی کپتان کے پاس ہے، انہوں نے اس مقام تک پہنچنے کے لیے 37 سیریز کے 90 میچز کھیلے۔

بابراعظم اس فہرست میں پانچ کامیابیوں کے ساتھ دوسرے نمبر پر ہیں، یہاں تک پہنچنے کے لیے انہوں نے کوہلی کی نسبت تقریبا نصف یعنی 19 سیریز کے محض 54 میچز کھیلے ہیں۔

ٹی ٹوئنٹی کرکٹ میں بیٹنگ اوسط کے اعتبار سے باقی بلے بازوں سے آگے موجود کوہلی 90 میچوں کے بعد 52.65 کی ایوریج رکھتے ہیں، بابر اعظم 54 میچوں میں 47.32تک پہنچ چکے ہیں۔

یہ بھی پڑھیں: ورلڈکپ: بابر اعظم، ویرات کوہلی سے بڑے بیٹسمین نکلے

ون ڈے کرکٹ میں بطور کپتان کسی ایک سیریز میں زیادہ رنز بنانے کا کوہلی کا ریکارڈ بھی بابراعظم کی پہنچ میں دکھائی دیتا ہے۔ بھارتی کپتان اب تک کسی ایک سیریز میں 558 رنز بنانے میں کامیاب ہوئے ہیں جب کہ بابر اعظم بطور کپتان ون ڈے کرکٹ کی ایک سیریز میں 449 کے ہندسے کو چھو چکے ہیں۔

بطور کپتان ٹی ٹوئنٹی کرکٹ کی کسی ایک اننگز میں سب سے زیادہ رنز بنانے والوں کی فہرست میں بھی بابراعظم کوہلی کو بہت پیچھے چھوڑ چکے ہیں۔ بھارتی کپتان نے ٹی ٹوئنٹی کرکٹ میں بطور کپتان اب تک 94 رنز کی سب سے بڑی انفرادی اننگز کھیلی ہے جب کہ پاکستانی کپتان 122رنز کے ساتھ آگے ہیں۔

ایک روزہ کرکٹ میں کیریئر کے تیز ترین 1ہزار، 2ہزار اور 3ہزار رنز بنانے کی فہرست میں بھی بابر اعظم کوہلی کو پیچھے چھوڑ چکے ہیں۔ ون ڈے کرکٹ میں مسلسل اننگز میں سنچریوں کی ریکارڈ لسٹ میں بھی بابر کوہلی سے آگے ہیں۔ بھارتی کپتان کی نسبت بابر نے یہ کارنامہ اپنے کیریئر کی بالکل ابتدا میں سرانجام دیا تھا۔

ون ڈے کرکٹ میں تیز ترین دو ہزار رنز مکمل کرنے کے اعتبار سے بھی بابر اعظم، کوہلی سے آگے ہیں۔ پاکستانی بلے باز نے 45 اننگز میں یہ سنگ میل عبور کیا جبکہ کوہلی کو اس سطح تک پہنچنے کے لیے 53 اننگز کھیلنا پڑی تھیں۔

یہ بھی پڑھیں: بابر اعظم کا بڑا کارنامہ، تیز ترین 2 ہزار رنز بنانے والے بلے باز بن گئے

ون ڈے کرکٹ کی کسی ایک سیریز میں بطور کھلاڑی وراٹ کوہلی نے پانچ میچوں کی سیریز میں تین سنچری اننگز کھیلیں جبکہ بابر اعظم یہی کارنامہ 2016 میں اپنے کیریئر کی بالکل ابتدا میں تین میچوں کی سیریز میں سرانجام دے چکے ہیں۔

26 سالہ بابراعظم پاکستان کرکٹ کا حصہ رہنے والے اکمل برادرز کے کزن ہیں تاہم قومی ٹیم کے کپتان کا کیریئر گراف بتاتا ہے کہ ان کی کارکردگی اپنے ہم عصر دیگر کھلاڑیوں کی نسبت تسلسل سے بہتری کی جانب بڑھی ہے۔

32 سالہ بھارتی کپتان نے 2008 میں اپنا ون ڈے کیریئر شروع کیا تھا، اس وقت وہ ایک روزہ کرکٹ کیریئر کے تیرہویں برس میں ہیں جبکہ 2010 میں ٹی ٹوئنٹی اور 2011 میں ٹیسٹ کیریئر شروع کرنے والے کوہلی ان دونوں فارمیٹس میں بھی باالترتیب 11 اور 10 برس گزار چکے ہیں۔

بابر اعظم کے کیریئر کو دیکھا جائے تو انہیں ون ڈے کرکٹ کھیلتے ہوئے ابھی چھ برس جبکہ ٹی ٹوئنٹی اور ٹیسٹ کھیلتے ہوئے پانچ برس ہوئے ہیں۔