راولپنڈی : ( ویب ڈیسک ) اسلام آباد یونائیٹڈ کے کپتان شاداب خان نے کہا ہے کہ ہار جیت کھیل کا حصہ ہے ، پلے آف مرحلے میں مربوط حکمت عملی کے ساتھ میدان میں اتریں گے اور پاکستان سپر لیگ ( پی ایس ایل ) کا ٹائٹل جیتنے کی کوشش کریں گے۔
پشاور زلمی کے خلاف میچ میں شکست کے بعد پریس کانفرنس کرتے ہوئے یونائیٹڈ کے کپتان نے کہا کہ ابتدائی راؤنڈ میں ٹیم کی کارکردگی اچھی رہی اور ہم نے پلے آف میں جگہ بنائی تاہم جو میچ ہم ہارے ان میں غلطیاں سرزد ہوئیں اور ہم ٹاپ ٹو میں جگہ نہیں بنا سکے۔
شاداب خان نے کہا کہ پلے آف کے میچز پریشر والے ہوتے ہیں ، غلطیوں پر قابو پا کر بھرپور تیاری کے ساتھ میدان میں اتریں گے اور فائنل تک رسائی حاصل کرنے کی پوری کوشش کریں گے ، ہم فیئرلیس کرکٹ کھیل رہے ہیں اور اس کے ساتھ ، ساتھ ہمیں سمارٹ کرکٹ بھی کھیلنی پڑے گی۔
انہوں نے مزید کہا کہ جو چار میچز ہم نے ہارے ہیں ان میں سمارٹ کرکٹ نہیں کھیلی ، آصف علی میچ ونر کھلاڑی ہے ، انہوں نے ہمیشہ یونائیٹڈ کی طرف سے اچھی کارکردگی کا مظاہرہ کیا ، پہلے راؤنڈ میں ان کی کارکردگی خراب رہی مگر ان پر مکمل اعتماد ہے اور پلے آف مرحلے میں ان سے اچھی کارکردگی کی توقع ہے۔
