لاہور: (دنیا نیوز) جنوبی افریقا ٹی20 کے دوسرے سیزن کی نیلامی میں 5 پاکستانی کھلاڑی بھی شامل ہوگئے۔
جنوبی افریقا ٹی 20 کے دوسرے سیزن کے لیے 14 ممالک کے 122 کھلاڑیوں نے 27 ستمبر کو ہونے والے آکشن کے لیے خود کو رجسٹرڈ کیا ہے۔
پاکستان کی طرف سے ایونٹ کے رجسٹرڈ کھلاڑیوں میں فاسٹ باؤلر نسیم شاہ، آل راؤنڈر محمد نواز، اسامہ میر، بیٹر شان مسعود اور سپنر عثمان قادر شامل ہیں۔
نسیم شاہ، محمد نواز اور شان مسعود کی ریزروڈ پرائس ساڑھے 8 لاکھ ساؤتھ افریقی رینڈ ہے، یہ رقم پاکستانی کرنسی میں 1 کروڑ 32 لاکھ روپے بنتی ہے۔
اسامہ میر اور عثمان قادر سوا 4 لاکھ رینڈ کی بیس پرائس کے ساتھ رجسٹرڈ ہوئے ہیں جو پاکستانی کرنسی میں کم از کم 66 لاکھ روپے بنتے ہیں، سیزن 2 میں سابق انٹرنیشنل کرکٹر حماد اعظم بطور امریکی پلیئر رجسٹرڈ ہوئے ہیں۔
یاد رہے کہ گزشتہ برس پاکستان کرکٹ بورڈ (پی سی بی) نے کھلاڑیوں کو آکشن میں شامل ہونے کے لیے این او سی جاری نہیں کی تھی، ساوتھ افریقا ٹی20 میں ٹیموں کی بھارتی اونر شپ کی وجہ سے پاکستان پلیئرز کے معاہدے ہونا غیر یقینی ہے۔
