لاہور: جوڑے پل سے اغواء ہونیوالا نوجوان بھتہ نہ دینے پر قتل

Published On 03 December,2023 10:56 am

لاہور : (دنیانیوز) جوڑے پل الطاف کالونی سے اغواء ہونے والا نوجوان بھتہ نہ دینے پر قتل کر دیا گیا،مقتول کی شناخت 26 سالہ ثاقب شفقت کے نام سے ہوئی ہے۔

مقتول کے اغواء کا مقدمہ گزشتہ ماہ 29 تاریخ کو درج ہوا تھا۔

مقتول کے بھائی عاصم سمیع نے بتایا کہ چار روز سے بھائی کو تلاش کر رہے تھے، کچھ پتہ نہیں چلا، بھائی کا قتل خالہ کے گھر پر ہوا جو چند گلیوں کے فاصلہ پر ہے،اغواء کے بعد سے پیسے مانگنے کے میسجز آ رہے تھے، میسجز میں 15 لاکھ کا مطالبہ کیا جاتا تھا، مقتول بھائی کی خالہ کے بیٹے اسامہ کے ساتھ دوستی تھی، ہماری خالہ کے بیٹوں یا کسی دوسرے شخص سے کوئی دشمنی نہیں تھی۔

عاصم سمیع نے مزید بتایا کہ اغواء کے بعد بھی خالہ کا بیٹا اسامہ اور اس کی فیملی گھر آتی رہی ہے، میسجز میں پیسے آئس نشہ کے ڈیڑھ کلو کے پیکٹ گم ہونے کے مانگے جاتے، بھائی نہ تو نشہ کرتا تھا اور نہ ہی نشہ فروخت کرتا تھا۔

قتل کی اطلاع خود ملزم اسامہ نے پولیس کو دی، پولیس کا کہنا ہے کہ مقتول کی لاش ملزم نے سوٹ کیس میں بند کی ہوئی تھی، جس نے پہلے لاش کو ٹھکانے لگانے کی کوشش کی، لاش ٹھکانے لگانے میں ناکام ہونے پرملزم نے پولیس کو اطلاع دی۔

پولیس نے مقتول کی لاش قبضہ میں لے کر جنرل ہسپتال مردہ خانہ منتقل کر دی، پی ایف اے کی ٹیم نے موقع سے تمام شواہد جمع کر لئے ہیں ۔
 

Advertisement