پشاور: (دنیا نیوز) پشاور میں واقع بالی ووڈ کے لیجنڈ اداکاروں دلیپ کمار اور راج کپور کی تاریخی حویلیوں کو اصل حالت میں بحال کرنے کے منصوبے پر باضابطہ کام کا آغاز کر دیا گیا۔
سیکرٹری آثار قدیمہ خیبرپختونخوا ڈاکٹر عبدالصمد کے مطابق یہ منصوبہ دو سال میں مکمل کیا جائے گا اور اس پر مجموعی طور پر 7 کروڑ روپے خرچ کیے جائیں گے۔
ڈاکٹر عبدالصمد نے بتایا کہ ان دونوں حویلیوں کو ان کی اصل حالت میں بحال کیا جائے گا اور بعد ازاں انہیں سیاحوں کے لیے کھول دیا جائے گا تاکہ مقامی اور بین الاقوامی سیاحت کو فروغ ملے، یہ منصوبہ سابقہ حکومت کے دور میں شروع کیا گیا تھا تاہم فنڈز کی کمی کے باعث زیر التوا رہا۔
خیال رہے کہ دلیپ کمار اور راج کپور کا تعلق پشاور کے پرانے شہر سے تھا اور ان کی آبائی رہائشگاہیں اب ثقافتی ورثے کی حیثیت رکھتی ہیں۔
صوبائی محکمہ آثار قدیمہ کی جانب سے ان عمارات کو محفوظ بنانے اور ان کے تاریخی خدوخال کو برقرار رکھنے کے لیے خصوصی اقدامات کیے جا رہے ہیں۔
