لاہور: (روزنامہ دنیا) پی آئی اے نے 12 جون سے ایئر سفاری کا اعلان کرتے ہوئے یکطرفہ کرایہ 25 ہزار روپے مقرر کر دیا۔ سیاحوں کو ایئر سفاری کے ذریعے گلگت بلتستان کی بلند ترین چوٹیاں دیکھنے کا موقع ملے گا۔
پی آئی اے کے اعلامیہ کے مطابق ایئر سفاری ہفتے میں ایک دن آپریٹ ہوگی جوکہ کالام، جھیل سیف الملوک، نانگا پربت اور کے ٹو سے گزر کر سکردو میں لینڈ کرے گی۔
پی آئی اے انتظامیہ کے مطابق ایئر سفاری سے متعلق تمام تیاریاں مکمل کرلی گئی ہیں، چند روز میں اس کا شیڈول جاری کر دیا جائے گا، اس کا مقصد وزیراعظم کے ویژن کے مطابق سیاحت کو فروغ دینا ہے۔
