مانسہرہ:(دنیا نیوز) پاکستان مسلم لیگ (ن) کے صدر اور وزیراعظم شہباز شریف نے ہزارہ کیلئے الیکٹرک کمپنی، میڈیکل کالج کی تعمیر اور طلبا کو لیپ ٹاپ دینے کا اعلان کرتے ہوئے اپنے کپڑے پھر فروخت کرنے کا نعرہ لگایا اور کہا کہ عمران خان نے جانے سے پہلے ہمارے لیے جال پھینکا، پٹرولیم مصنوعات دل پر پتھر رکھ کر مہنگی کیں، غریبوں کو ریلیف دے رہے ہیں، پنجاب میں آٹا سستا کردیا، خیبر پختونخوا میں بھی قیمتیں کم کریں گے، وزیراعلیٰ نے چوبیس گھنٹے میں جواب نہ دیا تو خادم حاضر ہے۔
مانسہرہ میں پاکستان مسلم لیگ (ن) کے جلسہ سے خطاب کرتے ہوئے شہباز شریف نے کہا کہ نواز شریف نے پاکستان کی ترقی کیلئے دن رات محنت کی، موقع ملا تو خیبرپختونخوا کو پنجاب بنا کر دکھائیں گے، انا پرست شخص قوم سے دھوکا بازی کرتا ہے، 50 لاکھ گھر بڑی دور کی بات ایک اینٹ نہیں لگائی، گزشتہ حکومت میں لاکھوں لوگ بے روزگار ہوئے، خیبرپختونخوا کےعوام کو فیصلہ کرنا ہوگا کون تخریب کار ہے اور کون تعمیرکار۔
وزیراعظم نے کہا کہ پٹرول کی قیمتیں دل پر پتھر رکھ کر بڑھانی پڑیں، عمران خان نے اپنے آخری دنوں میں تیل کی قیمتیں کم کیں، عمران خان کو پتہ تھا وہ آئینی طریقے سے گھر جارہا ہے، ہمیں مجبوراً تیل کی قیمتیں بڑھانا پڑیں، 8 کروڑ لوگوں کیلئے سبسڈی کا اعلان کیا ہے، یوٹیلیٹی اسٹورز میں 10 کلو آٹا 400 روپے کا ملے گا، خیبر پختونخوا کے وزیراعلیٰ کو کہتا ہوں عوام کو سستا آٹا دو۔
انہوں نے کہا کہ قرضوں کو اتنا بوجھ ہے کہ شاید ہماری نسلیں بھی یہ قرضے نہ اتار سکیں۔ لیکن ہمیں اللہ تعالیٰ پر بھروسہ ہے۔ ہم نواز شریف کی قیادت میں دن رات محنت کریں گے، پشاور کو لاہور کی طرح ترقی دلانی ہے تو آپ کو فیصلہ کرنا ہوگا، اس شخص سے نجات حاصل کرنا ہوگی، جو انا پرست ہے، جو یوٹرن لیتا ہے، اس کے دور میں مہنگائی آسمانوں سے باتیں کرتی رہی، غربت میں اضافہ ہوا، ایک اینٹ نہیں لگائی، دو کروڑ نوکریاں دور کی بات ایک نوکری نہیں دی، لاکھوں لوگ بیروزگار ہوگئے۔
شہباز شریف کا کہنا تھا کہ مانسہرہ کے لوگوں آج میں مانسہرہ میں میڈیکل کالج بنانے کا اعلان کرتا ہوں، اس کالج سے ڈاکٹر بن کر عوام کی خدمت کریں، مانسہرہ اور گردو نواح کے علاقوں کی ترقی اور گلی محلوں کے مسائل کے لیے ایک ارب روپے کے پیکیج کا اعلان کرتا ہوں۔ اسی طرح ہزارہ کے لیے علیحدہ الیکٹرک کمپنی کا مطالبہ کیا گیا ہے۔ میں یہاں ہزارہ کی الیکٹرک کمپنی کا اعلان کرتا ہوں جس کے آپ کو بے پناہ فواد ملیں گے۔
وزیراعظم نے کہا کہ اگلے بجٹ میں نوجوانوں کے لیے بیٹے، بیٹیوں کے لیے فری لیپ ٹاپ مہیا کریں گے، لوگ ہزارہ موٹروے سے گزرتے ہیں اور نوازشریف کو دعائیں دیتے ہیں، میں جب ہزارہ موٹروے سے گزرا تو نواز شریف کو دعائیں دیں۔ ملتان سکھر موٹروے 2016 میں آغاز کیا اور اس کی تعمیر اپنے دور میں مکمل کی، نواز شریف نے پاکستان کو خوشحال اور ترقی سے ہمکنار کرانے کے دن رات محنت کی، دل پر پتھر رکھ کر پیٹرولیم مصنوعات کی قیمتیں بڑھانا پڑیں لیکن 8 کروڑ لوگوں کو سبسڈی بھی دی، عمران خان نے آخری دنوں میں تیل کی قیمتیں کم کیں کیونکہ اس کو پتا تھا کہ وہ آئینی طریقے سے جارہا ہے۔
شہباز شریف نے کہا کہ خیبرپختونخوا کی حکومت کو کہا تھا کہ آٹے کو سستا کرتے ہیں تو ٹھیک ورنہ میں 10 کلو آٹے کی بوری پنجاب کی قیمت 490 روپے میں دوں گا لیکن مجھے اب تک خیبرپختونخوا حکومت سے جواب نہیں دیا گیا، خیبرپختونخوا کے وزیراعلیٰ سے آخری بار درخواست کرتا ہوں کہ آٹا سستا کریں۔ میں پھر کہہ رہا ہوں کہ کپڑے بیچوں گا لیکن آٹا سستا کروں گا، بلوچستان میں بلدیاتی انتخابات میں 30 سے 35 فیصد ٹرن آؤٹ ہے جو حوصلہ افزا خبر ہے۔ اس سے یہ ظاہر ہوتا ہے کہ دوردراز رہنے والے لوگوں کو جہموریت پر یقین ہے۔
