پشاور: (دنیا نیوز) مشیر اطلاعات خیبرپختونخوا بیرسٹر ڈاکٹر سیف نے کہا ہے کہ مینڈیٹ چور وزراء الیکشن ایکٹ کے کالے قانون کا بے شرمی سے دفاع کر رہے ہیں۔
اپنے ایک بیان میں بیرسٹر ڈاکٹر سیف کا کہنا تھا کہ دھڑن تختہ شیخ حسینہ کا ہوگیا اور اوسان ن لیگ کے خطا ہوگئے، جعلی فارم 47 سرکار کا خاتمہ قریب ہے اسلئے الٹے سیدھے بیانات دے رہے ہیں، مینڈیٹ چور سرکار پی ٹی آئی کی عوامی طاقت سے خائف ہے۔
انہوں نے کہا کہ عمران خان اسی جیل میں جعلی مقدمات کا ڈٹ کر مقابلہ کر رہے ہیں جس جیل سے دو بار شریف خاندان ڈیل کر کے رہ فرار اختیار کر چکا ہے، عمران خان ایک سال سے اسی جیل میں ہیں جہاں شریف خاندان کے پلیٹ لیٹس گرتے تھے۔
صوبائی مشیر اطلاعات کا کہنا تھا کہ بانی پی ٹی آئی عمران خان جیل میں بھی عوام کی حقیقی ترجمانی کر رہے ہیں۔
