خیبر: (دنیا نیوز) خیبر پختون خوا کے ضلع خیبر میں انسداد پولیو مہم میں حصہ لینے والی ٹیم پر فائرنگ کے نتیجے میں پولیس اہلکار عبدالخالق شہید ہو گیا۔
ڈسٹرکٹ پولیس آفیسر (ڈی پی او) خیبر رائے مظہر اقبال کے مطابق تھانہ حدود جمرود کے علاقے بکر آباد میں دہشتگردوں نے انسداد پولیو مہم میں حصہ لینے والی ٹیم پر غوندی کے قریب فائرنگ کر دی۔
پولیس حکام کے مطابق انسداد پولیو ٹیم میں حصہ لینے والا دیگر عملہ معجزانہ طور پر محفوظ رہا جبکہ موٹر سائیکل سوار حملہ آور فرار ہو گئے، جائے وقوعہ سے 30 بور کے دو خول ملے ہیں۔
ڈی پی او کے مطابق پولیس نے دہشتگردوں کی گرفتاری کے لیے مختلف مقامات پر ناکہ بندیاں کر دی ہیں۔
دوسری جانب محکمہ صحت کے اہلکار نے نام ظاہر نہ کرنے کی شرط پر بتایا کہ علاقے بکر آباد سے انسداد پولیو ٹیم کو واپس بلاکر انسداد پولیو مہم کو مؤخر کر دیا گیا ہے۔
