خلاصہ
- لاہور، کوئٹہ، اسلام آباد: (دنیا نیوز) موسم سرما کے رنگ، کہیں بارش کہیں برفباری، کوئٹہ سمیت بلوچستان کے مختلف علاقوں میں بادل برس پڑے، پنجاب اور خیبرپختونخوا میں بھی بارش کی پیشگوئی کر دی گئی۔
محکمہ موسمیات کے مطابق بلوچستان کے متعدد علاقوں میں رات سے بارش کا سلسلہ جاری ہے، زیارت، کان مہترزئی، مسلم باغ، توبہ کاکڑی اور توبہ اچکزئی میں بارش کے ساتھ برفباری بھی جاری ہے۔
بارش اور برفباری کے باعث کوئٹہ اور دیگر علاقوں میں سردی کی شدت میں اضافہ ہوگیا ہے، برفباری سے درجہ حرارت نقطہ انجماد سے نیچے چلا گیا، منفی ایک سینٹی گریڈ ریکارڈ کیا گیا ہے، کوڑک ٹاپ اور خواجہ عمران میں منفی 3 سینٹی گریڈ ریکارڈ کیا گیا ہے۔
این ایچ اے اور پی ڈی ایم اے کی جانب سے شمالی علاقوں میں ہائی ویز سے برف ہٹانے کا سلسلہ جاری ہے۔
لاہور/ اسلام آباد
دوسری جانب لاہور کا موسم جزوی ابر آلود ہے، محکمہ موسمیات کے مطابق آج اور کل وقفے وقفے سے بادل برسیں گے، بارش کے باعث درجہ حرارت میں مزید کمی ریکارڈ کی جائے گی۔
راولپنڈی، اسلام آباد اور گردونواح میں مطلع ابر آلود ہے، جڑواں شہروں میں آج تیز ہواؤں اور گرج چمک کے ساتھ بارش کا امکان ہے۔
آزاد کشمیر
آزاد جموں و کشمیر کے بیشتر علاقوں میں موسم ابر آلود ہوگیا، بلند و بالا پہاڑوں پر ہلکی برفباری شروع ہوگئی، جبکہ زیریں علاقوں میں سردی بڑھ گئی ہے۔
خیبرپختونخوا
اس کے علاوہ خیبرپختونخوا کے بیشتر اضلاع میں آئندہ چوبیس گھنٹے کے دوران بارش کا امکان ہے، پشاور، مردان، نوشہرہ، چارسدہ، صوابی، چترال، سوات، بونیر میں بارش متوقع ہے۔
محکمہ موسمیات کے مطابق بٹگرام، بونیر، دیر، کوہستان، ایبٹ آباد، ہری پور میں بھی بارش ہوگی، لکی مروت، ڈی آئی خان، ہنگو، کوہاٹ، مہمند، خیبر، شمالی و جنوبی وزیرستان میں بھی بارش متوقع ہے، اس کے علاوہ بالائی اضلاع میں پہاڑوں پر برف باری کا امکان ہے، بارشوں کے باعث پہاڑی علاقوں میں لینڈسلائیڈنگ اور ندی نالوں میں طغیانی کا خدشہ ہے۔
کراچی
اس کے علاوہ کراچی میں تیز ہواؤں اور گرج چمک کے ساتھ وقفے وقفے سے بارش کا امکان ہے، بارش معتدل شدت کی ہوسکتی ہے۔
محکمہ موسمیات کے مطابق شہر میں آئندہ 24 گھنٹوں کے دوران مطلع جزوی ابر آلود رہنے اور جمعہ سے سردی کی شدت میں اضافے کا امکان ہے، کراچی میں کم سے کم درجہ حرارت 7 ڈگری سینٹی گریڈ اور زیادہ سے زیادہ درجہ حرارت 25 ڈگری سینٹی گریڈ تک رہنے کا امکان ہے۔
