ذرائع کے مطابق وزیراعظم محمد شہبازشریف کی زیرصدارت ہونے والے اجلاس میں سی سی آئی کے فیصلے کی روشنی میں نہروں کے معاملے پر مشاورت کی جائے گی، اجلاس میں نائب وزیراعظم اسحاق ڈار، وزیر قانون اعظم نذیر تارڑ شرکت کریں گے۔

ذرائع نے بتایا کہ نہروں کے معاملے پر شیڈول اجلاس میں وزارت آبی وسائل کے حکام شرکت کریں گے، اجلاس میں وفاقی وزیر منصوبہ بندی، وزیراقتصادی امور، اٹارنی جنرل کو بلایا گیا ہے۔

،واضح رہے کہ پیپلزپارٹی نے نئی نہروں کے معاملے پرشدید تحفظات کا اظہار کیا تھا، گزشتہ سال وزیر اعظم کی زیر صدارت سی سی آئی نے نہروں کی تعمیر کو روک دیا تھا، وفاقی حکومت نے اتفاق رائے کے بغیر کوئی نئی نہر نہ بنانے کا فیصلہ کیا تھا۔

اس وقت فیصلہ ہوا تھا کہ سی سی آئی سے باہمی اتفاق کے بغیر کوئی نئی نہریں نہیں بنائی جائیں گی، فیصلہ ہوا تھا کہ صوبوں کے درمیان باہمی اتفاق پیدا ہونے تک وفاقی حکومت آگے نہیں بڑھے گی۔

سٹریٹجک اہمیت کی حامل 6 نہروں میں تھر کینال، رینی کینال، چولستان کینال شامل ہے، گریٹر تھر کینال، کچھی کینال اور چشمہ رائٹ بینک کینال بھی شامل ہے، صدرمملکت کو ان نہروں کی بیک وقت تعمیر کی ضرورت پر بریف کیا گیا تھا۔

کینالز کی تعمیر کو ملکی فوڈ سکیورٹی بڑھانے، زرعی ترقی کے لئے ضروری قراد دیا گیا تھا۔