اقتصادی تعاون تنظیم (ای سی او) کے وزرائے خارجہ کونسل کے 30ویں اجلاس کے موقع پر اسلام آباد میں نائب وزیراعظم و وزیر خارجہ اسحاق ڈار نے مختلف علاقائی اور بین الاقوامی تنظیموں کے سربراہان سے الگ الگ اہم ملاقاتیں کیں۔

ان ملاقاتوں میں اسلامی تعاون تنظیم (او آئی سی) کے سیکرٹری جنرل اسماعیل اولد شیخ احمد، کانفرنس آن انٹرایکشن اینڈ کانفیڈنس بلڈنگ میژرز اِن ایشیا (سیکا) کے سیکرٹری جنرل سفیر سلطان حاجیف اور اقتصادی تعاون تنظیم (ای سی او) کے سیکرٹری جنرل ڈاکٹر اسد مجید خان شامل تھے۔

ملاقاتوں کے دوران علاقائی امن و استحکام، کثیرالجہتی تعاون، اقتصادی روابط کے فروغ، باہمی دلچسپی کے امور اور مشترکہ اہداف کے حصول کے لیے مختلف پہلوؤں پر تبادلہ خیال کیا گیا۔

رہنماؤں نے علاقائی تعاون کو مزید مؤثر بنانے اور مشترکہ چیلنجز سے نمٹنے کے لیے رابطوں اور اشتراک عمل کی اہمیت پر بھی گفتگو کی۔

او آئی سی کو مسلم امہ کی مؤثر آواز بنانے کے عزم کا اعادہ
وزارت خارجہ کے مطابق اسحاق ڈار نے او آئی سی کے سیکرٹری جنرل اسماعیل اولد شیخ احمد کا عہدہ سنبھالنے کے بعد اسلام آباد کے پہلے دورے پر خیرمقدم کیا۔

— Ministry of Foreign Affairs - Pakistan (@ForeignOfficePk) November 15, 2026

اس موقع پر نائب وزیراعظم نے اس عزم کا اعادہ کیا کہ پاکستان او آئی سی کو مسلم امہ کی متحد، مضبوط اور مؤثر آواز بنانے کے لیے اپنا بھرپور کردار ادا کرتا رہے گا۔

انہوں نے تنظیم کے بنیادی مقاصد، ترجیحات اور مشترکہ اہداف کے فروغ کے لیے پاکستان کی مسلسل حمایت اور تعاون کی یقین دہانی بھی کرائی۔

اسحاق ڈار نے اس بات پر زور دیا کہ مسلم ممالک کے درمیان اتحاد، باہمی تعاون اور مشترکہ حکمت عملی وقت کی اہم ضرورت ہے اور او آئی سی اس سلسلے میں اہم کردار ادا کر سکتی ہے۔

فلسطین اور کشمیر کے عوام کے حق خودارادیت کی حمایت برقرار رکھنے کا اعلان
نائب وزیراعظم و وزیر خارجہ نے واضح کیا کہ فلسطین اور جموں و کشمیر کے عوام کے حق خودارادیت کی حمایت پاکستان کی مستقل پالیسی کا حصہ ہے، پاکستان ان دونوں دیرینہ مسائل کے منصفانہ حل اور متعلقہ عوام کے حقوق کی حمایت جاری رکھے گا۔

علاقائی امن اور اقتصادی تعاون پر بھی تبادلہ خیال
اسحاق ڈار کی سیکا کے سیکرٹری جنرل سفیر سلطان حاجیف اور ای سی او کے سیکرٹری جنرل ڈاکٹر اسد مجید خان سے ملاقاتوں میں علاقائی تعاون، اقتصادی روابط اور کثیرالجہتی سفارت کاری کو مزید فروغ دینے کے امور زیر بحث آئے۔

ان ملاقاتوں کا مقصد علاقائی تنظیموں کے درمیان روابط مضبوط بنانا، مشترکہ ترجیحات کو آگے بڑھانا اور رکن ممالک کے مابین تعاون کے نئے مواقع تلاش کرنا تھا۔

پاکستان نے ان ملاقاتوں کے ذریعے ایک بار پھر علاقائی اور بین الاقوامی فورمز پر فعال سفارتی کردار ادا کرنے اور مسلم دنیا سمیت خطے کے ممالک کے ساتھ تعاون جاری رکھنے کے عزم کا اظہار کیا۔