یہ واقعہ 18 جنوری کو پیش آیا، جس کی باڈی کیم فوٹیج عالمی خبر رساں ادارے رائٹرز نے جاری کی، جیسے ہی ہرن بینک کے اندر داخل ہوا، سکیورٹی الارم فعال ہو گیا اور پولیس فوری طور پر موقع پر پہنچ گئی۔

پولیس کے مطابق جب افسران بینک کے اندر داخل ہوئے تو انہیں کسی مشتبہ شخص کے بجائے ایک خوف زدہ ہرن نظر آیا جو شیشے کی بڑی کھڑکی توڑنے کے بعد عمارت میں پھنس چکا تھا، باڈی کیم فوٹیج میں دیکھا جا سکتا ہے کہ ہرن شدید گھبراہٹ کا شکار تھا اور باہر نکلنے کی کوشش میں کبھی کاؤنٹرز سے ٹکراتا اور کبھی میزوں پر چھلانگیں لگاتا رہا۔

سفولک کاؤنٹی پولیس نے غیر معمولی تحمل اور پیشہ ورانہ مہارت کا مظاہرہ کرتے ہوئے رسی کی مدد سے ہرن کو قابو میں کیا، اسے پرسکون کیا اور کسی بڑے نقصان کے بغیر محفوظ طریقے سے دوبارہ اس کے قدرتی ماحول میں چھوڑ دیا، خوش قسمتی سے اس واقعے میں کوئی شہری یا پولیس اہلکار زخمی نہیں ہوا۔

نیو یارک ڈیپارٹمنٹ آف انوائرمنٹل کنزرویشن کے مطابق ہر سال ریاست نیو یارک میں تقریباً 70 ہزار واقعات ایسے ہوتے ہیں جن میں گاڑیاں ہرنوں سے ٹکرا جاتی ہیں، یہ اعداد و شمار انشورنس کمپنی سٹیٹ فارم کے کلیمز پر مبنی ہیں۔

قومی سطح پر ہر ایسے حادثے میں صرف املاک کو ہونے والا اوسط نقصان 4 ہزار ڈالر سے زائد ہوتا ہے جس سے ظاہر ہوتا ہے کہ یہ مسئلہ نہ صرف حفاظتی بلکہ مالی اعتبار سے بھی ایک بڑا چیلنج بن چکا ہے۔

ماہرین ماحولیات کا کہنا ہے کہ جنگلاتی علاقوں میں کمی اور رہائشی و تجارتی تعمیرات میں اضافے کے باعث ہرنوں سمیت دیگر جنگلی جانور خوراک اور محفوظ پناہ گاہوں کی تلاش میں شہری علاقوں کا رخ کر رہے ہیں جس کے نتیجے میں اس نوعیت کے غیر معمولی واقعات میں اضافہ ہو رہا ہے۔