ماسکو: (ویب ڈیسک) دنیا بھر میں انسانوں کی بڑی تعداد ڈپریشن میں مبتلا ہے جس کے لیے اکثریت ڈاکٹروں کی ادویات کا استعمال کرتی ہیں، ڈپریشن کے حوالے سے ایک خبر جانوروں کے بارے میں سامنے آئی ہے، یہ خبر روس سے آئی ہے، جہاں روس میں ورچوئل رئیلٹی ٹیکنالوجی کا استعمال کرتے ہوئے جانوروں کو بھی ڈپریشن سے بچانے کا کام شروع کر دیا ہے۔
غیر ملکی خبر رساں ادارے کے مطابق روسی حکومت نے ایک ایسے منصوبے کا آغاز کیا ہے جس کے ذریعے گائے کو ڈپریشن سے بچانے سمیت اس کے دودھ کی پیداوار بھی بڑھائی جا سکے گی۔
روس کی وزارت زراعت و خوراک کی جانب سے ملک بھر کی گائے کو ڈپریشن سے بچانے کے لیے درالحکومت ماسکو کے قریب ایک فام میں ایک نئے تجرباتی منصوبے کا آغاز کیا گیا ہے جس کے ابتدائی نتائج توقعات سے زیادہ بہتر نکلے ہیں۔
وزارت زراعت و خوراک کی جانب سے جاری بیان میں بتایا گیا کہ ماسکو کے قریب رس ملوکو فام میں گائے کو ڈپریشن سے بچانے کے لیے وی آر ہیڈ سیٹ پہنائے جانے کے توقعات سے زیادہ فوائد حاصل ہوئے ہیں اور ان کے دودھ کی پیداوار بہتر ہوئی ہے۔
بیان کے مطابق وی آر ہیڈ سیٹ میں گائے کو خیالی ہریالی اور انتہائی اچھے نظارے دکھائے جاتے ہیں اور وہ خیال کرتی ہیں کہ وہ اپنے پسندیدہ ماحول میں چر رہی ہیں۔
بیان میں بتایا گیا کہ وی آر ہیڈ سیٹ کے ذریعے گائے کو خیالی چراگاہیں دیکھنے کو ملتی ہیں جس وجہ سے ان کے دودھ کی پیدوار پہلے سے بہتر ہوئی ہے۔
بیان میں دعویٰ کیا گیا کہ تجرباتی پروگرام کے نتائج انتہائی اچھے رہے ہیں اور مذکورہ منصوبے کو ملک کے دیگر علاقوں تک پھیلایا جائے گا۔
امکان ہے کہ اگر روسی ماہرین کا منصوبہ کامیاب گیا تو دنیا بھر اور خاص طور پر یورپی ممالک میں اس منصوبے کو استعمال کرکے گائے کے دودھ کی پیداوار بڑھائی جائے گی۔ روس کے علاوہ یورپ میں جرمنی، نیدرلینڈ، سوئٹزرلینڈ اور فرانس میں بھی گائے کو بہت بڑی تعداد موجود ہے۔
دنیا میں سب سے زیادہ گائے برازیل میں پائی جاتی ہیں جہاں دنیا بھر میں موجود گائے کا 14 فیصد حصہ پایا جاتا ہے، اس کے بعد ترتیب وار چین، بھارت، امریکا، ایتھوپیا، ارجنٹینا، سوڈان اور پاکستان میں گائے کے تعداد زیادہ ہے۔
عام طور پر پاکستان سمیت دیگر ممالک میں گائے کے دودھ کی پیداوار بڑھانے کے لیے انجکشن کا استعمال کیا جاتا ہے تاہم اب روسی ماہرین اس کام کے لیے گائے کو ورچوئل ریلٹی کے ذریعے دھوکا دے کر ان کے دودھ کی پیداوار بڑھا رہے ہیں۔
