لاہور: (دنیا نیوز) ادارہ شماریات کے اعداد و شمار کے مطابق گزشتہ ماہ کے دوران مہنگائی کی شرح حکومتی تخمینوں سے بڑھ گئی۔
ادارہ شماریات نے ماہانہ بنیادوں پر مہنگائی سے رپورٹ جاری کر دی، رپورٹ کے مطابق گزشتہ ماہ نومبر میں مہنگائی کی شرح 6.16 فیصد ریکارڈ ہوئی، وزارت خزانہ نے گزشتہ ماہ مہنگائی کا تخمینہ 5 سے 6 فیصد لگایا تھا۔
اعداد و شمار کے مطابق نومبر میں مہنگائی کی شرح میں 0 اعشاریہ 40 فیصد کا اضافہ ہوا، جولائی سے نومبر مہنگائی کی اوسطاً شرح 5 اعشاریہ 01 فیصد ریکارڈ کی گئی، گزشتہ ماہ کے دوران پیاز 40 فیصد، چکن 17 فیصد تک مہنگا ہوا۔
ادارہ شماریات کے مطابق نومبر کے دوران انڈے 8 فیصد مچھلی 2 فیصد سے زائد مہنگی ہوئی، ایک ماہ میں آلو 2 اعشاریہ 67 فیصد تک مہنگے ہوئے، ایک ماہ میں تازہ پھل 2.27 فیصد، کوکنگ آئل 1.55 فیصد مہنگا ہوا۔
رپورٹ کے مطابق گزشتہ ماہ گندم 1.12 فیصد، دودھ 1 فیصد تک مہنگا ہوا، سالانہ بنیادوں پر فوڈ آئٹمز کی قیمتوں میں 5.53 تک اضافہ ہوا، ماہانہ بنیادوں پر دالیں سبزیاں اور ٹماٹر سستے بھی ہوئے۔
اعداد و شمار کے مطابق ایک ماہ میں ٹماٹر کی قیمت میں 53 فیصد تک کمی ریکارڈ کی گئی، نومبر میں دال چنا 7.69 فیصد، سبزیاں 5.90 فیصد تک سستی ہوئیں، ایک ماہ میں بیسن 4.68 فیصد، دال مونگ 2 فیصد تک سستی ہوئی۔
