ایک بیان میں کرسٹالینا جارجیوا کا کہنا تھا کہ توانائی بحران برقرار اور سپلائی چین کا تعطل مکمل ختم ہونے میں وقت لگے گا، بنیادی ڈھانچے کو پہنچنے والے نقصان کے باعث سپلائی چین کی بحالی فوری ممکن نہیں۔

انہوں نے کہا کہ معاشی بحالی کا دارومدار اس بات پر ہے کہ توانائی بحران کو پہنچنے والا جھٹکا کتنا شدید تھا، عالمی معاشی سست روی نظر نہیں آتی لیکن خطرات بہت زیادہ ہیں، موجودہ تنازع کی شدت اور رسد میں رکاوٹ عالمی ترقی کیلئے بڑا خطرہ ہے۔

کرسٹالینا جارجیوا کے مطابق آئی ایم ایف عالمی اقتصادی ترقی سے متعلق اپنی نئی پیش گوئی 8 جولائی کو جاری کرے گا، اپریل میں عالمی شرح نمو 3.1 فیصد رہنے کا تخمینہ لگایا گیا تھا۔

انہوں نے کہا کہ جنگ بندی کے باوجود تیل کی قیمتیں تنازع سے پہلے کی سطح کے مقابلے میں اب بھی نمایاں طور پر بلند ہیں، جس کے باعث توانائی، کھاد اور خوراک کی قیمتوں میں اضافے کے خدشات برقرار ہیں۔

بیان کے مطابق ایشیا کی ابھرتی ہوئی معیشتوں میں پٹرولیم مصنوعات کی قیمتوں میں نمایاں اضافہ ریکارڈ کیا گیا جبکہ افریقی ممالک کو ایندھن کی قلت، بڑھتی مہنگائی اور مالی دباؤ کا سامنا ہے۔

ایم ڈی آئی ایم ایف نے کہا کہ تیل برآمد کرنے والے بعض خلیجی ممالک کی معاشی نمو متاثر ہو سکتی ہے جبکہ یورپ میں مہنگی توانائی اقتصادی سرگرمیوں پر دباؤ ڈال رہی ہے، تاہم امریکا اور چین کی معیشتیں مضبوط رفتار سے آگے بڑھ رہی ہیں۔