اسلام آباد میں میڈیا سے گفتگو کرتے ہوئے وفاقی وزیر پٹرولیم علی پرویز ملک نے کہا ہے کہ حکومت عالمی منڈی میں تیل کی قیمتوں میں ہونے والی کمی کا پورا فائدہ عوام تک پہنچانے کے لیے پرعزم ہے اور عوام پر ایندھن کی قیمتوں کا بوجھ کم کرنا حکومت کی اولین ترجیح ہے۔

انہوں نے بتایا کہ اوگرا ہر ہفتے عالمی نرخوں کی بنیاد پر پٹرولیم مصنوعات کی قیمتوں کا تعین کرتی ہے اور گزشتہ بیس برس سے یہی طریقہ کار رائج ہے۔

وفاقی وزیر پٹرولیم کا کہنا تھا کہ اوگرا عالمی منڈی میں قیمتوں کی اوسط، درآمدی لاگت اور پی ایس او کے اخراجات کو مدنظر رکھ کر نئی قیمتیں مقرر کرتی ہے۔

علی پرویز ملک نے کہا کہ وزیراعظم کی ہدایت پر سستے ایندھن کی فراہمی کے لیے 130 ارب روپے فراہم کیے گئے جس کے ذریعے موٹر سائیکل سواروں اور پبلک ٹرانسپورٹ کو ریلیف دیا گیا۔

انہوں نے مزید واضح کیا کہ کاروباری اداروں کا منافع یا نقصان متعلقہ کمپنیوں کی اپنی ذمہ داری ہے، تاہم حکومت اس بات کو یقینی بنائے گی کہ عالمی منڈی میں قیمتوں میں ہونے والی کمی من و عن عوام تک منتقل ہو اور انہیں زیادہ سے زیادہ ریلیف فراہم کیا جائے۔