لاہور: (ویب ڈیسک) ملتان میں کھیلے جانے والے نیشنل ٹی ٹونٹی کپ کے 12 ویں میچ میں بلوچستان نے سنسنی خیز میچ کے بعد سینٹرل پنجاب کو 3 رنز سے پچھاڑ دیا۔
تفصیلات کے مطابق بلوچستان نے پہلے کھیلتے ہوئے 168 رنز بنائے، مسلسل دوسرے میچ میں اوپنر امام الحق نے شاندار بیٹنگ کا مظاہرہ کیا، انہوں نے 55 گیندوں پر 80سکور بنائے، دیگر کھلاڑیوں میں اویس ضیاء 36، حارث سہیل 23، رنز بنا کر نمایاں رہے، دیگر کوئی بھی کھلاڑی قابل ذکر کارکردگی نہ دکھا سکا۔ احسان عادل نے تین شکار کیے، ظفر گوہر کے حصے میں دو وکٹیں آئیں۔
ہدف کے تعاقب میں سینٹرل پنجاب کی ٹیم 165 رنز پر ہمت ہار بیٹھی، عبد اللہ شفیق نے ایک مرتبہ پھر شانار کارکردگی دکھائی تاہم ٹیم کی فتح میں کردار ادا نہ کر سکی، ون ڈاؤن بیٹسمین 54 رنز کیساتھ نمایاں رہے، دیگر بیٹسمینوں میں کامران اکمل 25، عابد علی 19، رضوان حسین 22، ظفر گوہر 32 رنز بنا سکے۔ عمر گل نے چار شکار کیے جبکہ یاسر شاہ نے تین کھلاڑیوں کو پویلین بھیجا۔
