راجشاہی: (ویب ڈیسک) پاکستان انڈر19 ٹیم نے بنگلہ دیش انڈر 19ٹیم کو واحد ٹی ٹوئنٹی میچ میں 4وکٹوں سےہرا کر دورے کو شاندار کارکردگی پر ختم کیا۔
پاکستان انڈر19 ٹیم نے دورے کا واحد چار روزہ میچ 10 وکٹوں سے جیتا تھا جبکہ پانچ ون ڈے میچوں کی سیریز میں 1-4 سے کامیابی حاصل کی تھی۔
راجشاہی میں کھیلے گئے ٹی ٹوئنٹی میچ میں بنگلہ دیش انڈر19 نے پہلے بیٹنگ کی اور 5 وکٹوں کے نقصان پر 159 رنز بنائے، اوپنر جیشان عالم نے صرف 26گیندوں کا سامنا کرتے ہوئے52 رنز کی جارحانہ اننگز کھیلی ۔
— Pakistan Cricket (@TheRealPCB) May 17, 2023
پاکستان انڈر19 کی طرف سے شامل حسین نے67 رنز کی ذمہ دارانہ اننگز کھیل کر اپنی ٹیم کو جیت سے ہمکنار کرنے میں مدد کی ، عرفات منہاس نے 41 رنز سکور کیے ۔
کپتان سعد بیگ نے 24رنز بنائے، پاکستان انڈر19 نے آخری اوور کی پہلی گیند پر مطلوبہ ہدف حاصل کرلیا، میزبان ٹیم کی طرف سے اقبال حسین نے 23رنز دے کر 3 وکٹیں حاصل کیں۔
