آئی سی سی کے چیئرمین اور چیف ایگزیکٹو پاکستان پہنچ گئے

Published On 30 May,2023 04:54 am

لاہور : ( دنیا نیوز ) چیئرمین انٹرنیشنل کرکٹ کونسل ( آئی سی سی ) گریک بارکلے پاکستان پہنچ گئے۔

آئی سی سی چیئرمین گریک بارکلے غیر ملکی پرواز کے ذریعے دبئی سے لاہور پہنچے جبکہ چیف ایگزیکٹو جیوف آلارڈائس بھی ان کے ہمراہ پاکستان آئے ہیں۔

پاکستان کرکٹ بورڈ ( پی سی بی ) کے عہدیداران نے علامہ اقبال انٹرنیشنل ائیرپورٹ پر مہمانوں کا استقبال کیا اور انہیں پھولوں کے گلدستے پیش کیے۔

بعدازاں آئی سی سی چیئرمین اور چیف ایگزیکٹو کو ائیرپورٹ سے بلٹ پروف گاڑی میں نجی ہوٹل منتقل کر دیا گیا۔

گریک بارکلے آج پی سی بی کی مینجمنٹ کمیٹی کے چیئرمین نجم سیٹھی سمیت مختلف شخصیات سے ملاقات کریں گے ۔

خیال رہے کہ گریگ بارکلے 15 سال کے عرصے میں پاکستان آنے والے آئی سی سی کے پہلے چیئرمین ہیں، آخری بار 2008 میں آئی سی سی کے سابق صدر رے مالی نے پاکستان کا دورہ کیا تھا۔

اکتوبر 2004 کے بعد یہ پہلا موقع ہے کہ آئی سی سی کے دو ٹاپ آفیشلز پاکستان کرکٹ بورڈ کے ہیڈ کوارٹر کا دورہ کر رہے ہیں۔

Advertisement